Read Mizo_Old_version TIRHKOHTE THILTIH 22 Bible Online

TIRHKOHTE THILTIH 22 - Mizo_Old_version bible

TIRHKOHTE THILTIH 22

¹“Unaute u, pate u, tûnah in hnênah ka thiamna thu ka hrilh dâwn che u hi ngaithla rawh u,” a ti a.

²Tin, Hebrai ṭawngin an hnênah thu a sawi tih an hriat veleh an ngawi lehzual a; tin, ani chuan,

³“Juda mi ka ni a, Kilikia rama Tarsa khuaa piang ka ni; nimahsela, he khuaah hian Gamaliela ke bulah chuan zira sei lian ka ni, min thlahtute Dân awmze khermei tak chu zir ṭhîna awm ka ni, vawiina nangmahni zawng zawng ang tak hian Pathian tâna ṭhahnem bawk ṭhîn ka ni.

⁴Tin, he Kawnga mite hi tihlum hial khawpin ka tiduhdah ṭhîn a, a hmei a pain ka phuar a, tân inah ka khungtîr ṭhîn a.

⁵Puithiam lalber leh upate zawng zawng pawhin chûng thu chu mi hriatpui thei e, an hnên ata pawh unaute pêk atân lehkha ka hmuh kha; tin, Damaska khuaa awm apiang an hrem atân, phuar chunga Jerusalem khuaa hruai tûrin ka kal kha.

⁶“Tin, ka kal a, Damaska khaw kiang kan thlen chuan chawfâk hun laiin, thâwklehkhatan vân ata êng nasa tak ka vêlan a lo êng ta phut a;

⁷tin, leiah ka tlu a, ka hnênah, ‘Saula, Saula, nangin engati nge mi tihduhdah?’ tiin aw ka hria a.

⁸Tin, keiin, ‘Lalpa, tu nge i nih?’ tiin ka chhâng a. Tin, ani chuan ka hnênah, ‘Nazareth Isua, i tihduhdah hi ka ni,’ a ti a.

⁹Tin, ka ṭhiante chuan êng chu an hmu na a, mi betu aw erawh chu an hre lo.

¹⁰Tin, keiin, ‘Lalpa, eng nge ka tih ang?’ ka ti a. Tin, Lalpa chuan ka hnênah, ‘Tho la, Damaska khuaah lût rawh; thil zawng zawng i tih tûra ruat apiang an hrilh ang che,’ a ti a.

¹¹Tin, chu êng ropui avâng chuan khua ka hmu thei ta lo va, ka ṭhianten kutin mi kai a, Damaska khuaah ka lût ta a.

¹²“Tin, mi pakhat, Anania, Dân kawnga Pathian ngaihsak leh chuta Juda awm zawng zawng hnêna hmingṭha chu,

¹³ka hnênah a lo kal a, ka kiangah a ding a, ka hnênah, ‘Ka nau Saul, mit vâr nei rawh,’ mi ti a. Tin, chumi lai tak chuan amah ka han hmu ta a.

¹⁴Tin, ani chuan, ‘Min thlahtute Pathianin a duh zâwng hriaah leh Mi Feltaka chu hmua, a ṭawngkâ hriaah pawh a ruat tawh che a.

¹⁵I hmuh leh i hriat thu-ah khân mi zawng zawng hnênah ama thu hretu i ni ang.

¹⁶Tin, engati nge i la awm reng le? Tho la, ama hming lam chungin baptisma chang la, i sualte tlêng fai ta che,’ mi ti a.

¹⁷“Tin, Jerusalem khuaah hian ka hâwn leh hnuin, Pathian biak ina ka ṭawngṭai laiin englovin mi zêl a;

¹⁸tin, ‘Hmanhmawh la, Jerusalem khua ata chhuak rawh; ka chanchin i hril tûr chu an pawm dâwn loh hi,’ a mi tih lai ka hmu a.

¹⁹“Tin, keiin, ‘Lalpa, inkhâwmna in tina a ringtu che apiang tân inah ka khunga, ka vuak ṭhin kha an hre si a;

²⁰tin, i thu hretu Stephana thisen an chhuah lai khân kei pawh a kiangah ka ding a, ka lo remti a, a tihlumtute puante ka vêng hlawm bawk a ni,’ ka ti a.

²¹“Tin, ani chuan, ‘Kal rawh, heta ṭanga hla taka Jentailte hnênah ka tîr zâwk ang che,’ mi ti ta a,” a ti a.

²²Tin, chu thu thleng chuan an ngaithla a; tin, aw ring takin, “Mi hetiang nek hi khawvêl ata tiboral rawh u; nung tui a ni lo ve,” an ti ta a.

²³Tin, an au va, an puante an hlîp a, an paih a, vaivut an vânvawrh a;

²⁴chutichuan, sipai hotu lal ber chuan Paula chu kulhbîng chhûnga hruai luh thu a pe a, a chungah chuti êma an au chhan chu hriat nân vuak chunga chhâl tûrin a ti a.

²⁵Tin, savun hruia an phuar belhbawm zawhin, Paulan a kianga ding sipai za hotu hnênah chuan, “Rom mi rêng rêng in vaw thei em ni, thiam loh chantîr hnu pawh ni si lo lehnghâl?” a ti a.

²⁶Tin, sipai za hotu chuan chu chu a hriat veleh, sipai hotu lal ber hnênah chuan a kal a, “I thiltih tûr hi fîmkhur teh khai! He mi hi Rom mi a lo ni e,” a ti a, a hrilh a.

²⁷Tin, sipai hotu lal ber chu a lo kal a, a hnênah, “Rom mi i ni maw? Mi hrilh rawh,” a ti a. Tin, ani chuan, “Ni e,” a ti a.

²⁸Tin, sipai hotu lal ber chuan, “Chumi khaw mi ni tûrin kei zawngin tangka tam tak ka sêng asin,” a ti a, a chhâng a. Tin, Paula chuan, “Kei zawng Rom mi rênga piang ka ni,” a ti a.

²⁹Tichuan, nghaisa chunga chhâl tumte chuan ani chu an kalsan ta nghâl a; sipai hotu lal ber pawhin Rom mi a ni tih a hriat chuan a hlau va, a phuar avângin a hlau bawk a.

³⁰Tin, a tûkah chuan Juda-ten eng vângin nge Paula an hêk tih hriat fel tumin, sipai hotu lal ber chuan ani chu a phelh a, puithiam lalte leh rorêltu zawng zawngte inkhâwm tûr thu a pe a, Paula chu a hruai chhuak a, an hmaah a dintîr ta a.