Read Mizo_Old_version TIRHKOHTE THILTIH 19 Bible Online

TIRHKOHTE THILTIH 19 - Mizo_Old_version bible

TIRHKOHTE THILTIH 19

¹Tin, Paula chuan khawchhak bial a fang chhuak zet a, Apollova Korinth khuaa a awm hlân khân Ephesi khua chu a thleng a, zirtîrho tute emaw a hmu a;

²tin, ani chuan an hnênah, “In rin tirh lai khân Thlarau Thianghlim in chang em?” a ti a. Tin, anni chuan a hnênah, “Chang lo, Thlarau Thianghlim a awm tih rêng hriat pawh kan hre lo,” an ti a.

³Tin, ani chuan, “Eng baptisma-ah nge in chan le?” a ti a. Anni chuan, “Johana baptisma-ah,” an ti a.

⁴Tin, Paula chuan, “Johana kha chuan mi hnênah, ‘Mi rawn zuitu tûr (Isua) chu in la ring tûr a ni,’ tiin simna baptisma-in a baptis ṭhîn a nih kha,” a ti a.

⁵Tin, chu thu chu an hriat veleh Lalpa Isua hmingin baptisma an chang ta a.

⁶Tin, Paulan an chungah a kut a nghat a, Thlarau Thianghlim chu an chungah a lo thleng ta a; tichuan, ṭawng hriat lohtein thu an sawi a, Pathian thu pawh an hril ta a.

⁷An za chuan patling sâwm leh pahnih lai an ni.

⁸Tin, Paula chu inkhâwmna inah a lût ṭhîn a, thla thum lai huai takin thu a sawi a, Pathian ram kawng thu-ah chuan mi a hnial a, mi a thlêm thlu ṭhîn a.

⁹Nimahsela, a ṭhen an tihmawha, an awih duh lohva, mipui hmaah Kawng chu an sawichhiat veleh chuan ani chuan anmahni a kalsan a, zirtîrhote chu a kai hrang a, ni tin Turanna zirtîrna inah mi a hnial ṭhîn a.

¹⁰Chutiang hlîr chuan kum hnih lai a ti a; chutichuan, Asia rama awm zawng zawng, Juda-te leh Grik-te pawhin Lalpa thu chu an hre ta hial a.

¹¹Tin, Pathianin Paula kutin thil mak namên a tihtîr lo va;

¹²chutichuan, a taksa ata inhrûkna puante emaw, fênthuahte emaw damlote hnênah an rawn keng a, an nâte a reh ṭhîn a, an kawchhûng ata ramhuaite pawh an chhuak ṭhîn a.

¹³Tin, thiam zuara vâk vâk Juda tuten emaw, “Paulan a thu a tlângaupui ṭhin Isua hmingin kan vau a che,” tiin, ramhuai paite chungah Lalpa Isua hming an lam vei ṭhîn a.

¹⁴Tin, Juda mi, puithiam lal pakhat, Skeva chuan chutiang ti ve ṭhîn fapa pasarih a nei a.

¹⁵Nimahsela, ramhuaiin an hnênah, “Isua ka awih e, Paula pawh ka hria e, nangni erawh chu tu nge maw in nih le?” a ti a, a chhâng a.

¹⁶Tin, ramhuai pai chuan a rawn zuan a, an za chuan a hneh a, a ngam ta zâwk a; chutichuan, chumi in ata chu saruak leh inhliamin an tlân chhuak ta hial a.

¹⁷Chutichuan, Ephesi khuaa awm zawng zawng, Juda-te leh Grik-te hnênah pawh chumi thu chu a thang ta a; tichuan, an zain an hlau va, Lalpa Isua hming chu a lian ta a.

¹⁸Tin, ringhote pawh chu a ṭhen tam tak an lo kal a, an thiltihte thupha an chawi a, an inpuang ta a.

¹⁹Dawi hmang tam tak pawhin an lehkhabute an rawn la khâwm a, mi zawng zawng mit hmuhah an hâl ta a; tin, a man an chhût a, chêng sîngnga niin an hria.

²⁰Chuti kauva nasa chuan Lalpa thu chu a darh a, a hneh ta zêl a.

²¹Tin, chûng zawhah chuan Paulan, Makedonia ram leh Akaia ram chu fan chhuah riha, Jerusalem khuaa kal a rilrûk a, “Chuta ka kal zawh chuan Rom khua ka tlawh bawk tûr a ni,” a ti a.

