Read Mizo_Old_version TIRHKOHTE THILTIH 26 Bible Online

TIRHKOHTE THILTIH 26 - Mizo_Old_version bible

TIRHKOHTE THILTIH 26

¹Tin, Agrippa chuan Paula hnênah chuan, “I thiamna thu i sawi thei e,” a ti a. Tin, Paula chuan a kut a phar a, a thiamna thu a sawi a;

²“Lal Agripp, Juda-ten mi hêkna zawng zawnga ka thiamna thu vawiinah hian i hmaa ka sawi dâwn avâng hian lâwmin ka inhria;

³hei hi ka lâwmna ber a ni, Juda-te zîngah dân leh thubuai zawng zawng kawnga i fin ngawt avângin; chuvângin, muang taka mi ngaihthlâksak tûrin ka ngên a che.

⁴A tîra ka naupan lai ata ka chite zîngah leh Jerusalem khuaa ka awm dân kha, Juda zawng zawngin an hria e;

⁵a tîr ata ka chanchin an hria e, khatia kan sakhaw pâwl khermei ber dân pangngaia Pharisaia ka awm kha, an duh chuan mi sawipui thei a ni.

⁶Tin, Pathianin min thlahtute hnêna thu a tiam kha beisei kawng thu-ah, hetah tûnah rorêlsaka ka din hi;

⁷chu thutiam chu kan hnam sâwm leh hnam hnihin, a chhûn a zâna Pathian rawng ṭhahnemngai taka bâwlin hmuh an beisei ṭhîn. Aw lalpa, chumi beisei thu avâng chuan Juda-ten mi hêk a nih hi.

⁸“Pathianin mitthite a kaitho tih hi engati nge awihawm lohva in ruat ni?

⁹Kei pawhin Nazareth Isua hming kalh lamin thil tam tak ti ila ṭhain ka lo ring ṭhîn a.

¹⁰Chu ang chu Jerusalem khuaah ka ti bawk ṭhîn a; tin, puithiam lalte hnên aṭangin thu ka hmu a, mi thianghlimte zînga mi tam tak tân inahte ka khung bawk ṭhîn a; an tihhlum laiin tihhlum remti lamah ka ṭang bawk ṭhîn.

¹¹Tin, inkhâwmna in tinah ka hrem fo va, Isua thu sâwttîr ka tum hrâm ṭhîn a; tin, an chungah ka kawlh êm êm a, ram dang khaw thleng pawhin ka tiduhdah ṭhîn.

¹²“Chutiang ti tûr chuan puithiam lalte thu hmu leh, an tirhna lehkha kengin Damaska khuaah ka kal a;

¹³tin e, lalpa, ka kal laiin chawfâk hun a ni a, vân ata êng eng emaw, ni êng aia êng zâwk, keimah leh ka kalpuite vêlah êngin ka hmu a.

¹⁴Tin, kan zain leiah kan tlu a, Hebrai ṭawngin, ‘Saula, Saula, nangin engati nge mi tihduhdah? Chhunna tiang khen i tân a na e,’ mi tiin aw ka hria a.

¹⁵“Tin, keiin, ‘Lalpa, tu nge i nih?’ ka ti a. “Tin, Lalpa chuan, ‘Isua, i tihduhdah hi ka ni;

¹⁶nimahsela, tho la, ding rawh; hêng i thil hmuhte leh i hnêna ka la inlârna tûr thilte nên, chumi rawngbâwlah leh hretua siam tûr chein i hnênah ka rawn inlâr a nih hi;

¹⁷mi zawng zawng leh Jentailte kut ata ka chhanhim ang che, an mit tivâr tûrin an hnênah ka tirh che hi;

¹⁸chutichuan, thim chu êng lamah an hawisan ang a, Setana thuneihna chu Pathian lamah an hawisan ang, sual ngaihhnathiamna an hmuh nân leh, min rin avânga thianghlim tawhte zînga ro chan an neih nân,’ a ti a.

¹⁹“Chuvângin, Lal Agripp, vâna mi inlâra chu ka hnial lo va,

²⁰a tîrin Damaska khuaa mite hnênah, chumi hnuah chuan Jerusalem khuaa mite hnênah te, Judai ram tina mite hnênah te, Jentailte hnênah te pawh, sim hming pu tlâka thil tia, sima Pathian lam an hawina tûrin ka hril zâwk ṭhîn a ni.

²¹Chûng avâng chuan a ni Juda-ten Pathian biak inah min mana min tihhlum an tum tâk ni.

²²Nimahsela, Pathian hnên aṭanga ṭanpuina ka hmuh avângin, vawiin thlengin mi tête leh mi liante hnêna thu hriattîrin ka la awm reng a, zâwlneite leh Mosian lo thleng tûr an tih thu chauh lo chu thu dang sawi lovin;

²³khatia, ‘Kristan hrehawm a tuar ang a; tin, mitthi zîng ata a thawhleh avângin, mi zawng zawng hnênah leh Jentailte hnênah pawh êng hmuhtîrtu hmasa ber a ni ang,’ an tih thu kha,” a ti a.

²⁴Tin, chutianga a thiamna thu a sawi lai chuan Festa chuan aw ring takin, “Paula, i â a ni; i zir tamnain a tiâ che a nih hi,” a ti a.

²⁵Nimahsela, Paula chuan, “Festa ṭha ber, ka â lo asin; thu dik tak leh thu fing tak ka sawi zâwk a nih hi.

²⁶Hêng thu hi lal hian a hria alâwm, a hnênah pawh hlau lovin ka sawi hi; hêng thil hi eng mah a hnênah zêp a ni lo tih dik takin ka hria e; hêng hi in kila tih a ni si lo.

²⁷Lal Agripp, zâwlneite thu i awih em? I awih tih ka hria e,” a ti a.

²⁸Tin, Agrippa chuan Paula hnênah, “Rei lo tê chauh thlêma Kristiana mi siam i tum a nih hi!” a ti a.

²⁹Tin, Paula chuan, “Rei sela, rei suh sela, nang chauh ka ti lo, vawiina ka thu hretu zawng zawng pawh hi, keimah anga awm atân Pathian hnênah ka dîl a ni, kawlte hi erawh chu bun ve lovin,” a ti a.

³⁰Tin, lal nên, ram awptu nên, Berniki nên, an hnêna ṭhute nên chuan an tho hlawm a;

³¹tin, an kal hrang a, an inbia a, “He mi hian thihna leh kawl bunna khawp meuh thil eng mah a lo tih loh hi,” an ti a.

³²Tin, Agrippan Festa hnênah, “He mi hian Kaisara hnêna thlen lo tiam tawh suh sela chuan a chhuak mai tûr,” a ti a.