Read Mizo_Old_version TIRHKOHTE THILTIH 2 Bible Online

TIRHKOHTE THILTIH 2 - Mizo_Old_version bible

TIRHKOHTE THILTIH 2

¹Tin, Pentikos ni a lo thlenin, an zain hmun khatah an awm khâwm vek a.

²Tin, thâwklehkhatan vân ata ri, thlipui tleh angin a lo thleng ta phut a; tin, chu chuan an ṭhutna in chu a tikhat ta vek a.

³Tin, leite amaha insem darhin, mei angin an hnênah a lo inlâr ta a. Tin, an chungah a chuang ṭheuh va,

⁴an zain Thlarau Thianghlimin an khat ta vek a, Thlarauvin a ṭawngtîr ang zêlin ṭawng dangin an lo ṭawng ta a.

⁵Tin, vân hnuaia hnam tin zîng ata Pathian ngaihsak Juda-te Jerusalem khuaah an châm a.

⁶Tin, chu ri chu an hriat veleh mipui an rawn inkhâwm a, mi tinin an ṭawng chu mahni ṭawng ṭheuhva an lo hriat avângin an rilruin an lo buai a.

⁷Tin, an za chuan an mangang a, mak an ti hle a, “En teh u, hênga ṭawngte zawng zawng hi Galili rama mi an ni lo vem ni?

⁸Engtin nge kan zaa kan ṭawng pianpui anga kan hriat ṭheuh?

⁹ṭhenkhat Parthai hnam te, Medai hnam te, Elamitai hnam te kan ni a; ṭhenkhat Mesopotamia rama awm te, Judai rama awm te, Kappadokia rama awm te, Ponto rama awm te, Asia rama awm te,

¹⁰Phrugia rama awm te, Pamphulia rama awm te, Aigupta rama awm te, Kurini khaw kiang vêla Libua rama awm te kan ni a; ṭhenkhat Rom khaw khual, Juda-te leh an saphunte nên kan ni a;

¹¹ṭhenkhat Kret thliarkâra mi leh Arab rama mi kan ni si a; nimahsela, Pathian thiltih ropuite an sawi, mahni ṭawng ṭheuhvin kan hriat si hi!” an ti a.

¹²Tin, an za chuan mak an ti hle mai a, a ngaihna an hre lo va, “Hêng hi engtizia nge ni?” an ti a.

¹³Ṭhenkhatin an nuihsan a. “Uain thar an rui a nih hi,” an ti a.

¹⁴Nimahsela, Petera chu sâwm leh pakhatte nên an ding za a, ani chuan aw ring takin an hnênah a sawi a, “Nangni Judai rama mite u, nangni Jerusalem khuaa awm zawng zawngte u, hêng hi hria ula, ka thu pawh ngai rawh u.

¹⁵Hêngho hi in rin angin an rui lo ve, fehrehsân lai chauh a nih hi.

¹⁶Hêng hi zâwlnei Joelan a sawi kha a ni zâwk:

¹⁷‘Pathianin, “Ni hnuhnûngahte chuan heti hi a ni ang a, Mi zawng zawng chungah ka Thlarau ka leih ang a; Tichuan, in fapate, in fanuten ka thu an hril ang a; In tlangvâlten inlârnate an hmu ang a, In putarten mumangah an mang ang a.

¹⁸A ni, chûng niahte chuan ka bawihpate, ka bawihnute chungah pawh, Ka Thlarau ka leih ang a, ka thu an hril ang.

¹⁹Tin, chung lam vânah thil mak te, Hnuai lam leiah chhinchhiahna te ka hmuhtîr ang a; Thisen te, mei te, meikhu hu te nên:

²⁰Ni thimah a chang ang a, Thla thisenah a chang ang a, Lalpa ni ropui tak leh hmingthang tak chu A lo thlen hmain;

²¹Tin, heti hi a ni ang a, Tu pawh Lalpa hming lam apiang chu an him ang,” a ti e,’ a tih kha.

²²“Nangni Israel mite u, hêng thu hi hre rawh u: Nazareth Isua, Pathianin amah hmangin in zîngah thil ropui te, thil mak tak te, chhinchhiahna te a tih khânin a hriat chiantîr che u kha; nangni ngeiin chûng chu in hre si a;

²³kha mi kha Pathian rêl tlat leh hriat lâwk angin an mantîr a, nangnin mi sualte kutin krawsah in khêng bet a, in tihlum ta a.

