Read Mizo_Old_version TIRHKOHTE THILTIH 11 Bible Online

TIRHKOHTE THILTIH 11 - Mizo_Old_version bible

TIRHKOHTE THILTIH 11

¹Tin, Judai rama tirhkoh leh unau awmte chuan, Jentailte pawhin Pathian thu an zâwm tih an hre ta a.

²Tichuan, Petera chu Jerusalem khua a thlen chhoh veleh serh tanhoten a hnênah,

³“Serh tan lote inah i lût a, an hnênah i ei vei a,” an ti a, an kalh a.

⁴Nimahsela, Petera chuan a bul aṭangin indawt zaihin an hnênah a hrilhfiah a:

⁵“Joppa khuaah ṭawngṭaiin ka awm a; tin, englovin mi zêl a, mumang angin englo bâwm, puan lian tak ang, a kil lia hlina vân ata uai thla ka hmu a; ka kiangah ngei mi rawn hnaih a;

⁶tin, chu chu ka en reng a, ka ngaihtuah a, leia mi fuliafate, ramsate, rannungte leh chunglêng savate ka hmu a.

⁷Tin, awin, ‘Peter, tho rawh; talh la, ei rawh,’ mi tiin ka hre bawk a.

⁸Nimahsela, keiin, ‘Lalpa, ni lo ve; thiang lo leh bawlhhlawh eng mah rêng ka kaah a lût ngai lo,’ ka ti a.

⁹Nimahsela, vân ata aw chuan a vawi hnihnaah, ‘Pathianin a tihthianghlim tawh chu nangin thiang lo ti suh,’ tiin mi chhâng a.

¹⁰Chutiang hlîr chuan vawi thum a lo awm a; tin, engkim chu vânah khai chhohvin a awm leh ta a.

¹¹Tin, ngai teh u, mi pathum Kaisari khua ata ka hnênah an rawn tîr a, kan awmna kawtah chuan an lo ding reng tawh a.

¹²“Tin, Thlarauvin tu mah thlei bîk lova anmahni zui tûrin mi tîr a. Hêng unau paruk pawh hian mi zui ve a, mi inah chuan kan lût a;

¹³tin, ani chuan kan hnênah, a ina vântirhkoh ding a hmuhzia leh, vântirhkoh chuan a hnênah, ‘Joppa khuaah mi tîr la, Simona, Petera an tiha chu han hruaitîr rawh;

¹⁴ani chuan thu a hrilh ang chia, chumi thu chuan nang leh i chhûngte chu chhandamin in awm ang,’ a tihzia pawh min hrilh a.

¹⁵Tin, thu ka sawi tirhin, Thlarau Thianghlim kan chunga a lo thlen tirh lai ang bawk khân an chungah a lo thleng ta a.

¹⁶Tin, Lalpa thu, ‘Johanan tuiin mi a baptis ṭhin kha; amaherawhchu, nangni zawng Thlarau Thianghlimin baptisma in la chang ang,’ a tihziate kha ka lo hre chhuak leh ta a.

¹⁷Chutichuan, Lalpa Isua Krista an rin veleh, Pathianin thilthlâwnpêk min pêk ang kha an hnêna a pêk ve ahnuin, kei tehlul hi Pathian hnial rual em ka nih?” a ti a.

¹⁸Chûng thu chu an hriatin an ngawi ta a, “Chuti a nih chuan Pathianin Jentailte pawh nung atân sim a phal ta a nih tak chu,” tiin Pathian an fak ta a.

¹⁹Tin, Stephana avânga an tihduhdaha darhte kha, Phoiniki ram te, Kupra thliarkâr te, Antiokei khua te thlengin an kal a, Juda-te hnênah chauh lo chuan tu hnênah mah thu chu an hril lo zêl a.

²⁰Nimahsela, an zînga a ṭhen chu Kupra thliarkâr leh Kurini khuaa mite an ni a, chûng mite chuan Antiokei khua chu an thlenin Grik-te hnênah pawh thu an sawi a, Lalpa Isua Chanchin Ṭha chu an hrilh ve ta a.

²¹Tin, Lalpa kutin anmahni a ṭanpui a; mi tam takin an ring a. Lalpa lam chu an hawi ta hlawm a.

²²Tin, an chanchin thu chu Jerusalem khuaa kohhran awmte bengah chuan a lo lût ta a; chutichuan, Antiokei khaw thleng chuan Barnaba chu an tîr chhuak ta a.

²³Tin, ani chu a va thleng a. Pathian khawngaihzia chu a hmuh chuan a lâwm hle a, ṭhahnemngai taka Lalpa vuan reng tûrin an zain a fuih ta a.

²⁴Barnaba chu mi ṭha tak a ni a, Thlarau Thianghlim leh rinnaa khat a ni. Tin, mi tam takin Lalpa hnênah an tel belhchhah ta a.

²⁵Tin, Barnaba chu Saula zawng tûrin Tarsa khuaah a kal a;

²⁶tin, a hmuh chuan Antiokei khuaah chuan a rawn hruai a. Tin, kum khat zet kohhrante inkhâwmnaah chuan an tel ve ṭhîn a, mi tam tak an zirtîr bawk ṭhîn a. Antiokei khuaah chuan a ni zirtîrteho chu “Kristian” an tih hmasak ber ni.

²⁷Tin, chûng lai chuan zâwlnei tute emaw, Jerusalem khua aṭangin Antiokei khuaah chuan an zuk kal a.

²⁸Tin, an zînga mi pakhat, a hming Agaba chu a ding a, khawvêl zawng zawngah ṭâm nasa tak a tla dâwn tih Thlarau hrilhin a hriattîr a; chu ṭâm chu Klaudia lal laiin a lo thleng ta a.

²⁹Tichuan, zirtîrteho chuan an theih tâwk ṭheuhvin, Judai rama unau awmte hnênah chuan chhawmdâwlna tûr thawn an tum a;

³⁰chu chu an ti ta ngei a, Barnaba leh Saula kutah chuan upate hnênah an thawn ta a.