Read Mizo_Old_version TIRHKOHTE THILTIH 13 Bible Online

TIRHKOHTE THILTIH 13 - Mizo_Old_version bible

TIRHKOHTE THILTIH 13

¹Tin, Antiokei khuaa kohhranho awmte zîngah chuan thuhriltute leh zirtîrtute an awm; chûng chu Barnaba te, Sumeona, Nigera an tih te, Kurini khuaa mi Lukia te, Lal Heroda unau tûr Manaina te, Saula te an ni.

²Tin, Lalpa rawng an bâwla, chaw an nghei laiin Thlarau Thianghlimin, “Barnaba leh Saula hi anmahni ka ruat chhan ti tûrin mi tihhransak rawh u,” a ti a.

³Chutichuan, chaw an ngheia an ṭawngṭai zawh chuan an chungah kut an nghat a, an kaltîr ta a.

⁴Chutichuan, Thlarau Thianghlim tirh chhuahin an kal a, Selukai khuaah an chhuk a, chuta ṭangin Kupra thliarkârah lawngin an kal a.

⁵Tin, Salamis khuaa an awm laiin, Juda inkhâwmna inahte Pathian thu an hril ṭhîn a; Johana pawh kha an rawng bâwl tûrin an hruai ve a.

⁶Tin, thliarkâr chu Paphos khaw thlengin an fang chhuak a, dawithiam, zâwlnei der, Juda mi pakhat an hmu a, a hming chu Barisua a ni a.

⁷Chu mi chu lal aiawhtu, Serjia Paula, mi fing tak hnêna awm a ni a. Chu lal aiawhtu chuan Barnaba leh Saula chu a ko va, Pathian thu hriat a tum a.

⁸Nimahsela, Eluma (Barisua hming dang, a awmzia hi Dawithiam a ni a) chuan lal aiawhtu chu rin lohtîr tumin anni chu a lo dodâl a.

⁹Chutichuan, Saula (Paula an tih bawk) chu Thlarau Thianghlimin a khat a, ani chu a en reng a,

¹⁰“Nang mi bum leh huatthlalâk tinrênga khatpa, nang Diabola fapa, nang fel tinrêng malmâkpa, Lalpa kawng fel takte hi tihchhiat i bâng lo vang maw?

¹¹Hre rawh, tûnah Lalpa kut i chungah a tla a nih hi, i mit a lo del ang a, khaw êng i hmu rih lo vang,” a ti a. Tichuan, chhûm leh thimin amah chu a bawh ta nghâl a, kuta kaitu tûr zawngin a vâk a vâk ta a.

¹²Tin, lal aiawhtu chuan chu thiltih chu a hmu a, Lalpa zirtîr thu chu mak a ti hle a, a ring ta a.

¹³Tin, Paula chu a hote nên chuan Paphos khua aṭang chuan lawngin an kal a, Pamphulia rama Perga khua an thleng a; tin, Johana khân anni chu a kalsan a, Jerusalem khuaah a kîr leh ta a.

¹⁴Nimahsela, anni chu Perga khua ata an kal zêl a, Pisidia rama Antiokei khua an thleng a; tin, Chawlhniah inkhâwmna inah an lût a, an ṭhu a.

¹⁵Tin, Dân Lehkhabu leh Zâwlneite Lehkhabu chhiar zawhin, inkhâwmna in hotuten an hnênah mi an tîr a, “Unaute u, mite fuihna thu eng emaw in neih chuan sawi rawh u,” an ti a.

¹⁶Tin, Paula chu a ding a, kutin a zâp a, “Israel mite leh Pathian ṭihtute u, ngai teh u.

¹⁷Hêng Israel chite Pathian hian min thlahtute a thlang a, Aigupta rama an thang lai khân a chawimawi a, chungnung kutin chuta ṭang chuan a hruai chhuak ta a.

¹⁸Tin, kum sawmli lai thlalêrah khân an thiltihte chu a en thei reng a.

¹⁹Tin, Kanaan rama hnam sarih a tihtlâwm hnu khân, an ram chu luah tûrin a pe zêl a,

²⁰kum zali leh sawmnga chhûng zawng khân. Chûng hnuah chuan rorêltute a pe ṭhîn a, zâwlnei Samuela thleng khân.

²¹“Tin, chumi hnuah chuan lal an dîl a; tichuan, Pathianin Saula, Kisa fa, Benjamin chia mi kha an hnênah a pe a, kum sawmli chhûng atân.

²²Tin, ani chu a sawn bo hnu khân an lal atân Davida a siam ta a; Pathianin chumi thu chu hriattîrin, ‘Davida, Jesaia fa, ka thinlung ang pu mi ka chhar ta, ani chuan ka duh zâwng ang apiang a ti ang,’ a ti a.

²³“Chu mi thlahte zîngah chuan Pathianin, thutiam ang zêlin, Israel-ho hnênah Chhandamtu Isua a rawn thlen a;

²⁴a lo kal hmain Johanan simna baptisma thu, Israel mi zawng zawng hnênah a lo hrilh tê tê a.

²⁵Tin, Johanan a rawngbâwlna a zawh dâwn lai khân, ‘Nangnin tu-ah nge mi ruat? Ani chu ka ni lo ve. Nimahsela, ngai teh u, ka hnuah mi tu emaw a lo kal dâwn a ni, kei hi zawng a kephaha pheikhawk phelh tlâk pawh ka ni lo ve,’ a ti a.

