Read Mizo_Old_version TIRHKOHTE THILTIH 18 Bible Online

TIRHKOHTE THILTIH 18 - Mizo_Old_version bible

TIRHKOHTE THILTIH 18

¹Chûng thil hnuah chuan Paula chu Atheni khua ata chu a chhuak a, Korinth khuaah a kal ta a.

²Tin, a hming Akuila, Juda pakhat a hmu a, chu mi chu Ponto rama piang a ni a, Klaudian Juda zawng zawng Rom khua ata chhuah thu a pêk avângin, a nupui Priskilli nên Itali ram ata lo kal hlim an ni a.

³Tin, Paula chu chu mite hnênah chuan a thleng ta a, tin; an hnathawh ang thawk a nih avângin anmahni a hrawn a, an hnênah a thawk ve ṭhîn a; an hnathawh chu puan in siam a ni a.

⁴Tin, Chawlhni apiangin inkhâwmna inah khûn takin thu a hril ṭhîn a, Juda-te leh Grik-te chu thlêm thlûk a tum ṭhîn a.

⁵Tin, Sila leh Timothea chu Makedonia ram ata chu an lo chhukin, Paula chu thuhril chauhvin a awm ta a. Isua kha Krista chu a ni tih Juda-te hnênah a hrilhfiah ṭhîn a ni.

⁶Nimahsela, an dodâla an sâwtin, Paulan a puan a thing a, an hnênah, “In thihna mawh chu nangmahnin phur ang che u; kei zawng ka hul a ni e; tûn achinah Jentailte hnênah ka kal ang,” a ti a.

⁷Tin, chuta ta chu a kal a, a hming Tita Justa, mi pakhat inah a lût a, chu mi chuan Pathian a be ṭhîn a; a in pawh chu inkhâwmna in nêna inzawm a ni.

⁸Tin, Krispa, inkhâwmna in hotu chuan a chhûngte zawng zawng nên Lalpa an ring a; Korinth khuaa mi tam tak pawhin an hria a, an ring ve a, baptisma an chang ta a.

⁹Tin, zânah Lalpan Paula hnênah chuan mumang angin, “Hlau suh la, ngawi lovin thu sawi zêl rawh;

¹⁰kei i hnênah ka awm alâwm, tina tûr chein tu mân i chungah kut an thlâk lo vang; he khuaah hian mi tam tak ka nei si a,” a ti a.

¹¹Tin, Paula chu chutah chuan, Pathian thu zirtîrin an zîngah kum khat leh thla ruk a awm ta a.

¹²Tin, Galliova Akaia rama lal aiawha a awm laiin Juda-ten rual takin Paula an bei a, rorêlna ṭhutphah hmaah an hruai a,

¹³“He mi hrep hian Dân lo anga Pathian be tûrin mi a thlêm thlu ṭhîn a ni,” an ti a.

¹⁴Tin, Paula a chhân dâwnin, Galliovan Juda-te hnênah chuan, “Juda-te u, hêng hi thil dik lo thu emaw, thil tihsual emaw tal ni sela, matheilovin ka ngaihsak ang che u a;

¹⁵nimahsela, thute, hmingte, in dân chungthute mai a nih chuan nangmahnin rêl zâwk rawh u; kei zawngin chutiang thu chu ngaihtuah ka duh lo ve,” a ti a.

¹⁶Tin, rorêlna ṭhutphah aṭang chuan anni chu a hnawt bo ta a.

¹⁷Tin, Grik mi zawng zawngin inkhâwmna in hotu Sosthena chu an man a, rorêlna ṭhutphah hmaah chuan an vua a, Galliova chuan chûng an thiltih chu engah mah a ngai lo va.

¹⁸Tin, chumi hnuah chuan Paula chu ni rei tak a la châm reng a; chumi zawh chuan unaute chu ṭawng ṭhain a ṭhen a, chuta ta chu Suria ram lamah lawngin a kal ta a, a hnênah Priskilli leh Akuila chu an kal ve bawk a; Paulan thutiam a neih avângin Kenkriai khuaah a lu a mêt zet a.

¹⁹Tin, Ephesi khua chu an thleng a, chutah chuan anni chu a hnutchhiah ta a; ani erawh chu inkhâwmna inah a lût a, Juda-te hnênah khûn takin thu a sawi rih a.

²⁰Tin, rei deuh châmah an ngên a; nimahsela, a remti lo va,

²¹“Pathianin a phal chuan in hnênah ka lo kal leh ang,” tiin ṭawng ṭhain a ṭhen a, Ephesi khua ata chu lawngin a kal ta a.

²²Tin, lawng ata chu Kaisari khuaah a chhuak a, Jerusalem khuaah a han kal a, kohhranhote chu chibai a bûk a; tin, chumi zawhah chuan Antiokei khuaah a zuk kal ta a.

²³Tin, chutah chuan rei ngial a awm hnuin a kal leh a, zirtîrho zawng zawng tinghetin Galatia ram leh Phrugia ram chu a fang chhuak vek a.

²⁴Tin, Juda pakhat, a hming Apollova, Aleksandria khuaa piang, mi fing tak, Ephesi khuaah chuan a zuk kal a; ani chuan Pathian Lehkha Thute a hre nasa êm êm a.

²⁵Chu mi chu Lalpa Kawng thu zir tawh a ni a, rilrua ṭhahnemngai tak a nih avângin Isua chanchin chu ngun takin a hril a, a zirtîr ṭhîn a, Johana baptisma thu chauh a hre si a.

²⁶Tin, inkhâwmna inah huai takin thu a sawi ṭan ta a. Chutichuan, Priskilli leh Akuila chuan a thusawi an hriatin an inah an hruai a, a hnênah Pathian Kawng thu fel lehzualin an hrilhfiah ta a.

²⁷Tin, ani chuan Akaia rama kal kai a tum veleh unauten an fuih a, amah an lo lawmna tûrin zirtîrhote hnênah lehkha an ziaksak a; tin, a thlen chuan Pathian khawngaihna avânga ringtute chu nasa takin a pui a;

²⁸vântlâng hriatin Juda-te chu nasa takin a tidang a, Pathian Lehkha Thu hmangin Isua kha Krista chu a ni tih a hriattîr ṭhîn a.