Read Mizo_Old_version TIRHKOHTE THILTIH 21 Bible Online

TIRHKOHTE THILTIH 21 - Mizo_Old_version bible

TIRHKOHTE THILTIH 21

¹Tin, anni nên chuan kan inṭhen a, lawngin kan chhuak a, chumi hnuah chuan ngîl takin Kaw thliarkâr kan thleng a; tin, a tûkah Rhodi thliarkâr kan thleng leh a, chuta ṭang chuan kan kal zêl a, Patara khua kan thleng a;

²tin, Phoiniki rama kai tûr lawng pakhat kan hmu a, kan chuang a, kan kal ta zêl a.

³Tin, Kupra thliarkâr kan hmu a, vei lam chhawnin kan pêl a. Suria ram lamah kan kal zêl a, Tura khuaah chuan khawmualah kan chhuak ta rih a; chutah chuan lawnga bungrua thiar chhuah tûr a ni a.

⁴Tin, zirtîrhote kan zawng chhuak a, chutah chuan ni sarih kan châm a; tin, anni chuan Thlarau hrilhin, Paula hnênah Jerusalem khua tlawh loh tûr an ti a.

⁵Nimahsela, chûng ni zawhah chuan kan chhuak a, kan kal ta a, unaute chuan an zain, an nupui fanaute nên dai pâwn thlengin min thlah a; tin, tuifinriat kamah chuan kan ṭhingṭhi a, kan ṭawngṭai a.

⁶Tin, “Dam takin,” kan inti a, lawngah chuan kan chuang a; anni erawh chu an inah an haw leh ta a.

⁷Tin, Tura khua ata lawnga kan chhuah hnu chuan Ptolemai khua kan thleng a, unaute chibai kan bûk a, an hnênah ni khat kan châm a.

⁸Tin, a tûkah chuan kan chhuak a, Kaisari khua kan thleng a; tin, Chanchin Ṭha hriltu Philipa inah kan lût a, ani chu pasarihte zînga pakhat a ni a, a hnênah kan châm a.

⁹Chu mi chuan fanu pali a nei a, nula thianghlim an ni a, Pathian thu an hril ṭhîn a.

¹⁰Tin, chutah chuan ni tam tak kan châm a, chutih lai chuan Judai ram ata a hming Agaba, zâwlnei pakhat a lo chhuk a.

¹¹Tin, kan hnênah a lo kal a, Paula kâwnghrên a la a, a kete, a kutte amahin a inphuar a; tin, “ ‘Jerusalem khuaa Juda-te chuan hetiang hian he kâwnghrên neitu hi an phuar ang a, Jentailte kutah an pe bawk ang,’ Thlarau Thianghlimin a ti e,” a ti a.

¹²Tin, chûng thu chu kan hriat veleh keini leh chumi khuaa mite chuan, Paula chu Jerusalem khuaa han kal lo tûrin kan ngên chiam a.

¹³Paula chuan a chhâng a, “Eng in ti nge ni in ṭah in ṭaha, ka lung in tihchhiat? Lalpa Isua hming avâng chuan Jerusalem khuaa phuar chang ka huam lo va, thih pawh ka huam asin,” a ti a.

¹⁴Tin, thlêm rual a nih loh ahnu chuan, “Lalpa thu thu ni rawh se,” kan ti a, kan bâng ta a.

¹⁵Tin, chumi hnuah chuan kan bungrua kan siam a, Jerusalem khuaah kan han kal a.

¹⁶Kaisari khuaa mi zirtîrho tute emaw kan hnênah an kal ve a, anni chuan a hming Mnasona, zirtîr hmasa pâwl, Kupra thliarkâra mi pakhat, kan thlen in pa tûr chu an hruai ve a.

¹⁷Tin, Jerusalem khua kan thlen chuan unauten hlim takin min lo lâwm a.

¹⁸A tûkah chuan Paula hovin Jakoba hnênah kan lût a; chutah chuan kohhran upate zawng zawng pawh an awm a.

¹⁹Tin, Paula chuan anmahni chibai a bûk zawhin, a rawngbâwlna hmanga Pathianin Jentailte zînga thil a tihtîr apiang chu a kip a kawiin a sawi a.

²⁰Tin, unaute chuan chûng thu chu an hriatin Pathian an chawimawi a; tin, Paula hnênah chuan, “Unaupa, Juda-te zînga ringtute tamzia i hmu a; an zain Dân chungah ṭhahnem ang ngai bawk a;

²¹tin, nangin Jentailte zînga Juda awmte zawng zawng hnênah chuan, an fate serh tan loh tûr leh, dân anga awm loh tûr, tiin Mosia thlauhthlâkna tûr i zirtîr ṭhîn tih, mi kâ aṭangin i thu hi an hria a.

