Read Mizo_Old_version TIRHKOHTE THILTIH 24 Bible Online

TIRHKOHTE THILTIH 24 - Mizo_Old_version bible

TIRHKOHTE THILTIH 24

¹Tin, ni nga chinah puithiam lalber Anania a lo thleng chhuk a, upa tute emaw nên, a hming Tertulla, thusawi thiam pakhat nên; tin, Paula chunga thupawi chu ram awptu hnênah an sawi a.

²Tin, Paula chu an koh chhuah hnu chuan Tertulla chuan amah a hêk ṭan a: “Felik ṭha ber, nangma zârah thlamuang êm êmin kan awm avâng leh, i enkawl avânga he chite tân hian sualte khap ṭhatin a awm ṭhin avângin,

³kumkhuain khawiah pawh lungawi takin kan lâwm ṭhîn.

⁴Amaherawhchu, i tân ninawm lutuk nih ka duh lo va, i nunnêmnain thu kam khat erawh chu mi ngaihthlâksak tûrin ka ngên a che.

⁵He mi hi mi huatthlala tak, khawvêla Juda-teho zawng zawng chawk buaitu leh Nazareth mite pâwla an tupa ber pakhat a nih kan hria a;

⁶Pathian biak in tihbawlhhlawh a tum bawk a; chuvângin, kan man a, [1]

⁸nangmah ngeiin chhuahchhâlin kan hêkna thil zawng zawng hi ama lakah i hre thei ang,” a ti a.

⁹Tin, Juda-te pawh chuan, “Chûng thu chu chutiang chu a ni,” tiin an ṭanpui ve a.

¹⁰Tin, ram awptu chuan thu sawi tûra Paula chu kuta a zah veleh Paula chuan, “Nang, kum tam tak he chite rorêlsaktu hi i nih ka hriat avângin, lâwm takin ka thiamna thu ka sawi dâwn hi.

¹¹Jerusalem khuaah Pathian be tûrin ka han kal achin chu, ni sâwm leh ni hnih lo liam a la ni lo vang tih i la hre thei ang;

¹²Pathian biak inah pawh, inkhâwmna inahte pawh, khuaah pawh tu mah ka hnial leh mipui ka fuihpawrh annin min hmu hek lo;

¹³tûnah pawh an mi hêkna thu hi i hriatah a bul an chhui chhuak thei hek lo vang.

¹⁴Nimahsela, he thu hi i hnênah ka inpuang ang, ‘pawl hrang’ an tih Kawng dân angin min thlahtute Pathian ka be ṭhîn. Dân leh Zâwlneite Lehkhabua ziak zawng zawng ringin;

¹⁵tin, mi felte leh fel lote thawhlehna a awm ang tih Pathian lamah ka beisei a, hênghote pawh hian chûng chu an awih ve bawk si a;

¹⁶chumi avâng chuan Pathian hnên lamah leh mihring hnênah pawh, rilru sual lo mawlh hi vawn ka tum fo ṭhîn.

¹⁷Tin, kum tam tak hnuah hian, Jerusalem-a ka chipuite hnênah thilpêk tûr leh sa talh tûr rawn kengin ka lo kal a;

¹⁸tin, chûng thil ka pêk lai chuan mipui tel lovin, bengchheng lovin, Pathian biak inah thianghlimin min hmu a.

¹⁹Nimahsela, chutah chuan Asia rama mi Juda tute emaw an awm kha, chûngte chuan ka chungah thu an neih chuan hetah hian i hmaa awmin min hêk tûr a ni.

²⁰A nih loh leh, hêng mite ngei hian rorêltute hmaa ka din lai khân, ka tihsual eng nge an hmuh sawi rawh se,

²¹he thu kam khat avâng hian a nih nghâl loh chuan, an zînga dingin, ‘Mitthi thawhlehna thu-ah vawiinah hian in hmaah chhuahchhalhin ka awm a nih hi,’ ka tih kha,” a ti a, a chhâng a.

²²Tin, Felika chuan Kawng thu chu a lo hre hle tawh a, “Sipai hotu lal ber Lusia chu a lo thlen thlâk hunah in thu ka la rem ang,” tiin thu chu a dah ta rih a.

²³Tin, Paula chu duat deuhva, a ṭhiante rawngbâwlsak khap lova, vêntîr tûrin sipai za hotu hnênah chuan thu a pe a.

²⁴Tin, ni eng zât emaw chinah Felika chu a lo kal leh a, a nupui Drusilli, Juda hmeichhia nên, Paula chu a kohtîr a, Krista Isua rinna thu chu a ngaithla a.

²⁵Tin, Paula chuan felna thu te, insûm thu te, rorêlna lo la awm tûr thu te khûn taka a hrilh laiin Felika chuan hlauhawm a ti êm a, “Kal leh ta rih rawh, hun remchâng ka neih hunah ka ko vang che,” a ti a.

²⁶Paulan tangka a pêk a beisei bawk a; chuvângin, a ko zing deuh va, a be ṭhîn a ni.

²⁷Nimahsela, kum hnih a vei hnu chuan Porkia Festan Felika chu a thlâk ta a; tin, Felika chuan Juda-te zîngah hmingṭhat a duh a, Paula chu phuar sain a hnutchhiah ta a.