Read Mizo_Old_version TIRHKOHTE THILTIH 15 Bible Online

TIRHKOHTE THILTIH 15 - Mizo_Old_version bible

TIRHKOHTE THILTIH 15

¹Tin, mi tute emaw Judai ram ata an lo chhuk a, “Mosia dân anga serh in tantîr loh chuan chhandam in ni thei lo vang,” tiin unaute chu an zirtîr a.

²Chutichuan, Paula leh Barnaba chu anmahni nên inhnial namêna an inhnial lohva, an inkhin tlat avângin, Paula leh Barnaba chu an zînga tute emaw nên, chu thubuai chungah chuan, Jerusalem khuaa tirhkohte leh upate hnênah chho tûrin an ruat a.

³Chutichuan, kohhrante chuan an han thlah a, anni chuan Jentailte hawi kîr lehzia thu chu hril zêlin, Phoiniki ram leh Samari ram an fang chhuak ta a; tichuan, unaute zawng zawng an tilâwm êm êm a.

⁴Tin, Jerusalem khua an han thlen chuan kohhranhote, tirhkohte, upate chuan an lo lâwm a; tin, Pathianin anmahni hmanga thil a tih zawng zawngte chu an hrilh a.

⁵Nimahsela, Pharisai pâwla mi, ring ve tute emaw an tho va, “Jentailte chu an serh tan tûr a ni, Mosia dân awih pawh an hnênah tiam kher tûr a ni,” an ti a.

⁶Tin, tirhkohte leh upate chu, chumi thu chu ngaihtuah tûrin an inkhâwm a.

⁷Tin, an inhnial chiam hnuin Petera a tho va, an hnênah, “Unaute u, Jentailten keima kaa Chanchin Ṭha thu hriaa awih tûra, Pathianin hmâna in zîng ata mi ruatzia kha in hria e.

⁸Tin, rilru hretu Pathianin keini min pêk ang bawk khân Thlarau Thianghlim an hnênah pe vein, an chungah a lâwm tih a hriattîr a;

⁹tin, keini leh anni thlei bîk lovin rinin an rilru a tithianghlim a.

¹⁰Chutichuan, min thlahtu leh keini zawh tawh loh nghâwngkawl kha, tûnah zirtîrhote chunga nghah tumin engati nge Pathian fin in hnial kalh le?

¹¹Anmahni rin ang bawk hian keini pawhin Lalpa Isua khawngaihna avânga chhandam tûr niin kan inring si a,” a ti a.

¹²Tichuan, mipui zawng zawng chu an ngawi reng a, Barnaba leh Paulan Pathianin anmahni hmanga Jentailte zînga chhinchhiahna leh thil mak a tih thu kha an hrilh chhûng zawng an ngaithla a.

¹³Tin, an sawi zawhin Jakoban a sawi ve thung a: “Unaute u, ka thu ngaithla rawh u,

¹⁴Pathianin ama hming pu atân an zîng ata mite la chhuak tûrin, Jentailte a kan ṭan tirh dân chu Sumeona hian a sawi ta a.

¹⁵Tin, chûng thu leh zâwlneite thu hi a inhmeh a ni:

¹⁶‘Chûng zawhah chuan ka kîr leh ang a, Davida bâwkte chim kha ka siam leh ang a, A chhe lai apiang pawh ka rem chho leh ang;

¹⁷Mi dang, Jentail zawng zawng ka hming mi ṭâwmhote chuan, Lalpa an zawn nân. Chu bâwktê chu ka tungding ang,’ tiin.

¹⁸Khawvêl siam tirh ata hêng thu hriattîr ṭhîntu Lalpa chuan a ti e, tih ziak hi.

¹⁹“Chuvângin, heti hian ka ruat a ni, Jentailte zînga Pathian lam hawite chu tihrehawm lo ila,

²⁰milem biakna thil bawlhhlawh ei te, inngaih te, sa reh hlum leh thisen eite bânna tûrin an hnênah lehkha thawn zâwk ila ka ti ber a ni.

²¹Mosian hmânlai ata tawh khaw tinah a thu tlângaupuitu a nei ṭhîn si a, inkhâwmna inahte Chawlhni apiangin a thu chu chhiar a nih ṭhin kha,” a ti a.

²²Tin, tirhkohte, upate, kohhran zawng zawngte nên chuan, an pâwla mi thlana, Paula leh Barnaba hnênah Antiokei khuaa kaltîr ṭha an ti a; an thlante hming chu Juda (Barsabba an tih) leh Sila an ni, chu mite chu unaute zînga hotu deuh an ni a.

²³Tin, hetiang hian an ziak a, an kutah an thawn a: “Tirhkohte leh unaute zînga upaten Antiokei khua te, Suria ram te leh Kilikia rama Jentail unau awmte chibai an bûk e.

²⁴“Kan pâwl zînga mi tuten emaw thu sawiin an tibuai che u a, in rilru an timangang tih kan hria e, an hnênah thu eng mah kan pe si lo va.

²⁵Chuvângin, thu khat vuaa kan inkhâwmin, kan duh tak Barnaba leh Paula, Lalpa Isua Krista hming avânga thih dâwn lote kal rual hian, mi thlante in hnêna rawn kaltîr ve ṭha kan ti a.

²⁷Chutichuan, Juda leh Sila kan rawn tîr a nih hi, anni pawhin hêng thu bawk hi ṭawngkain an hrilh ang che u.

²⁸Thlarau Thianghlim leh keinin, hêng thu pawimawh lo hi chu, phurrit zual in chungah nghat lo ila a ṭha kan ti;

²⁹milem biakna sa ei te, sa thisen ei te, sa reh hlum ei te, inngaih te bâng ula kan ti; hêng hi in bân chuan in tân a ṭha ang. Dam takin awm rawh u,” tiin.

³⁰Chutichuan, an tirhin an kal a, Antiokei khua chu an zuk thleng a; tin, mipui an ko khâwm a, lehkha chu an pe a.

³¹Tin, an chhiar zawhin thlamuanna thu avâng chuan an lo lâwm ta hle a.

³²Tin, Juda leh Sila chu zâwlnei an ni bawk a, thu tam takin unaute chu an thlamuan a, an tinghet a.

³³Tin, chutah chuan rei deuh an awm hnuin, anmahni tîrtute hnêna hâwng leh tûrin, unaute chuan thlamuang takin an chhuahtîr leh ta a. [1]

³⁵Paula leh Barnaba erawh chu Antiokei khuaah chuan Lalpa thu zirtîr leh hrilin an awm reng a, mi dang tam tak nên.

³⁶Tin, ni eng emaw zât hnuah chuan Paulan Barnaba hnênah, “Tûnah kal leh ila, khaw tina Lalpa thu kan hrilhna apianga unau awmte kha kan zêl ila, an awm dân i en ang,” a ti a.

³⁷Tin, Barnaban Johana (Marka an tih chu) an hnênah hruai a tum a.

³⁸Paula erawh chuan ani chu an hnêna hruai ṭha a ti lo, Pamphulia ramah anmahni a kîrsana, hnathawhnaa an hnêna a kal ve tâk loh avâng khân.

³⁹Tichuan, nasa takin an inhnial ta a; chutichuan, an inṭhen a, Barnaban Marka chu a hnênah a hruai a, Kupra thliarkâr lamah lawngin a kal ta a.

⁴⁰Paula erawh chuan Sila a thlang a, unauten Lalpa khawngaihnaa an kawltîr hnuin a kal chhuak ta a.

⁴¹Tin, kohhrante chu tinghet zêlin Suria leh Kilikia ram a fang chhuak ta a.