²²Engtin nge ni ta ang le? I lo thleng tih an hre dâwn ngei si a.

²³Chuvângin, i hnêna kan sawi ang hian ti ang che: Thutiam nei mipa pali kan hnênah an awm;

²⁴chûng mite chu hruai la, an hnênah inthian fai ve la, an lu an meh theih nân an tân sum sêng rawh; chutichuan, mi zawng zawngin mi ka aṭanga i thu an hriat apiang kha, tih tak a ni lo tih an hria ang a, nangmah ngei pawh Dân zâwmin fel takin i awm ve zâwk tih an hre dâwn nia.

²⁵Jentailte zînga ringtute chungchâng thu zawng, milem biakna thil ei kawngah te, sa thisen ei kawngah te, sa reh hlum ei kawngah te, inngaih kawngah te an inthiarfihlîm tûr a ni, tiin kan rêl a, kan ziak tawh kha,” an ti a.

²⁶Tin, a tûkah chuan Paulan mipate chu a hruai a, an hnênah a inthian fai ve a, Pathian biak inah chuan a lût a, an tâna sa talh ṭheuh tûr a pêksak hma loh chuan, inthen faina ni an nei rih dâwn tih puithiam hnênah a hrilh lâwk a.

²⁷Tin, ni sarih chu a tlin dâwn ruaiin, Asia rama Juda-te chuan Paula chu Pathian biak inah chuan an hmu a, mipui zawng zawng an fuihpawrh a, ani chu an man a,

²⁸an au va, “Israel mite u, min pui rawh u! He mi hi ram tinah mi zawng zawng hnênah Juda mi te, Dân te, he in te sawichhetu kha a nih hi; chu lo pawh, Pathian biak inah hian Grik mite pawh a luhpui a, he in thianghlim hi a tibawlhhlawh tawh a ni,” an ti a.

²⁹(Chumi hmain khuaah chuan Ephesi khuaa mi Trophima chu a hnênah an hmu a, Paulan chu mi chu Pathian biak inah a luhpui an ring a ni.)

³⁰Tin, a khuain an phu ta mur mur a, mite chu an tlân khâwm a; Paula chu an man a, Pathian biak in ata chu an hnûk chhuak a; kawngte chu an khâr ta nghâl a.

³¹Tin, ani chu tihhlum an tum lai chuan, Jerusalem khuaa mi zawng zawng an buai tih thu chu sipai pâwl hotu lal ber hnên a han thleng a,

³²Tin, ani chuan sipaite leh sipai za hotute a hruai ta nghal a, an hnênah a tlân chhuk a; tin, tin, anni chuan hotu lal ber leh sipaite chu an hmuh veleh Paula vuak an bâng ta a.

³³Tin, hotu lal ber chuan a rawn hnaih a, Paula chu a chelh a, khaidiat pahnih buntîr thu a pe a; tu nge a niha, eng nge a tih a zâwt a.

³⁴Tin, mipui zîngah chuan a ṭhen thu khatin an au va, a ṭhen thu dangin an au va; tin, bengchheng avângin a ngaihna a hre thei lo va, kulhbînga hruai luh thu a pe a.

³⁵Tin, Paulan kailâwn a thlen laiin, mipuiin an beih nasat avângin sipaiten ani chu an chawi kâng zêl a;

³⁶mi zawng zawngin, “Tiboral rawh u,” tia auvin an zui huai huai si a.

³⁷Tin, Paula chu kulhbîngah chuan an hruai luh dâwn laiin, ani chuan sipai hotu lal ber hnênah chuan, “I hnênah thu kam khat ka sawi thei ang em?” a ti a. Tin, ani chuan, “Grik ṭawng i hria elo?

³⁸Hmâna mite fuihpawrha, mihring phil hmangho sângli thlalêra hruai chhuaktu, Aigupta rama mi kha i ni lo vem ni?” a ti a.

³⁹Paula erawh chuan, “Juda mi, Kilikia rama Tarsa khuaa mi ka ni, khaw namêna awm ka ni lo; mi khawngaih la, mi zawng zawng hnênah thu mi hrilhtîr rawh,” a ti a.

⁴⁰Tin, a remtih veleh Paula chu kailâwnah chuan a ding a, mipui ngawih nân a kutin a zâp a; tin, an ngawih ṭhuap veleh Hebrai ṭawngin an hnênah: