Read Mizo_Old_version TIRHKOHTE THILTIH 23 Bible Online

TIRHKOHTE THILTIH 23 - Mizo_Old_version bible

TIRHKOHTE THILTIH 23

¹Tin, Paula chuan rorêltute chu a en reng a, “Unaute u, vawiin thlengin Pathian mit hmuha ṭha lama ka hriat apiang tiin ka awm ṭhîn e,” a ti a.

²Tin, puithiam lalber Anania chuan Paula kianga dingte hnênah a kâa bensak tûrin a ti a.

³Tin, Paula chuan a hnênah, “Nang, lung pal hnawih vâr pa, Pathianin a bêng zâwk ang che; nang, Dân anga mi ngaihtuah tûrin i ṭhu a, Dân lo anga mi ben tûr i ti vei a ni maw?” a ti a.

⁴Tin, a kianga miten, “Pathian puithiam lalber i hau vei maw?” an ti a.

⁵Tin, Paulan, “Unaute u, puithiam lalber a ni tih ka hre lo a ni: ‘I chipuite hotu chungah thu ṭha lo sawi suh,’ tih pawh ziak a ni si a,” a ti a.

⁶Tin, Paulan a ṭhen Saddukaite, a ṭhen Pharisaite an ni tih a lo hriatin rorêltute zîngah chuan a au va, “Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhâlin ka awm a nih hi,” a ti a.

⁷Tin, chu chu a sawi zawh chuan Pharisaite leh Saddukaite chu an inhnial a, rorêltute chu an inkhing ta a.

⁸(Saddukaiten, “Mitthi thawhlehna rêng a awm lo, vântirhkohte, thlaraute pawh a awm hek lo,” an ti ṭhîn; Pharisaite erawh chuan chumi kawng pahnih chu a awm tih an awih si a.)

⁹Tichuan, nasa takin an buai ta a; Pharisaite lama mi lehkhaziaktu ṭhenkhat an ding a, an hnial a, “He mi hi eng mah a sualna kan hre lo ve; thlarau pawhin, vântirhkoh pawhin ani hi bia pawh ni sela, eng nge pawi ang?” an ti a.

¹⁰Tin, an inhnial nasat deuh deuh avângin, sipai hotu lal ber chuan Paula chu an pawh sawm a hlau va, sipaite hnênah, zuk kala an zîng ata kulhbînga hruai chho lui tûrin a ti a.

¹¹Tin, a zânah chuan Lalpa chu Paula kiangah a ding a, “Thlamuang takin awm rawh, Jerusalem khuaa ka thu i hriattîr ang bawk hian Rom khuaah pawh i hriattîr tûr a ni,” a ti a.

¹²Tin, ni a chhuahin Juda-te an ṭang rual a, Paula an thah hma loh zawng eng mah eia bâr lo tûrin chhia an chham a.

¹³Chumi thu phiartute chu sawmli aia tam an ni.

¹⁴Tin, anni chu puithiam lalte leh upate hnênah an kal a, “Paula kan thah hma loh zawng eng mah tem lo tûrin chhia kan chham ta vek a ni.

¹⁵Chuvângin, nangnin, rorêltute nên a thu fel lehzuala ngaihtuah tum angin, in hnêna hruai thla tûrin sipai hotu lal ber hnênah pehhêl deuhvin han sawi rawh u; in kiang hnai a thlen hma pawhin, keini amah that tûrin kan inpeih reng e,” an ti a.

¹⁶Nimahsela, Paula farnua fapain an chân thu chu a lo hria a, kulhbîngah chuan a va lût a, Paula chu a va hrilh a.

¹⁷Tin, Paula chuan sipai za hotu pakhat a ko va, “He tlangvâl hi hotu lal ber hnênah chuan hruai rawh; a hnênah thu eng emaw sawi tûr a nei a ni âwm e,” a ti a.

¹⁸Chutichuan, sipai hotu lal ber hnênah chuan a va hruai a, “Paula, mi tâng khân mi ko va, he tlangvâl hi i hnêna rawn hruai tûrin mi tîr a, i hnênah thu eng emaw sawi tûr a nei a ni âwm e,” a ti a.

¹⁹Tin, sipai hotu lal ber chuan a kutah a chelh a, a kal hranpui a, a rûkin, “Eng nge mi hrilh tûr i neih chu?” tiin a zâwt a.

²⁰Tin, ani chuan, “Paula thu chu fel lehzual deuhva i ngaihtuah tûr angin, naktûkah rorêltute hnêna hruai chhuk tûrin Juda-ten dîl che an remti tlâng a.

²¹Nimahsela, an thu lo awih suh ang che; an zînga mi sawmli aia tamin an châng reng a, chûng mite chuan amah an thah hma loh chu eng mah eia bâr lo tûrin chhia an chham a; tûnah hian i thu nghâkin inpeih sain an awm reng a ni,” a ti a.

²²Tin, sipai hotu lal ber chuan tlangvâl chu a kaltîr a, “Hêng thu hi mi lo hriattîr tawh tih tu mah hrilh suh ang che,” a ti tlat a.

²³Tin, sipai za hotu pahnih a ko va, “Zân mut reh hunah Kaisari khaw thlenga kal tûrin sipai zahnih nên, sakawr chung chuang mi sawmsarih nên, fei keng mi zahnih nên siam rawh u,” a ti a;

²⁴tin, ram awptu Felika hnênah chuan him taka an thlentîr theih nân, Paula an chuantîrna tûrin sate lo siam tûr a ti bawk a.

²⁵Tin, hetiang hian lehkha a ziak a:

²⁶“Klaudia Lusian Felika, ram awptu ṭha ber chibai a bûk e.

²⁷“He mi hi Juda-ten an mana, an thah dâwn laiin an hnênah sipaite hruaiin ka kal a, Rom mi a ni tih ka hria a, ka chhanchhuak ta a.

²⁸Tin, an hêkna chhan hriat ka duh a, an rorêltute hnênah ka hruai chhuk a;

²⁹chutichuan, an dân thu engahte emaw hêk a ni tih ka hria a; nimahsela, an hêkna thu-ah thihna leh phuarna khawp meuh tûrin eng mah ka hre si lo.

³⁰Tin, Juda-ten amah an châng tih miin min hriattîr veleh i hnênah ani hi ka rawn tîr ta nghâl a ni, a hêktute pawh a chunga thupawi an neih apiang i hmaa sawi tûrin thu ka pe bawk a,” tiin.

³¹Chutichuan, sipaite chuan a thupêk ang chuan Paula chu a zân a zânin an hruai a, Antipatri khua an thlenpui a.

³²Tin, a tûkah chuan sakawr chung chuang mite chu a hnêna kal zêl tûrin an kîrsan a, kulhbîngah chuan an kal leh ta a;

³³tin, anni chuan Kaisari khua chu an thleng a, ram awptu hnênah lehkha chu an pe a, Paula pawh a hmaah an dintîr a.

³⁴Tin, ram awptu chuan a chhiar zawhin Paula awmna ram a zâwt a. Tin, Kilikia rama mi a ni tih a hriat veleh,

³⁵“A hêktu che pawh chu an lo thlen hunah i thupawi ka ngaihtuah ang,” a ti a. Tin, Heroda inah vên tûr thu a pe a.