Read Mizo_Old_version TIRHKOHTE THILTIH 25 Bible Online

TIRHKOHTE THILTIH 25 - Mizo_Old_version bible

TIRHKOHTE THILTIH 25

¹Chutichuan, Festa chuan ram chu a awp ta a; tin, ni thum chinah Kaisari khua aṭang chuan Jerusalem khuaah a han kal a.

²Tin, puithiam lalte leh Juda puipate chuan a hnênah Paula chungchâng thu chu a chhe lamin an lo hriattîr a;

³Jerusalem khuaa han hruaitîr tûrin khawngaihna an lo ngên chiam bawk a; kalkawnga lo châna thah an tum a.

⁴Nimahsela, Festa chuan, “Paula chu Kaisari khuaah an vêng reng a ni, kei pawh rei lo têan ka haw dâwn e.

⁵Chuvângin, chu mi chuan sualna a neih chuan, in zînga thunei apiangin mi zui thla sela, hêk rawh se,” a ti a, a chhâng a.

⁶Tin, an zîngah chuan ni riat emaw, ni sâwm emaw lo liam chu a châm lo va, Kaisari khuaah a haw thla ta a; tin, a tûkah chuan rorêlna ṭhutphahah a ṭhu a, Paula chu rawn hruai tûrin thu a pe a.

⁷Tin, ani chu a lo thlen chuan Jerusalem khuaa mi Juda lo chhukte chu a vêlah an ding a, a chungah thupawi tam tak, rit tak tak an sawi an sawi a, a bul erawh chu an chhui chhuak thei si lo va.

⁸Tin, Paula chuan a thiamna thu a sawi a, “Juda-te dân chungchângah te, Pathian biak in thu-ah te, Kaisara chungah te pawh thil rêng rêng ka tisual lo ve,” a ti a.

⁹Nimahsela, Festa chuan Juda-te zînga hmingṭhat a duh a, Paula hnênah chuan, “Jerusalem khuaa han kala, khitah ka hmaa hêng thu hi rêl i duh em?” a ti a, a chhâng a.

¹⁰Paula erawh chuan, “Kaisara rorêlna ṭhutphah hmaa ro mi rêlsakna tûrah hian ka din hi; Juda-te chungah thil eng mah ka tisual lo, nang pawhin chu chu i hre chiang hle si a.

¹¹Mi sual ka niha, thihna khawp meuh thil ti ka nih chuan thih pawh ka hnial lo ve; nimahsela, hêngho min hêkna thil hi a bul eng mah a awm loh chuan, tu mahin an hnênah min pe thei lo vang. Kaisara hnênah ka thlen ang,” a ti a.

¹²Tin, Festa chuan a rorêlpuite a biakrâwn zawhin, “Kaisara hnênah thlen i tum vei a, Kaisara hnênah i kal mawlh ang chu,” tiin a chhâng a.

¹³Tin, ni eng zât emaw chinah chuan, Lal Agrippa leh Berniki chuan Kaisari khua an lo thleng a, Festa chibai an bûk a.

¹⁴Tin, ni tam tak chutah chuan an châm avângin, Festa chuan Paula thupawi chu lal hnênah chuan a sawi a, “Felika khân mi tâng tu emaw a hnutchhiah a;

¹⁵Jerusalem khuaa ka awm lai khân puithiam lalte leh Juda upaten a chungchâng thu min hrilh a, thiam loh chantîr an ngên a.

¹⁶Tin, keiin an hnênah, ‘An hêka leh a hêktute an inhmatawna, an hêkna kawngah a thiamna thu sawi vena remchâng a hmuh hma loh chuan, mi rêng rêng hrem tûra thlah hi Rom khuaa mi dân a ni lo ve,’ tiin ka chhâng a.

¹⁷Tin, heta an lo thlenin, rei rial lovin a tûkah chuan rorêlna ṭhutphahah ka ṭhu a, chu mi chu han hruai tûrin thu ka pe a.

¹⁸Tin, a hêktute an din laiin, ka rin ang rêngin a chungah sualna thupawi eng mah rêng an sawi si lo va;

¹⁹an sakhaw dânte leh Isua, mi pakhat thi tawh, Paula chuan, ‘A nung leh a ni,’ tiin a sawi a, chutih avâng chuan a chungah thubuaite an nei a lo ni zâwk a.

²⁰Tin, keiin chûng thute chu ngaihtuah ngaihna rêng ka hre lo va, Jerusalem khuaa kala, khita a chûngthu chu rêlsak a duh leh duh loh ka zâwt a.

²¹Nimahsela, Paula chuan lalber rêla khêk a ngên ta zâwk a; chuvângin, Kaisara hnêna ka kaltîr theih hma loh chuan vêng tûrin thu ka pe a,” a ti a.

²²Tin, Agrippa chuan Festa hnênah chuan, “Kei pawh chu mi thusawi chu ngaihthlâk ka lo duh fo rêng a ni,” a ti a. Tin, ani chuan, “Naktûkah a thusawi i ngaithla ang chu,” a ti a.

²³Chutichuan, a tûkah chuan Agrippa leh Berniki chu ropui takin an lo kal a, thusawina inah an lo lût a, sipai hotu liante nên, khuaa mi ṭha deuh deuhte nên; tin, Festa thuin Paula chu an rawn hruai luhtîr a.

²⁴Tin, Festa chuan, “Lal Agrippa leh heta kan zînga awm zawng zawngte u, he mi in hmuh hi a ni, a chungchâng thua Juda-te zawng zawngin an zain nung tawh lo tûr, tia auva Jerusalem khuaah leh heta min biakna kha.

²⁵Nimahsela, thihna khawp meuhvin eng mah a ti lo tih ka hria a; tin, amahin Lalber hnêna thlen a tum avângin tirh ka tum a ni;

²⁶nimahsela, a thu mumal eng mah ka lal hnênah ziak tûr ka hre si lo va. Chuvângin, in hmaah ka rawn hruai chhuah hi, Lal Agripp, nangma hmaa rawn hruai bîk deuh ka ni e, chhuahchhâl zawha eng emaw tal ziak tûr ka hmuh theih nân.

²⁷Mi tâng lalber hnêna tirha, a chunga an hêkna thu hriat teltîr loh chu âtthlâk niin ka hre si a,” a ti a.