Read Mizo_Old_version TIRHKOHTE THILTIH 27 Bible Online

TIRHKOHTE THILTIH 27 - Mizo_Old_version bible

TIRHKOHTE THILTIH 27

¹Tin, Itali rama lawnga kan kal tûr thu an tihtlûk veleh, Paula leh mi tâng dang tute emaw, Augusta pâwla mi sipai za hotu, a hming Julia an kawltîr a.

²Tin, Adramutteno khaw lawng, Asia ram tuifinriat kama khaw awmte tlawh tûrah chuan kan chuang a, tuifinriatah kan kal ta a; Makedonia rama mi Aristarka, Thessalonika khuaa mi kan hnênah a awm a.

³Tin, a tûkah Sidon khua kan tlawh a. Tin, Julia chuan Paula a tiṭha hle a, intiharh tûrin a ṭhiante hnênah a lêntîr a.

⁴Tin, chuta ṭang chuan tuifinriatah kan kal leh a, thliin a ni lo lamah min nem avângin, Kupra thliarkâr phên thli ûp lamah kan kawi a.

⁵Tin, Kilikia ram leh Pamphulia ram dep tuifinriat kan pelh hnuin, Lukia rama Mura khua kan thleng a.

⁶Chutah chuan sipai za hotu chuan Aleksandria khaw lawng, Itali ram tlawh tûr chu a hmu a; chumiah chuan min chuantîr a.

⁷Tin, ni rei tak zawi zawiin kan kal a, harsa takin Knido khaw zâwn kan thleng hrâm hrâm a, thliin min hnar avângin Salmoni hrûla Kret thliarkâr phên thli ûp lamah kan kawi a;

⁸tin, harsa takin vaukam kan hrût a, Litengsâwl Mawi an tih hmun chu kan thleng ta a; chumi kiangah chuan Lasai khua a awm.

⁹Tin, ni tam tak a ral tawh avâng leh lawnga kal a hlauhawm tawh avângin, (Chaw nghei ni chu a lo pêl tawh si a) Paula chuan anni chu a zilh a,

¹⁰an hnênah, “Pute u, lawnga tûna kal hian chhiatna leh boralna nasa tak a thleng dâwn tih ka hria e, a sum leh lawng chungah chauh ka ti lo va, keimahni chungah pawh ka ti a ni,” a ti a.

¹¹Nimahsela, sipai za hotu chuan Paula thusawi ai chuan lawngpu leh lawng neitu thu a awih zâwk a.

¹²Tin, thlasik tuar nân litengsâwl chu a rem loh avângin, a tam zâwkin chuta ṭanga tuifinriata kal chhuaha, Phoiniki khua thlen hrâma, chuta thlasik tuar chu an rawtpui a; Phoiniki chu Kret thliarkâra litengsâwl pakhat a ni a, hmârchhak leh chhimchhak chhawng a ni.

¹³Tin, chhim thli chu zawi zawia a lo tleh veleh chuan, an duh zawng an hmu em maw an ti a, thîrchakai chu an khai chhuak a, Kret thliarkâr kam chu an hrût an hrût a.

¹⁴Nimahsela, rei lo te achinah chuan khawmual lam aṭang chuan thli na tak a lo tleh chhuk ta a, chu thli chu Eurakuilo an ti ṭhîn a.

¹⁵Tin, lawng chu a rawn nam fuh a, thli lam a hawi theih loh veleh an thlah ta a, min lên min lên ta mai a.

¹⁶Tin, a hming Kauda, thliarkâr tê tak tê phên thli ûp lamah kan kawi a, harsa takin lawnglêng chu kan hum thei hrâm a;

¹⁷tin, an kaih chhuah hnuin chhanna hruite an hmang a, lawng hnuai lamah an la vêt a, an phuar a; tin, puanzârna engkim an titlu a; chuti lo chuan, litengsâwl Surti an tiha len luh an hlau va; chutichuan, min lên min lên ta a.

¹⁸Tin, a tûkah chuan tuifâwnin min vawrh nek avâng chuan lawnga bungrua chu tuiah an paih ṭan ta a.

¹⁹Tin, a tûk lehah anmahni kut meuhvin lawng bungrua an paih chhuak leh ta a.

²⁰Tin, ni rei tak, ni pawh, arsi pawh a lang lo va, thlipui namênin min nuai lo va, nun rêng kan beisei tawh lo.

²¹Tin, chaw ei lova rei tak an awm hnuin, an zîngah Paula a ding a, “Pute u, Kret thliarkârah khân phelh lovin, ka thu kha awiha hêng chhiat leh boralna hi thlen lo tûr in ni na a le.

