Read Mizo_Old_version TIRHKOHTE THILTIH 20 Bible Online

TIRHKOHTE THILTIH 20 - Mizo_Old_version bible

TIRHKOHTE THILTIH 20

¹Tin, bengchheng chu a reh hnuin, Paulan zirtîrhote chu a kohtîr a, a fuih a, ṭawng ṭhain a ṭhen a, Makedonia rama kal tûrin a chhuak ta a.

²Tin, thu tam taka zirtîrhote chu fuih zêlin chumi ram chu a fang chhuak a, Grik ram a thleng ta a.

³Tin, chutah chuan thla thum a thang hnuin, Suria ram lamah lawngin a kal dâwn a, Juda-ten amah an phiar avângin Makedonia ramah hâwn tlang a tum leh ta zâwk a.

⁴Tin, Purrha fapa Sopatera, Beroia khuaa mi te, Thessalonika khuaa mi Aristarka leh Sekunda te, Derbe khuaa mi Gaia te, Timothea te, Asia rama mi Tukika leh Trophima te chu a hnênah Asia ram thlengin an kal ve a.

⁵Chûngho chuan kan hma an hruai a, Troas khuaah chuan min lo nghâk reng a.

⁶Keini erawh chu, chhang dawidim telh loh ni zawng zawng hnuah chuan, Philippi khua ata chu lawngin kan chhuak a, ni nga chinah Troas khuaah an hnên kan thleng a; chutah chuan ni sarih kan châm a.

⁷Tin, ni sarih ni hmasa berah chuan chhang phel tûra kan awm khâwm laiin, Paula chuan a tûka kal a tum avângin an hnênah khûn takin thu a hril a; zanlai thlengin thu a sawi a.

⁸Tin, pindan chungnung kan awm khâwmnaah chuan khâwnvâr tam tak a awm a.

⁹Tin, a hming Eutuka, tlangvâl pakhat tukverhah chuan a ṭhu a, a lo muthlu a lo muthlu a. Tin, Paulan thu a sawi rei tâk avângin ani chuan a mutchhuak a tuar ta lo va, in chhâwng thumna aṭang chuan a tla ta a, thiin an chhar a.

¹⁰Nimahsela, Paula chu a chhuk a, a chungah a bawh a, a pawm a, “Thlaphâng suh u, a hnuk a la chat lo ve,” a ti a.

¹¹Tin, Paula chu a chho leh a, chhang chu a phel a, chaw a ei a, rei tak, khawvâr thleng hialin an hnênah thukhawchâng a sawi a, chumi hnuah chuan a kal ta a.

¹²Tin, râwlthar chu damin an hruai a, thlamuan namênin an thlamuang ta lo va.

¹³Keini erawh chu lawngah kan lo kal tawh a, Asso khaw pan tûrin lawng chuan kan lo chhuak hmasa a, chutah chuan Paula chu lo chuantîr ve kan tum a; ani chuan kea lo kal a tum avângin chutiang chuan aman a ruat rêng a ni a.

¹⁴Asso khuaa min rawn fin chuan kan chuantîr ta a, Mitulini khua kan thleng a.

¹⁵Tin, chuta ṭang chuan lawngin kan kal leh a, a tûkah chuan Kio thliarkâr zâwn kan thleng a; tin, a tûk lehah Sami thliarkâr kan tlawh a; tin, a tûk lehah chuan Mileti khua kan thleng leh a.

¹⁶Tin, Paula chuan Asia rama awm rei a duh loh avângin, Ephesi khua chu lawngin pelh a tum sa rêng a ni; a theih chuan Jerusalem khuaah Pentikos ni nan a tum a, a kal hmanhmawh a ni.

¹⁷Tin, Mileti khua aṭang chuan Ephesi khuaah mi a tîr a, kohhran upahote a hnênah a kohtîr a.

