Read Mizo_Old_version TIRHKOHTE THILTIH 16 Bible Online

TIRHKOHTE THILTIH 16 - Mizo_Old_version bible

TIRHKOHTE THILTIH 16

¹Tin, Derbe khuaah leh Lustra khuaah chuan a kal bawk a; tin, chutah chuan a hming Timothea, zirtîr pakhat a awm; ani chu ring ve Juda hmeichhe fapa a ni a, a pa erawh chu Grik a ni;

²Lustra leh Ikonion khuaa unau awmte chuan ani chu an fak ṭhîn a.

³Paulan ani chu an hnêna kal veah a duh a; tichuan, chumi lama Juda awmte avâng chuan a serh a tansak a, a pa chu Grik a ni tih an hre vek si a.

⁴Tin, khaw tina an kal pahin, Jerusalem khuaa tirhkoh leh upa awmte thurêl kha zawm atân unaute hnênah an pe zêl a.

⁵Chutichuan, kohhrante chu rinnaah chuan an nghet ta a, ni tin an pung ta deuh deuh va.

⁶Tin, Thlarau Thianghlimin Asia rama thuhril a khap avângin, Phrugia leh Galatia ram chu an fang chhuak ta a;

⁷tin, Musia ram kiang an thlenin Bithunia rama luh an tum a; nimahsela, Isua thlarauvin a phal si lo va.

⁸Chutichuan, Musia ram chu an pêl a, Troas khuaah an chhuk ta a.

⁹Tin, zânah Paulan mumang angin Makedonia rama mi pakhat dingin, “Makedonia ramah lo kai la, min pui rawh,” tia ngên chiamin a hmu a.

¹⁰Tin, chu mang chu a man zawh veleh Makedonia ramah chuan kal kan tum ta nghâl a, an hnêna Chanchin Ṭha hrilah Pathianin min ko tih kan hria a.

¹¹Tin, Troas khua ata lawngin kan chhuak a, tluang takin Samothraki khuaah kan kal a, a tûkah chuan Neapoli khuaah kan kal leh a;

¹²tin, chuta ṭang chuan Philippi khuaah kan kal a, chumi khua chu Makedonia rama khaw pakhat a ni a, chumi bialah chuan khaw pawimawh ber a ni a, Rom khuaa mi pêmte khua a ni. Chumi khuaah chuan ni tam deuh kan châm a.

¹³Tin, Chawlhniah chuan kulh kawngkhâr pâwn lamah, lui kamah, ṭawngṭaina hmun nia kan rinah chuan kan kal a; tin, kan ṭhu a, hmeichhe lo kal khâwmhote hnênah chuan thu kan sawi a.

¹⁴Tin, a hming Ludi, puan senduk zuartu, Thuatira khuaa mi, Pathian betu hmeichhe pakhatin kan thu a hria a; tin, Paula thusawi chu zâwm tûrin Lalpan a thinlung a tivâr ta a.

¹⁵Tin, amah leh a chhûngten baptisma an chan zawhin, “Lalpa ring takzeta mi ruat chuan, ka inah lo thleng rawh u,” tiin min ngên chiam a, min chelh ta a.

¹⁶Tin, ṭawngṭaina hmunah chuan kan kal laiin, nula tu emaw ramhuai aienthiam zâwlin min tâwk a, ani chuan a aien avângin a pute chu sum tam tak a hmuhtîr ṭhîn a.

¹⁷Chu mi chuan Paula leh keini min zui a, “Hêng mi chhandamna kawng hrilhtu che u hi, Chungnungber Pathian bawih an nih hi,” tiin a au va.

¹⁸Chutiang chuan ni rei tak a ti ṭhîn a. Chutichuan, Paula chu a lungni ta lo va, a hawi a, ramhuai hnênah chuan, “Isua Krista hmingin a kawchhûng ata chhuah thu ka pe a che,” a ti a. Tin, chutih lai tak chuan a chhuak ta nghâl a.

¹⁹Tin, a pute chuan an sum hmuhna a bo tih an hriatin, Paula leh Sila chu an man a, hotute hmaah dâwr hmunah an hnûk lût a.