²²Nimahsela, tûnah pawh hian thlamuang taka awm tûrin ka fuih a che u; in zîngah tu mahin nunna in hloh dâwn lo ve, lawng erawh hi chu a bo dâwn a ni.

²³A ta ka ni a, a rawng ka bâwl ṭhin Pathian kha, chu mi vântirhkoh pakhat nizân khân ka kiangah a lo ding a, ka hnênah,

²⁴‘Paula, hlau suh, Kaisara hmaah i ding tûr a ni; tin, ngai rawh, lawnga i hnêna kal zawng zawngte pawh hi Pathianin a pe a che,’ mi ti a ni.

²⁵Chuvângin, pute u, thlamuang takin awm rawh u; Pathian ka ring e, mi hrilh ang zêlin a awm dâwn.

²⁶Nimahsela, thliarkâr engah emaw min lên chhuak tûr a ni,” a ti a.

²⁷Tin, Adria tuifinriatah thliin lehlam lehlamah min lên min lên a, zan sâwm leh zan li a tlin zân chuan, zanlaiah emaw, lawng mite chuan khawii khawmual emaw thleng dâwnin an inhria a;

²⁸chutichuan, tui thûk lam an teh a, hlam sawm leh hlam ngain an hria a; tin, rei lo têah an teh leh a, hlam sâwm leh hlam ngain an hria a.

²⁹Tin, lawng mei lamah thîrchakai pali an thlâk a; chuti lo chuan, lung chhe hmunah min lên chhuak hlauh dah ang e, tih an hlau va; tin, khawvâr hlân an nghâkhlel hle mai a.

³⁰Tin, lawng mite chuan lawng hnâr lamah thîrchakaite thlâk tûr anga tiderin, lawnglêng chu tuifinriatah an thlâk a, lawng chu tlânsan an tum a.

³¹Chutih lai chuan Paula chuan sipai za hotu leh sipaite hnênah chuan, “Hêngho hi lawnga an awm reng loh chuan in him thei lo vang,” a ti a.

³²Tichuan, sipaite chuan lawnglêng hruite chu an zai chat a, an thlah ta a.

³³Tin, khawvâr dâwn lai chuan Paula chuan mi zawng zawng chu chaw eiah a tîr a, “Vawiin hi ni sâwm leh ni li a ni tawh, eng mah ei lovin in nghâk a, in nghei reng a ni.

³⁴Chuvângin, chaw ei atân ka tîr chiam a che u; in damna tûr a nih hi; in zîngah tu ma samzai pakhat mah a boral lo vang,” a ti a.

³⁵Tin, chu thu chu a sawi zawhin chhang a la a, mi zawng zawng hmaah Pathian hnênah lâwm thu a sawi ta a; tin, a phel a, a ei ṭan ta a.

³⁶Tichuan, anni pawh thlamuang takin an awm a, chaw an ei ve ta a.

³⁷Tin, lawnga mi chu kan zain zahnih leh sawmsarih leh paruk kan ni a.

³⁸Tin, an ei kham chuan buh chu tuifinriatah an paih a, lawng chu an tizâng deuh va.

³⁹Tin, nî a chhuah chuan khawmual chu khawii lai nge a nih an hre lo va; nimahsela, khawii litengsâwl emaw ṭiaupho nei an hmu a, chumi chungah chuan, an theih chuan lawng chhuahtîr an tum a.

⁴⁰Tin, thîrchakai thlunnate chu an zai chat a, tuifinriatah an hnutchhiah a; chumi rual chuan kar herna phuarnate chu an phelh a, hma lam puanzâr chu thli chhêm tûr ziain an hnûk chho va, ṭiaupho chu an pan ta a.

⁴¹Nimahsela, tuizangkhauh pahnih intawhna hmunah kan lût hlauh va, lawng chu lei an suttîr ta a; tichuan, lawng hnâr lam chu a tâng ta tlat a, tihchêt zawh lohvin a awm reng a, a mei lam erawh chu tuifâwn a nasat avângin a keh sawm ṭan ta a.

⁴²Tin, sipaite chuan mi tângte chu tihhlum an rawt a; chuti lo chuan, tui hleuh kaite an awm ang a, an tlân bo vang tih an hlau va.

⁴³Nimahsela, sipai za hotu chuan Paula chhanhim a duh a, an thiltum chu a khap a; tui hleuh thiam apiang tuifinriatah zuang thlaa khawmual lo kai hmasa tûr leh,

⁴⁴mi dang chu, a ṭhen thingphêk chungah te, a ṭhen lawng bungraw dang chungah te kai tûrin thu a pe a. Chutiang chuan an zain khawmualah him takin an kai ta vek a.