²²Chutichuan, a rawngbâwltu pahnih, Timothea leh Erasta chu Makedonia ramah a kaltîr zet a, ani erawh chu Asia ramah a awm rih a.

²³Tin, chûng lai vêl chuan Kawng avâng chuan buai namênin mi an buai ta lo va.

²⁴Mi pakhat, a hming Demetria, tangkarua chhera, tangkaruaa Diani lem siamtu chuan, a siam thiamte hnênah inhlawhfâkna tam tak a pe ṭhîn a;

²⁵chu mi chuan anni chu a ko khâwm a, an hnathawh ang thawktute nên; tin, an hnênah, “Pute u, he hna hi kan hausakna a ni tih in hria e.

²⁶Hetah Ephesi khua chauhvah hian ni lovin, Asia ram khua vêl zawng zawng thawah pawh he Paula hian, ‘Kuta siam pathiante hi Pathian an ni lo,’ tiin mi tam tak a thlêm thlu a, a pakaitîr zo tawh a ni tih nangni ngei pawhin in hmuin in hre bawk a;

²⁷chutichuan, kan hnathawh a lân ang tih a hlauhawm chauh hi a ni lo va, pathiannu ropui tak Diani biak in pawh hi an rawn ngai tlâwm ang a, Asia rama mi zawng zawng leh khawvêla miin an biak ṭhin hi, a ropui tehlul nên, a tlâwm ang tih a hlauhawm bawk a ni,” a ti a.

²⁸Tin, chûng thu chu an hriat veleh an thinur ta êm êm a, “Ephesi khuaa mi Diani hi ropui tak a ni!” tiin an au va.

²⁹Tichuan, a khuain an buai ta vek a, Gaia leh Aristarka, Makedonia rama mi, Paula hnungzuitute chu an man a, a rualin ennawm inah an tlânpui chiam a.

³⁰Tin, Paulan mipui zînga luh a tum chuan zirtîrhoten an phal lo va.

³¹Tin, Asia ram hotu berte zînga ṭhenkhat chu Paula ṭhiante an ni a, a hnênah mi an tîr a, ennawm inah chuan lût lui lo tûrin an thlêm chiam a.

³²Tin, awm khâwmhote chu an buai a, mi tam zâwkin an inkhâwm chhan pawh an hre lo va; chuvângin, ṭhenkhat thu pakhatin an au va, ṭhenkhat thu dangin an au va.

³³Tin, mipui zînga ṭhenkhatin Aleksandra chu an thiamna thu sawi dân tûr chu an hrilh a, Juda-ten ani chu mi hma lamah an nam phei a. Tin, Aleksandra chuan a kutin a zâp a, mi zawng zawng hnênah chuan an thiamna thu sawi a tum a.

³⁴Nimahsela, ani chu Juda mi a ni tih an hriat veleh, dârkâr hnih lai rual takin, “Ephesi khuaa mi Diani hi ropui tak a ni!” ti hlîrin an au an au va.

³⁵Tin, khaw lehkhaziaktuin mipui chu a tihdaih zawh chuan, “Ephesi khuaa mite u, Diani ropui tak biak in leh vân aṭanga milem tla kha, Ephesi khuaa mite hi a vêngtu in ni tih tu nge hre lo awm ni?

³⁶Chutichuan, hêng thu hi hnial rual a nih loh ahnu, in ngawi reng tûr a ni, thu dâwn lovin eng mah in ti tûr a ni lo.

³⁷Hêng mi, heta in rawn hruaite hi biak in suam hmangte an ni lo va, kan pathiannu sawichhetu lah an ni hek lo.

³⁸Chutichuan, Demetria leh a ṭhian themthiamte pawhin tu lakah pawh thupawi an neih chuan, thupawi sawina inte chu hawn sa a ni alâwm, lal aiawhtute pawh an awm a; inchhâl rawh se.

³⁹Thil dang pawi nei rêng in nih chuan inkhâwm pângngaiah an rem ang.

⁴⁰Vawiina bengchhen avâng hian chhâl hlauhawmin kan awm tâk hi, a bul awm si lovin; chuti chu a ni si a, he inkhâwm chhan hi eng mah kan sawi theih dâwn loh hi,” a ti a.

⁴¹Tin, chûng thu a sawi zawh chuan awm khâwmhote chu a ṭîntîr ta a.