Read Mizo_Old_version TIRHKOHTE THILTIH 28 Bible Online

TIRHKOHTE THILTIH 28 - Mizo_Old_version bible

TIRHKOHTE THILTIH 28

¹Tin, kan kai zawh chuan thliarkâr hming chu Meliti a ni tih kan lo hre ta a.

²Tin, awze miten khawngaih namênin min khawngaih lo va; ruah a lo sûr avâng leh a vawh avângin mei an chhêm a, kan zain min lo lâwm a.

³Tin, Paula chuan thing têl khat a fawm a, meiah a tuah a, a sat avângin rûl a lo chhuak a, a kutah a chû a, a bet ta reng a,

⁴Tin, awze mite chuan rannung a kuta inkhai reng chu an hmuhin, “He mi hi tualthat a ni phawt e, tuifinriat aṭangin tlân chhuak mah sela Phubalatua chuan a nun a awih tawh lo a nih hi,” an ti a.

⁵Nimahsela, ani chuan rannung chu meiah a thing thla a, eng mah a ti lo va.

⁶Anni erawh chuan a vûn emaw, thâwklehkhata thia a tlûk nghâl emaw an ring a; rei tak an nghâk a, eng mah a ti lo tih an hriat chuan an rilru an lamlêt a, “Pathian a nih hi,” an ti ta zâwk a.

⁷Tin, chumi hmun kiangah chuan chumi thliarkâra lal ber, a hming Publia ram a awm; chu mi chuan min lo lâwm a, ni thum lâwm takin min thleng a.

⁸Tin, Publia pa chu khawsik leh santên veiin a lo mu reng a; tin, a hnênah Paula a lût a, a ṭawngṭai a, a chungah a kutte a nghat a, a tidam ta a.

⁹Chu chu a tih zawh chuan chumi thliarkâra mi dang na nei apiang chu an lo kal a, an dam ta hlawm a;

¹⁰chu mite chuan nasa takin min chawimawi a; tin, kan kal dâwn chuan kan châkkhai apiang lawngah an dah hlawm a.

¹¹Tin, thla thum chinah, a hming Phîr, Aleksandria khaw lawng, thlasika thliarkâra awm tawh, chumi lawngah chuan kan kal ta a.

¹²Tin, Surakus khua kan tlawh a, chutah chuan ni thum kan châm a.

¹³Chuta ṭang chuan kan kal kual a, Region khua kan thleng a; tin, ni khat chinah chhim thli a lo tleh a, a tûk lehah Puteoli khua kan thleng leh a;

¹⁴chutah chuan unaute kan hmu a, an hnêna ni sarih châman min ngên a; chutiang chuan Rom khaw lamah kan kal ta zêl a.

¹⁵Tin, unauten kan chanchin an hriat veleh, chuta ṭang chuan Appia Dâwr leh Khualbûk Pathum chinah min hmuak tûrin an lo kal a; Paulan chu mite chu a hmuh chuan Pathian hnênah lâwm thu a sawi a, a muang ta a.

¹⁶Tin, Rom khuaa kan luh chuan Paula chu a vêngtu sipai hnênah amah chauhva awm an phal a.

¹⁷Tin, ni thum chinah Paula chuan Juda-te hotu deuh apiang a ko khâwm a; tin, an rawn inkhâwmin an hnênah, “Unaute u, mi zawng zawng leh min thlahtute dân chunga eng mah ka tih loh pawhin, Jerusalem khua aṭangin Rom mite hnênah min tântîr a ni.

¹⁸Tin, anni chuan min chhuahchhâl zawhin, thihna khawp meuh ka chungah eng mah a awm loh avângin thlah min tum a.

¹⁹Nimahsela, Juda-ten chu chu an hnial avângin Kaisara hnêna thlen lo thei ka ni ta lo va; nimahsela, ka chite hêkna neia ti ka ni lo ve.

²⁰Chûng kawngah chuan nangni hi hmuhah leh biak atân ka ko che u a ni; Israel-te beisei ka ṭâwmpui avânga he khaidiat hi bun ka ni si a,” a ti a.

²¹Tin, anni chuan a hnênah, “I chanchin Judai ram ata lehkhatein kan hmu lova, unaute tu mahin heta lo kalin i chungah thupawi eng mah an puang hek lo, sawi pawh an sawi hek lo.

²²Amaherawhchu, he pâwl hi ram tinah sawichhiat an ni si a, nangin engtin nge i ngaih hriat kan duh e,” an ti a.

²³Tin, ni an tiam a, chumi niah chuan a thlen inah a hnênah mi tam tak an lo kal a; zîng aṭanga tlai lam thlengin an hnênah chu thu chu a hrilhfiah a, Pathian ram thu a hriattîr a, Mosia Dân Lehkha thu leh Zâwlneite Lehkhabu thuin Isua lamah anmahni a thlêm a thlêm a.

²⁴Tin, a ṭhenin a thu sawi chu an ring a, a ṭhenin an ring lo va.

²⁵Tin, an inngeih ta lo va, Paulan thu kam khat a sawi zawhin an kal chhuak ta a. A thusawi chu hei hi a ni: “Thlarau Thianghlimin zâwlnei Isaia kaan in thlahtute hnêna a sawi kha a dik ngawt mai,

²⁶‘He chite hnênah hian va sawi rawh: Beng zawngin in hre na ang a, a ngaihna erawh chu in hre tawp lo vang; Hmuh zawng in hmu na ang a, hriat erawh chu in hre tawp lo vang;

²⁷He chite thinlung hi a lo chawlawl ta a, An bengte a lo ngawng deuh va, An maimitchhîng bawk a, Chuti lo chuan, kan mitin kan hmu ang a, Kan bengin kan hria ang a, Kan thinlungin kan hre bawk ang a, Kan hawi kîr leh ang a, Anin min tidam hlauh dah ang e,’ an ti a, a tih kha.

²⁸“Chutichuan, Pathian chhandamna thu hi Jentailte hnêna thawn a ni tih hre rawh u, anni zawngin ngaih pawh an ngaithla ang,” a ti a. [1]

³⁰Tin, Paula chu kum hnih pumhlûm a in luah hawhah a awm a, a hnêna lût apiang a lâwm ṭhîn a,

³¹Pathian ram thu a hrilh a, Lal Isua Krista thu pawh huai takin a zirtîr ṭhîn a, tu mahin amah an khap si lo va.