Read Mizo_Old_version TIRHKOHTE THILTIH 14 Bible Online

TIRHKOHTE THILTIH 14 - Mizo_Old_version bible

TIRHKOHTE THILTIH 14

¹Tin, Ikonion khuaah chuan Juda-te inkhâwmna inah an lût dûn a, thu an sawi ṭhîn a; chutichuan, Juda leh Grik tam tak pawhin an ring ta hial a.

²Nimahsela, ring duh lo Juda-ten Jentailte an fuihpawrh a, unaute chu an huattîr a.

³Chuvângin, Lalpaah huai taka thu sawiin chutah chuan rei fe an awm a, ani chuan chhinchhiahna leh thil makte an kuta tihtîrin, a khawngaih thu a hriattîr ṭhîn a.

⁴Nimahsela, khuaa mipuite chu an inkhing ta a; a ṭhenin Juda-te chu an ṭan a, a ṭhenin tirhkohte chu an ṭan a.

⁵Tin, Jentailte, Juda-te, an hotute nên chuan tirhkohte chu zahthlâk taka siam leh lunga den tuma an beih dâwn laiin,

⁶anni chuan an lo hria a, Lukaoni ram vêkah chuan Lustra leh Derbe khuaahte leh a vêl ramahte an tlân bo va;

⁷chûngah chuan Chanchin Ṭha an hril zêl a.

⁸Tin, Lustra khuaah chuan ke zeng tu emaw a ṭhu ṭhîn a, a pian tirh ata kebai rêng a ni a, kein a kal ngai lo va.

⁹Chu mi chuan Paula thusawi a ngaithla a; tin, Paula chuan ani chu a en reng a, damna tûrin rinna a nei tih a hria a,

¹⁰aw ring takin, “I kein ding ngîl rawh,” a ti a. Tin, ani chu a zuang tho va, kein a kal ta a.

¹¹Tin, mipuiten Paula thiltih chu an hmuh veleh Lukaoni ṭawngin ring takin, “Pathiante chu mihring angin kan hnênah an lo chhuk ta a nih hi!” an ti a.

¹²Tin, Barnaba chu “Jupita” an ti a, Paula chu thusawitu zâwk a nih avângin “Merkuria” an ti a.

¹³Tin, Jupita, a biak in dai pâwna awm chu, a puithiamin sebâwngpate leh pangpâr ṭhi hruite kawngkhâr kiangahte a rawn la a, mipuite nên chuan biak nân talh an tum ta a.

¹⁴Nimahsela, tirhkoh Barnaba leh Paula chuan chu chu an hriat veleh an puan an pawt thlêr a, mipui zîngah chuan an zuang lût a, an au va,

¹⁵“Pute u, hêng thil hi engah nge in tih? Keini pawh in nungchang ang pu mihring kan nih hi; hêng thil lawilote hi in hawisana, vân te, lei te, tuifinriat te, a chhûnga awm zawng zawng nêna siamtu Pathian nung hnênah chuan in lo pakaina tûrin Chanchin Ṭha kan rawn thlen che u a nih hi.

¹⁶Chu Pathian chuan hmânlaiin hnam tin mahni kawng ṭheuh zawh a phal ṭhîn a;

¹⁷nimahsela, amah hriattîrna awm lovin a insiam lo; chutin thil a tiṭha ṭhîn a, vân ata ruahte leh kum ṭhat kumte a pe che u a, in rilru ei tûr leh lâwmnain a tihkhah ṭhin che u kha,” an ti a.

¹⁸Tin, chûng thu chuan mipuiten anmahni biak nâna ran an talh tûr chu an khap zo ta hrâm hrâm a.

¹⁹Nimahsela, Antiokei leh Ikonion khuaa Juda tute emaw chutah chuan an lo kal a, mipuite chu an thlêm thlu ta a; tichuan, Paula chu lungin an dêng a, thia an rin avângin khua ata chu an hnûk chhuak ta a.

²⁰Nimahsela, zirtîrhote chu a vêla an din laiin a lo tho va, khuaah chuan a lût leh ta a. Tin, a tûkah chuan Barnaba nên Derbe khuaah an kal ta a.

²¹Tin, chumi khuate hnênah chuan Chanchin Ṭha an hrilh a, zirtîr tam tak an siam hnuin Lustra khuaah te, Ikonion khuaah te, Antiokei khuaah te an kîr leh zêl a,

²²“Hrehawm tam tak tuarin Pathian ramah kan lût tûr a ni rêng a ni,” tiin zirtîrhote rilru an tinghet a, rinnaah chuan awm reng tûrin an fuih zêl a.

²³Tin, kohhran pâwl tinah chuan upate an ruatsak a, chaw nghei chunga an ṭawngṭai zawhin, an rin Lalpa hnênah chuan a kawltîr zêl ṭhîn a.

²⁴Tin, Pisidia ram chu an fang chhuak a, Pamphulia ram an thleng a.

²⁵Tin, Perga khuaa thu an hril zawhin Attalia khuaah an zuk kal a;

²⁶chuta ṭang chuan lawngin an chhuak a, Antiokei khua chu an thleng leh ta a, chu chu an thiltih zawh tâk chu ti tûra unauten Pathian khawngaihna kawltîra an chhuahtîrna kha a ni.

²⁷Tin, an thlen hnuin kohhranhote chu an ko khâwm a, Pathianin anmahni hmanga thil a tih zawng zawngte leh, Jentailte tâna rinna kawngkhâr a hawnsakziate chu an hrilh a.

²⁸Tin, zirtîrhote hnênah chuan rei fe an awm ta a.