Read Mizo_Old_version TIRHKOHTE THILTIH 3 Bible Online

TIRHKOHTE THILTIH 3 - Mizo_Old_version bible

TIRHKOHTE THILTIH 3

¹Tin, Petera leh Johana chu behliang mun hunin, ṭawngṭai hun lai chuan, Pathian biak ina lût tûrin an chho va.

²Tin, patling tu emaw a pian tirh ata kebai an rawn zâwn a, chu mi chu biak ina lûtte hnêna kutdawh tûrin biak in kawngkhâr, “Mawi” an tih bulah chuan ni tin an muttîr ṭhîn a ni a;

³chu mi chuan Petera leh Johana Pathian biak ina lût tûr chu a hmu a, kut a dawh a.

⁴Tin, Peteran ani chu a en reng a, Johana pawhin; tin, Peteran, “Min han en rawh,” a ti a.

⁵Tin, ani chuan an lakah eng emaw hmuh a beisei a, a han en a.

⁶Nimahsela, Peteran, “Tangka leh rangkachak eng mah ka nei lo; nimahsela, ka neih chhun ka pe ang che: Nazareth Isua Krista hmingin kein kal tawh rawh,” a ti a.

⁷Tin, a kut ding lam a chelh a, a kai tho ta a; tin, thâwklehkhatan a kete leh a kheimit ruhte chu a lo chak ta nghâl a.

⁸Tin, ani chu a zuang tho va, a ding a, kein a kal ṭan ta a. Tin, kea kal kal leh, zuang zuang leh, Pathian fak chung zêlin biak inah chuan a lût ve ta a.

⁹Tin, kea a kal leh Pathian a fak chu mi zawng zawngin an hmu a;

¹⁰biak in kawngkhâr “Mawi” bula kutdawha ṭhu ṭhîn kha a ni tih an hria a; a chunga thil thleng chu mak an ti êm êm a, an buai hle mai a.

¹¹Tin, ani chuan Petera leh Johana chu a chelh reng laiin, mi zawng zawngin mak an ti êm êm a, hulhliap, Solomona ta an tihah chuan an hnênah an lo tlân khâwm a.

¹²Tin, Peteran chu chu a hmuhin, mite chu a bia a, “Nangni Israel mite u, hêng hi engati nge mak in tih? Keimahni thiltihtheihna leh Pathian kan ngaihsak avânga ani hi kan kaltîr ang êm chuan engati nge min en reng?

¹³Abrahama te, Isaaka te, Jakoba te Pathian, min thlahtute Pathian chuan a Chhiahhlawh Isua a chawimawi ta a nih hi; ani chu in mantîr a, Pilatan chhuah a tum pawhin a hmaah in lo duh loh kha.

¹⁴Mi Thianghlim leh Fel tak kha in duh lo va, tualthattu kha in hnêna pêk in ngên ta zâwk a.

¹⁵Nunna Siamtu chu in that a; nimahsela, Pathianin ani chu mitthi zîng ata a kai tho leh a; chu chu a hretute kan ni e.

¹⁶Tin, ama hming rin avângin, a hming chuan he mi in hmuh leh in hriat ṭhin hi a tichak ta a ni; a ni, amah avânga rinna lo awm hian in zaa mit hmuhah a tidam ta viah a nih hi.

¹⁷“Nimahsela, unaute u, in hotute pawhin an ât avânga an tih ang khân, in ât avângin hêng hi in ti a ni tih ka hria e.

¹⁸Nimahsela, Pathianin zâwlnei zawng zawng kaan, a Krista chuan hrehawm a tuar tûr thu a hriattîr lâwk kha, khati khân a thlentîr ta a ni.

¹⁹Chuvângin, in sualte thai bo a nih theih nân sim ula, hawi kîr leh rawh u; chutichuan, Lalpa hnên ata harh hunte a lo la thleng thei ang a,

²⁰Krista Isua, in tâna a ruat pawh kha, a rawn tîr thei ang.

²¹Amaherawhchu, engkim siam ṭhat hun a thlen hma loh zawng vânin ani chu a kawl rih tûr a ni; chu mi siam ṭhat tûr thu chu Pathianin leilung pian tirh ata a zâwlnei thianghlim awmte kain a sawi tawh kha,

²²Mosia ngeiin, ‘Lal Pathianin keimah mi siam ang hian in unaute zîngan zâwlnei pakhat a siamsak ang che u; ani chuan thu zawng zawng in hnêna a sawi apiang chu in ngaihthlâksak ang;

²³tin, mi tu pawh, chu zâwlnei thu chu ngaihthlâksak lo apiang mi zîng ata tihboral daih an ni ang,’ a tih kha.

²⁴A ni, Samuela awm achin zâwlnei zawng zawng, an hnunga mite nên, thu sawi apiang khân, tûnlai chanchin hi an hril lâwk bawk ṭhîn.

²⁵Nangni hi zâwlneite leh thuthlung fate in ni asin; Pathianin Abrahama hnênah, ‘I thlah avângin khawvêla hnam tin an thawveng ang,’ tiin, in thlahtute hnênah a tiam kha.

²⁶Pathianin a Chhiahhlawh chu a ruat a, in sualte hawisantîr ṭheuhvin malsâwmsak tûr che uin, nangmahni hnênah a rawn tîr hmasa ber a nih hi,” a ti a.