²⁴Kha mi kha Pathianin thihna phuarnate chu a phelhsak a, a kaitho ta a; amah chu thihna chelh hlen rual a nih loh avângin.

²⁵Tin, Davida chuan a thu a sawi a, ‘Ka hmaah kumkhuain Lalpa chu ka hmu ṭhîn a. Ka mangan loh nân ka ding lamah a awm a ni;

²⁶Chuvângin, ka thinlung a hlim a, Ka lei pawh a lâwm a; Chuvângin, ka tisa pawh beisei takin a awm bawk ang.

²⁷Ka thlarau chu mitthi khuaah i hnutchhiah lo vang a, I mi thianghlim ṭawih ral i phal hek lo vang a,

²⁸Nangin nunna kawngte mi hriattîr a, Nangin i hmêlin lâwmin mi tikhat ang,’ tiin.

²⁹“Unaute u, chi thlahtu Davida thu hi hlau lovin in hnênah ka sawi thei e; ani zawng a thi a, phûm pawh an phûm tawh alâwm, a thlân pawh tûn thlengin kan hnênah a la awm reng a.

³⁰Ani chu zâwlnei a ni a, Pathianin a ṭhâlbea mi, tu emaw a ṭhutphah chungah a ṭhuttîr dâwn tih chhechhamin a sawi tih a hria a;

³¹tichuan, chûng chu a lo hriat lâwk reng avângin, Krista thawhleh tûr thu a sawi a ni, ‘Mitthi khuaa hnutchhiahin a awm hek lo, a ruang pawh a ṭawih hek lo,’ tiin.

³²Chu Isua chu Pathianin a kaitho leh ta rêng a ni, chu chu a hretu kan zain kan ni e.

³³Pathian kut ding lamah chawimawiin a awm a, Thlarau Thianghlim tiam chu Pa hnên ata a hmu a, in hmuh leh in hriat hi a han leih a nih hi.

³⁴Davida zawng vânah a lâwn chho lo a ni, amah ngeiin, ‘Jehovan ka Lalpa hnênah, “Ka ding lamah ṭhu reng rawh,

³⁵I hmêlmate i kephah nghahchhana Ka siam hma loh zawng,” a ti e,’ a ti zâwk a nih kha.

³⁶“Chutichuan, Isua in khen beha ngei kha, Pathianin Lal leh Krista ni fâwmin a siam ta tih, Israel hnam tinin hre mawlh rawh se,” a ti a.

³⁷Tin, chûng thu chu an hriatin an thinlunga chhun ang an lo ni ta a, Petera leh tirhkoh dangte hnênah chuan, “Unaute u, engtin nge kan tih tâk ang?” an ti a.

³⁸Tin, Petera chuan an hnênah, “Sim ula, in sual ngaihdam nân Isua Krista hmingin baptisma chang ṭheuh rawh u; tichuan, Thlarau Thianghlim pêk hi in hmu ang.

³⁹A tiam kha nangni tân pawh, in fate tân pawh, hla taka mi zawng zawng tân pawh, Lalpa kan Pathianin a hnêna a koh apiangte tân a ni e,” a ti a.

⁴⁰Tin, thu dang tam takin a hrilhfiah a; “Tûnlai ṭhangthar bengtlalote lakah hian intihim rawh u,” tiin a fuih a.

⁴¹Tin, a thu zâwm apiangin baptisma an chang ta a; chumi niah chuan mi sângthum laia belhchhahin an awm a.

⁴²Tin, tirhkohte zirtîrin, inpâwlin, chhang phelin, ṭawngṭaiin ṭhahnemngai takin an awm reng a.

⁴³Tin, mi tinin an hlau ta a; tirhkohte chuan thil mak leh chhinchhiahna tam tak an ti a.

⁴⁴Tin, a ring apiang chuan engkim an inṭâwm hlawm a,

⁴⁵an rote, an sumte an hralh a, an châkkhai daih lek ṭheuhvin an zaa hnênah chuan an sem ṭhîn a.

⁴⁶Tin, ni tin rilru hmun khatin Pathian biak inah chuan ṭhahnemngai takin an awm ṭhîn a, an in lamahte pawh chhang an phel a, hlim tak leh lungawi takin an chaw an ei ṭhîn a.

⁴⁷Pathian an fak a, mi zawng zawng lawm zâwngin an awm ṭhîn. Tin, a chhandam mêk apiangte chu Lalpan ni tin an hnênah a teltîr zêl ṭhîn.