Read Mizo_Old_version TIRHKOHTE THILTIH 12 Bible Online

TIRHKOHTE THILTIH 12 - Mizo_Old_version bible

TIRHKOHTE THILTIH 12

¹Tin, chutih lai vêl chuan, Lal Herodan kohhrante zînga tute emaw tihduhdah tumin a kut a lek ta a.

²Tin, Jakoba, Johana unau chu, khandaihin a sât hlum a.

³Chu chuan Juda-te a tilâwm tih a hriatin Petera pawh chu man a tum lehzêl a (Chûng nite chu chhang dawidim telh loh ni a ni).

⁴Tin, a man hnuah chuan tân inah a khung a, sipai pâwl li, pali ṭheuh zêlin a vên chhâwktîr a; kalhlên kût zawhah mi zawng zawng hnênah hruai chhuah a tum a.

⁵Chuvângin, Petera chu tân inah chuan a awmtîr rih a; nimahsela, kohhranhovin ama tân ṭhahnemngai takin Pathian hnênah an ṭawngṭaisak ṭhîn a.

⁶Tin, Heroda chuan a hruai chhuah dâwnin, chumi zân takah chuan Petera chu sipai pahnih inkârah khaidiat pahnih bunin a muhîl a; a vêngtute pawh kawngkhâr bulah an awm a, tân in chu an vêng a.

⁷Tin, ngai teh, Lalpa vântirhkoh pakhat a kiangah a lo ding a, ripah chuan êng eng emaw a lo êng a; tin, Petera nâkah a bêng harh a, “Tho thuai rawh,” a ti a. Tin, a khaidiatte chu a kut ata a tla ta a.

⁸Tin, vântirhkoh chuan a hnênah, “Puan veng la, i pheikhawk bun rawh,” a ti a. Tin, ani chuan chutiangin a ti a. Tin, vântirhkoh chuan a hnênah, “I puan bât ṭha la, mi zui rawh,” a ti a.

⁹Tin, Petera chu a chhuak a, a zui ta a; vântirhkoh chêtzia chu a tak a ni tih a hre lo va, mumanga a hmuh emaw a ti zâwk a.

¹⁰Tin, vêngtu tawntirh leh a dawttu an pelh hnu chuan, pâwn chhuahna tûr thîr kawngkhâr chu an va thleng a, chu chu an tân a inhawng chawp ta a; tin, an chhuak a, kawtthlêr pakhat an pêl a; tin, vântirhkoh chuan a kalsan ta nghâl a.

¹¹Tin, Petera chuan a harh veleh, “Lalpan a vântirhkoh a tîr chhuak a, Heroda kuta mi leh Juda mite beiseina zawng zawng ata mi chhandam tih tûnah dik takin ka hre ta,” a ti a.

¹²Tin, a inngaihtuah zawhin, Johana, Marka an tih, chu mi nu Mari inah chuan a va kal a; chutah chuan ṭawngṭaiin mi tam tak an lo awm khâwm a.

¹³Tin, sumhmun kawngkhâr a kik veleh a hming Rodi, nula pakhat, chhâng tûrin a va kal a.

¹⁴Tin, Petera aw a hriat veleh, a lâwm avângin kawng chu hawng lovin a tlân lût leh ta zâwk a, kawngkhâr bulah Petera a ding tih a va hrilh a.

¹⁵Nimahsela, anni chuan a hnênah, “I â ta a nih hi,” an lo ti a. Ani erawh chu, “Tihtakzet a ni,” tiin a ṭang ṭâlh a. Tin, anni chuan, “A vântirhkoh a nih chu,” an ti a.

¹⁶Nimahsela, Petera chuan a kik reng a; tin, an han hawn chuan amah chu an hmu a, mak an ti hle a.

¹⁷Chutichuan, ani chuan an ngawihna tûrin kutin a zâp a, Pathianin tân in ata amah a hruai chhuahziate chu a hrilh ta a. Tin, “Hêng thu hi Jakoba leh unaute va hrilh rawh u,” a ti a. Tin, a chhuak a, hmun dangah a kal ta a.

¹⁸Tin, ni a chhuah veleh sipaihote chu, “Petera kha khawiah nge a awm tâk?” tiin buai namênin an buai ta lo va.

¹⁹Tin, Heroda chuan a zawng a, a hmu si lo va, a vêngtute chu a chhuahchhâl a, tihhlum tûrin thu a pe ta a. Tin, Heroda chu Judai ram ata Kaisari khuaah a zuk kal a, chutah chuan a awm ta reng a.

²⁰Tin, Tura leh Sidon khuaa mite chungah chuan a lungni lo êm êm a; tin, anni chuan Blasta, lal khum vêngtu chu ṭhianah an siam a, thu khat vuain a hnênah an lo kal a, an khaw lamin lal khaw lama pûr chaw ṭhîn an nih avângin rem an ngên a.

²¹Tin, a ni tiam niin Heroda chuan lal puan a sin a, lalṭhutphahah a ṭhu a, an hnênah thu a sawi a.

²²Tin, mi zawng zawng chuan, “Pathian aw a nih hi, mihring aw a ni lo ve,” an ti a, an au ṭhîn a.

²³Tin, ani chuan Pathian hnênah chawimawina chu a pêk loh avângin, Lalpa vântirhkohvin chawplehchilhin a man a, rûlhûtin a ei a, a thi ta a.

²⁴Pathian thu erawh chu a darh a, a pung ta zêl a.

²⁵Tin, Barnaba leh Saula chuan rawng chu an bâwl zawhin, Jerusalem khua ata chu an kîr leh ta a, Johana, Marka an tiha chu an hnênah an hruai a.