²⁰Tichuan, rorêltute hnênah an hruai a, “Hêng mite hi Juda-te an ni a, kan khua an tibuai êm êm a,

²¹dân eng emaw kan lawm leh zawm thiang lote hi an hril ṭhîn a, Rom mi kan ni si a,” an ti a.

²²Chutichuan, mipuite pawh chu tirhkohte bei tûrin an lo thawk ve a, rorêltute chuan an puante an phih hlihsak a, tianga vuak thu an pe a.

²³Tin, vawi tam tak an vuak zawhin tân inah an khung a, a vêngtu hnênah him taka vên tûr an ti tlat a;

²⁴chuti kauva thu an pêk avâng chuan ani chuan rip chhûngnungah a khung a, an keahte chuan thingkawl a buntîr tlat a.

²⁵Nimahsela, zanlaiah Paula leh Sila chu Pathian hnênah an ṭawngṭai a, hla an sa a, mi tângten an ngaithla a;

²⁶tin, thawklehkhatah lîr nasa takin a lo nghîng a; chutichuan, tân in lungphûmte lam chu a nghîng a; tin, kawngkhâr zawng zawng chu a inhawng nghâl a, mi tin kawl bunte chu a lo inphelh ta vek a.

²⁷Tin, a vêngtu chu a muhîl a lo harh a, tân in kawngkhârte chu inhawngin a hmu a, mi tângte chu an tlan bo emaw a ti a, a khandaih a phawi a, a intihlum dâwn a.

²⁸Nimahsela, Paula chu aw ring takin a au va, “Eng mah intih suh; kan zain hetah kan la awm vek alâwm,” a ti a.

²⁹Tin, a vêngtu chuan khâwnvârte a lam a, a zuang lût a, hlauva khûr chungin Paula leh Sila hmaah chuan a bawkkhup a;

³⁰tin, anni chu a hruai chhuak a, “Pute u, chhandama awm tûrin eng nge ka tih tûr?” a ti a.

³¹Tin, anni chuan, “Lalpa Isua ring la; tichuan, chhandamin i awm ang, nang leh i chhûngte nên,” an ti a.

³²Tin, a hnênah leh a ina awm zawng zawng hnênah chuan Lalpa thu an sawi a.

³³Tin, chumi zânah, chumi lai la la chuan a hruai a, an vuakna vualte chu a sil fai a; tin, ani leh a chhûngte zawng zawng chuan baptisma an chang ta nghâl a.

³⁴Tin, a inah a hruai chho va, ei tûr a hlui a; tin, Pathian an rin avângin, ani chu a chhûngte zawng zawng nên an hlim ta êm êm a.

³⁵Tin, ni a chhuahin rorêltute chuan, “Kha mite kha chhuah rawh,” tiin mi mantute an tîr a.

³⁶Tin, tân in vêngtu chuan Paula hnênah an thu a hrilh a, “Rorêltute chuan chhuah tûr che uin mi an rawn tîr a ni; chuvângin, tûnah lo chhuak ula, thlamuang takin kal rawh u,” a ti a.

³⁷Nimahsela, Paula chuan an hnênah, “Rom mi kan ni si a, kan thiam leh thiam loh hre lovin vântlâng mit hmuhin min vua a, tân inah min khung a; tûnah hian a rûkin min hnawt chhuak dâwn vei a ni maw? A ni tawp lo vang; anmahni ngei lo kal sela, min rawn hruai chhuak rawh se,” a ti a.

³⁸Chutichuan, mi mantute chuan chûng thu chu rorêltute hnênah chuan an hrilh a. Tin, Rom mi an ni tih an hriat chuan an hlau ta a;

³⁹tin, an va kal a, an thlêm chiam a, an hruai chhuak a, khua ata chu kal bovah an ngên a.

⁴⁰Tin, tân in ata chu an chhuak a, Ludi inah chuan an lût a; tin, unaute chu an hmu a, an thlamuan a, an chhuak ta a.