¹⁸Tin, a hnên an lo thlen chuan ani chuan an hnênah: “Asia ram ka tlawh tirh ni ata kha in hnêna ka awm chhûng zawng khan, ka awmzia kha in hria e;

¹⁹thuhnuairawlh ber chung leh, Juda-ten mi phiar avânga mittui tla leh, thil hrehawm ka chunga tlate tuar chunga Lalpa rawng ka bâwl ṭhin kha;

²⁰khati khân a sâwt tûr thu in hnênah eng mah hrilh che u ka tîm loh va, vântlâng zîngah te, in tinah te ka zirtîr ṭhin che ua,

²¹Juda-te leh Grik-te hnênah pawh Pathian lama rilru lamlêt thu leh, kan Lalpa Isua Krista lam rin tûr thu ka hriattîr ṭhin kha.

²²Tin, hre rawh u, tûnah hian rilrua kal lo thei lova ka inhriat avângin, Jerusalem khuaah ka kal dâwn hi, chutah chuan ka chunga thil lo thleng tûr chin ka hre lo ve.

²³Thlarau Thianghlimin, ‘Phuarna leh hrehawmnain a hmuak a che,’ tiin khaw tinah mi hriattîr ṭhîn, chûng chauh chu ka hria a ni.

²⁴Nimahsela, ka tlânsiakna kawng ka hmabâk hlen tûr leh, Pathian khawngaihna Chanchin Ṭha hriattîr tûr, Lalpa Isua hnên aṭanga khami rawngbâwl hna ka hmuh kha thawk zo phawt ila, ka nun pawh thlâkhlelh tlâkah ka ruat lo ve.

²⁵“Tin, hre rawh u, nangni zawng zawng, Pathian ram thu tlângaupui zêla ka vah ka vah ṭhinnate hian, ka hmêl in hmu leh tawh lo vang tih ka hria e.

²⁶Chuvângin, mi zawng zawng thisenah ka hul a ni tih vawiinah hian ka hriattîr a che u.

²⁷Pathian rêl zawng zawng a zain in hnênah hrilh ka tîm loh kha.

²⁸Pathian kohhranho, ama thisena a leite chu châwm tûrin, nangmahni leh in hote zawng zawng chungah chuan fîmkhur rawh u, Thlarau Thianghlimin an chunga hotuah a siam che u hi.

²⁹Ka kal hnuin chinghne kawlhte in zîngah an lo lût ang a, pâwlho chu an zuah lo vang tih ka hria e.

³⁰In zînga mi ngei pawh hi, zirtîrhote in hnêna pakaitîr tûrin, thu hran sawi in lo la awm ang.

³¹Chuvângin, ngaihven rawh u, kum thum meuh, mittui tla chunga a chhûn a zâna mi tin zilh ka bân loh kha hre reng rawh u.

³²“Tûnah hian Pathian leh a khawngaihna thu-ah ka kawltîr a che u, chu chuan a siam lian thei che u a, mi rilru thianghlimte zîngah ro chan a neihtîr thei bawk a che u.

³³Tu ma tangkaruate, rangkachakte, silhfênte ka awh ngai loh kha.

³⁴Hêng kutte hian kei leh ka ṭhiante châkkhai a deh chhuah ṭhin kha, nangni ngeiin in hria e.

³⁵Engkim ka tih apiangah ka tihhmuh ṭhin che u kha, chutianga thawk rim chung leh, Lalpa Isua thu hre reng chung chuan mi chak lote in ṭanpui tûr a ni; amah ngeiin, ‘Englo lâk aiin pêkin lukhâwng a nei zâwk,’ a tih kha,” a ti a.

³⁶Tin, chûng thu a sawi zawh chuan a ṭhingṭhi a, an zain a ṭawngṭaipui a.

³⁷Tin, an za chuan an ṭap zawih zawih a, Paula chu pawmin an fâwp ngawih ngawih a,

³⁸a hmêl an hmuh leh tawh loh tûr thu a sawi chu an lungngaihna ber a ni. Tin, lawng thleng chuan amah an thlah ta a.