Read Mizo_Old_version TIRHKOHTE THILTIH 17 Bible Online

TIRHKOHTE THILTIH 17 - Mizo_Old_version bible

TIRHKOHTE THILTIH 17

¹Tin, Amphipoli khua leh Apollonia khua an kal pêl a, Thessalonika khua an thleng ta a, chutah chuan Juda-te inkhâwmna in a awm a;

²tin, Paula chu a dân pângngaiin an hnênah a lût a, Chawlhni vawi thum Pathian Lehkha Thu aṭangin khûn taka chhûtpuiin,

³Krista chu hrehawm tuar tûr rêng a nihzia te, mitthi zîng ata pawh tholeh tûr rêng a nihzia te chu a hrilhfiah a, a tilang ṭhîn a; “He Isua, a thu ka hrilh che u hi, amah hi Krista chu a ni,” a ti bawk ṭhîn a.

⁴Tichuan, an zînga ṭhenkhat chu thlêm thlûkin an awm a, Paula leh Sila chu an pâwl ta a; Pathian ngaihsak Grik mipui tam tak leh hmeichhe puipa tam tak nên.

⁵Nimahsela, Juda-ten an huphurh a; dâwr hmuna mi sual thatchhia tute emaw an hnênah an hruai a, mipui an ko khâwm a, khua zawng zawng chu an chawk buai a; Jasona in chu an rawn ṭhâwng a, vântlâng hnêna hruai chhuah tumin.

⁶Tin, anni chu an hmu lo va, Jasona leh unau dang tute emaw chu khaw hotute hnênah an hnûk lût a, an au va, “Khawvêl chawk buaitute kha hetah pawh an lo kal a,

⁷Jasona hian a lo thleng vei a; hêngho zawng zawng hi, ‘A hming Isua, lal dang a awm,’ tiin, Kaisara thu kalhin an awm ṭhîn a ni,” an ti a.

⁸Tin, mipui leh khaw hotute chuan chûng thu chu an han hriat chuan an buai ta a;

⁹tin, Jasona leh mi dangte hnên ata chu an aia hrên tûr englo an la a, an chhuah ta a.

¹⁰Tin, unaute chuan a zân a zânin Paula leh Sila chu Beroia khuaah an kaltîr ta nghâl a; chuta an va thlen chuan Juda-te inkhâwmna inah an lût a.

¹¹Chuta mite chu Thessalonika khuaa mite ai chuan an lo ṭha zâwk a; chutichuan, rilru lâwm takin thu chu an pawm a, an thusawi chu a dik leh dik loh hriat nân ni tin Pathian Lehkhaah an zawng ṭhîn a.

¹²Chutichuan, chûngho zînga mi tam tak chuan an ring ta a; Grik hmeichhe zahawmte leh mipate pawh duaiin an ring ta lo bawk a.

¹³Nimahsela, Thessalonika khuaa Juda-hote chu, Paulan Beroia khuaah Pathian thu a hril tih an hriat veleh, chutah pawh chuan an va kal a, mipui an fuihpawrh a, an tibuai leh ta a.

¹⁴Chutichuan, unaute chuan tuifinriat thlenga kal tûrin Paula chu an tîr chhuak ta nghâl a, Sila leh Timothea erawh chu chutah chuan an la awm reng a.

¹⁵Tin, Paula hruaitute chuan Atheni khaw thlengin an hruai a; tin, Sila leh Timothea chu theihtâwpa a hnêna kal thuaina tûr thuchah sinin an haw ta a.

¹⁶Tin, Paulan Atheni khuaah anni chu a lo nghah lai chuan, khua chu pathian lema khatin a hmu a, a rilruin a helh ta a.

¹⁷Chutichuan, inkhâwmna inah Juda-te leh Jentail Pathian ngaihsakte a hnial ṭhîn a, dâwr hmunah pawh chuta lo awm apiangte chu ni tin a hnial bawk ṭhîn.

¹⁸Tin, Epikuria mi leh Stoik mi zînga mi fing tute emaw pawhin ani chu an rawn hnial a. A ṭhenin, “He mi kamtam hian eng nge sawi a tum?” an ti a. A ṭhenin (Isua thu leh thawhlehna thu a hril avângin) “Ram dang pathiante thu hriltu a ni âwm e,” an ti a.

¹⁹Tin, ani chu an chelh a, Areopagi-ah chuan an rawn hruai a, a hnênah, “He zirtîrna thar i sawi ṭhin hi min hriattîr thei ang em?

²⁰Thil mak eng emaw kan bengahte i rawn thlen a ni; chutichuan, hêng thil awmzia hi hriat kan duh e,” an ti a.

²¹Atheni khuaa mi zawng zawng chu, an khuaa mikhual awmte pawh, an hman châng apiangin thu thar tawh phawt chu sawiin emaw, a ngaithla talin emaw an awm chawt ṭhîn rêng a ni.

²²Tin, Paula chu Areopagi lai takah chuan a ding a, a sawi a. “Nangni Atheni khuaa mite u, engkimah sakhaw ngaihsak mi tak in ni tih ka hria e.

²³Ka lên paha in chibai bûkate ka en laiin maichâm pakhat, a chunga, ‘Hriat Loh Pathian Tân’ tia ziak ka hmu a ni. Chutichuan, hre lova chibai in bûk ṭhina kha, chu mia thu chu ka hrilh che u a nih hi.

²⁴Pathian, khawvêl leh a chhûnga thil zawng zawng siamtu chu, lei leh vân Lal a nih avângin kuta sak inahte a awm lo va;

²⁵thil tlachham angin mihring kuta rawngbâwlsakin a awm hek lo, amah ngei chu engkim hnêna nunna te, thâwkna te leh thil zawng zawng petu a ni zâwk e.

²⁶Tin, lei chung zawng zawnga awm tûrin bul hmun khat vekin hnam tin a siam a, an tân hun bite a ruat a, an awmna rîte pawh a khamsak a,

²⁷Pathian an zawna, an dap an dapa, an hmuh mial theih nân; nimahsela, ani chuan min hlat lo ṭheuh si a.

²⁸Amah avângin kan nung, kan che, kan awm a ni si a; in hla phuah thiam tute emaw pawhin, ‘Keini pawh a thlahte kan ni si,’ tia an sawi ang khân.

²⁹Chutichuan, Pathian thlahte kan nih ahnuin, Pathian pangti chu rangkachak te, tangkarua te, lung te, mihring themthiam leh remruata chher te ang hi emaw tih, kan ring tûr a ni lo ve.

³⁰Chutichuan, Pathianin kan hriat loh laite a hai der ṭhîn a; nimahsela, tûnah hian ram tina mi zawng zawng sim tûr thu a pe ta a ni, ni a tiam avângin;

³¹chumi niah chuan a mi ruata chu, leia mite fel takin a ngaihtuahtîr ang; chu chu Pathianin amah chu mitthi zîng ata kaithovin, mi zawng zawng hnênah a hriattîr tawh a ni,” tiin.

³²Tin, mitthi zîng ata thawhlehna thu chu an hriat veleh a ṭhenin an nuihsan a; a ṭhenin, “He thu hi i hnênah kan la ngaithla leh ang e,” an ti a.

³³Chutichuan, Paula chu an zîng ata a chhuak ta a.

³⁴Nimahsela, mi tute emaw a hnênah an tel ta tlat a, an ring ta a; chûng zînga ṭhenkhat chu Areopagi-a mi Dionusia leh hmeichhe pakhat, a hming Damari leh an hnêna mi dangte nên chuan an ni.