²⁶“Unaute u, Abrahama thlaha fate u, in zînga Pathian ṭih zawng zawngte u, keimahniho hnênah hian hêng chhandamna thu hi min rawn thawn chhuak a nih hi.

²⁷Jerusalem khuaa awmten an hotute nên, ani chu an hriat loh avâng leh zâwlneite thu, Chawlhni apianga chhiar ṭhin kha, an hriat hek loh avângin, ani chu thiam loh chantîrin, chumi thu chu an hlen ta a.

²⁸A thihna khawp meuh a chungah eng mah an hmuh loh pawhin, Pilata hnênah tihhlum an ngên a.

²⁹Tin, a thu zâwlneiten an ziak lâwk zawng zawng kha a hlen zawhin, thing ata chu an la thla a, thlânah an zalh ta a.

³⁰Nimahsela, Pathianin mitthi zîng ata a kaitho leh ta a;

³¹tin, Galili ram ata Jerusalem khuaa ama ruala chho vete hnênah chuan ni rei tak chhûng a inlâr ṭhîn a; chûng mite chu tûnah hian mi hnênah a thuhretute an ni e.

³²Keini pawhin thlahtute hnêna thutiam kha, a chanchin lâwmawm kan rawn hrilh che u hi.

³³Khatia Pathianin Isua a kaihthawhah khân, kan fate hnênah hian chûng chu a hlen a ni; Sam pahnihnaah, ‘Ka Fapa i ni e, vawiinah hian ka hring a che,’ tih ziak ang bawk khân.

³⁴Ṭawihna hmuna kal leh lo tûrin, Pathianin ani chu mitthi zîng ata a kaihthawh tûrzia thu chu heti hian a sawi, ‘Davida hnêna khawngaihna ka tiam tlatte kha nangmah ka pe ang che,’ tiin.

³⁵Chuvângin, hla dangah, ‘I Mi Thianghlima chu ṭawih ral i phal lo vang,’ a ti bawk a.

³⁶Davida zawng, Pathian rorêlsak angin a dam rualpuite rawng a bâwl zawhah khân a muhîl a, a thlahtute hnênah an zalh a, a ṭawih ral tawh alâwm;

³⁷Pathian kaihthawh erawh kha chu a ṭawih ral loh kha.

³⁸“Chutichuan, unaute u, hre rawh u; amah avâng chuan sual ngaihhnathiamna thu in hnênah hrilh a nih hi;

³⁹tu pawh a ring apiang engkimah ama thiam chantîrin an awm, chûngah chuan Mosia dânin thiam chantîrin in awm thei lo ve.

⁴⁰Chuvângin, fîmkhur rawh u; chuti lo chuan, zâwlneite lehkhabua an sawi kha in chungah a lo thleng dah ang e,

⁴¹‘Hmusittute u, en rawh u, Mak ti ula, boral rawh u; In dam chhûng hian thil kawng khat ka tih hi, Chu thil chu miin hrilh che u mah sela, In awih tawp lo vang,’ tih kha,” a ti a.

⁴²Tin, an chhuahin Chawlhni lehah chûng thu chu sawi leh tûrin an ngên a.

⁴³Tin, inkhâwmhote chu an ṭîn veleh, Juda-te leh an saphun Pathian ngaihsak zînga mi tam takin Paula leh Barnaba chu an zui zêl a; anni chuan an lo bia a, Pathian khawngaihnaah chuan awm reng tûrin an fuih a.

⁴⁴Tin, Chawlhni lehah chuan a khua thawin Pathian thu ngaithla tûrin an rawn inkhâwm a.

⁴⁵Nimahsela, Juda-ten mipuite chu an hmuh veleh an îtsîk êm êm mai a; Paula thusawi chu an hnialkalh a, an sâwt hle a.

⁴⁶Tin, Paula leh Barnaba chuan huai takin an sawi chhuak a, “Pathian thu hi nangmahni hnênah sawi hmasak tûr rêng a ni; nimahsela, in hnar kîr a, chatuana nung tlâk lova in inruat tâk ahnuin, hre rawh u, Jentailte lam kan hawi ta ve ang.

⁴⁷“Chutiang chuan Lalpan thu min pe a ni, ‘Jentailte tiêngtuah ka ruat a che, Kâwlkil thlenga Chhandamtua i awm theihna tûrin,’ tih ziak ang khan,” an ti a.

⁴⁸Tin, Jentailte chuan chûng thu chu an hriatin an lâwm a, Pathian chu an chawimawi a; tin, chatuana nung tûra ruat apiang chuan an ring ta a.

⁴⁹Tin, Lalpa thu chu chumi ram khua vêlah chuan a darh ta a.

⁵⁰Nimahsela, Juda-te chuan hmeichhe zahawm, Pathian ngaihsakte leh khuaa upahote chu an fuih a, Paula leh Barnaba chu an tihduhdahtîr a, an ram ata an hnawt chhuak ta a.

⁵¹Tin, anni chuan an chungah an kephaha vaivut an thing thla a, Ikonion khua an thleng a.

⁵²Tin, zirtîrhote chu lâwmna leh Thlarau Thianghlimin an khat hlawm a.