Read Mizo_Old_version TIRHKOHTE THILTIH 4 Bible Online

TIRHKOHTE THILTIH 4 - Mizo_Old_version bible

TIRHKOHTE THILTIH 4

¹Tin, Petera leh Johanan mite hnêna thu an sawi lai chuan puithiamho te, biak in hotu te, Saddukaiho te chu an hnênah an lo thleng phut a,

²mi an zirtîr leh Isua avânga mitthi zîng ata thawhleh thu an hrilh avângin an lungni lo êm êm a.

³Tin, an man a, tlai lam a nih avângin a tûk thlengin tân inah an khung ta a.

⁴Nimahsela, thu ngaithlahote zînga tam takin an awih a; an tam lam chu patling hlîr pawh sângnga lai an tling a.

⁵Tin, a tûkah chuan an hotu te, upa te, lehkhaziaktu te,

⁶Puithiam lalber Ana te, Kaiapha te, Johana te, Aleksandra te, puithiam lalber chi zawng zawngte pawh, Jerusalem khuaah an awm khâwm a.

⁷Tin, Petera leh Johana chu a laiah an dintîr a, “Eng tih theihnain nge, tu hmingin nge hêng hi in tih?” an ti a, an zâwt a.

⁸Tichuan, Petera chu Thlarau Thianghlimin a khat a, an hnênah, “Mi zawng zawng hotute u, upate u,

⁹mi chak lo tihṭhat thu-ah, ‘He mi hi eng vângin nge a lo dam tâk?’ tiin vawiinah hian min chhuahchhalh chuan,

¹⁰nangni zawng zawngin hre rawh u, Israel mi zawng zawng pawhin hre rawh se: Nazareth Isua Krista, krawsa in khen beh, Pathianin mitthi zîng ata a kaihthawh leh kha, ama hming ngeiin he mi hi hetah in hmaah damin a ding ta a nih hi.

¹¹Nangni in satute u, in lung paih, a kila lung ṭangkai ber lo ni ta kha amah hi a ni e.

¹²Mi dang tu ma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” a ti a.

¹³Tin, Petera leh Johana huaizia chu an hmuhin, lehkha thiam lo leh mâwl tak an ni tih an hriatin mak an ti hle a; Isua hnênah an awm tawh tih an hre ta a.

¹⁴Tin, mi an tihdama chu an hnêna ding an hmu a, eng mah an sawisêl thei si lo.

¹⁵Chutichuan, an rorêlna ata an kal hrantîr hnuin an inrâwn a,

¹⁶“Hêng mite hi engtin nge kan tih ang? Thil mak thang tak an ti tih Jerusalem khuaa awm zawng zawngin fiah takin an hriat tâk hi; keini pawhin kan hnial thei si lo.

¹⁷Nimahsela, mi hnêna a puan lehzual theih loh nân, tûn achinah tu hnênah mah he hminga thu an sawi lohna tûrin i vau ang u,” an ti a.

¹⁸Tichuan, anni chu an ko va, Isua hminga thusawi tawp loh tûr leh zirtîr tawp loh tûr an ti tlat a.

¹⁹Nimahsela, Petera leh Johanan an hnênah, “Pathian mit hmuhin Pathian thu zawm aiin nangni thu zawm a dik zâwk emaw chu, ngaihtuah rawh u.

²⁰Keini zawng thil kan hmuh leh kan hriatte kha sawi lovin kan awm thei lo,” an ti a.

²¹Tin, anni chuan an vau lehzual a, an chhuah ta a, mipui avângin hremna remchâng an hmu lo; an thiltih avâng khân mi zawng zawngin Pathian an chawimawi si a.

²²Thil maka an tihdama chu kum sawmli aia tam zâwk mah a ni si a.

²³Tin, Petera leh Johana chu an chhuahin, anmahni pâwlte hnênah an va kal a, puithiam lalte leh upaten an hnêna an sawi apiang chu an hrilh vek a.

²⁴Chutichuan, a ngaithlatute chuan a rualin aw ring takin Pathian hnênah, “Lalpa, nang vân te, lei te, tuifinriat te, a chhûnga awmte zawng zawng Siamtu i ni;

²⁵nangin Thlarau Thianghlimin, min thlahtu i chhiahhlawh Davida kain hêng thu hi i sawi a ni: ‘Jentailte engati nge an thinur kha? Hnam tinin engati nge thil sâwt lo an ngaihtuah?

²⁶Khawvêl lalten an ep huai huai a, Hotute pawh an pung khâwm a, Lalpa leh a Krista chungah chuan,’ tiin.

²⁷“He khuaah hian i Chhiahhlawh thianghlim, i hriak thih Isua chungah khân, Heroda leh Pontia Pilata nên, Jentailte leh Israel mite nên an pung khâwm takzet a ni,

²⁸i kut leh i rilruin lo thleng tûra a ruat lâwk apiang kha ti tûrin.

²⁹Tichuan, tûnah Lalpa, an mi vauziate hi ngai teh; i bawihte hi huai takin i thu hriltîr la,

³⁰mite tidam tûrin nangin i kut phar ang che; i chhiahhlawh thianghlim Isua hming avângin, chhinchhiahna leh thil mak takte tihtîr bawk ang che,” an ti a.

³¹Tin, an ṭawngṭai zawhin an awm khâwmna chu a lo nghîng a, an zain Thlarau Thianghlimin an lo khat a, huai takin Pathian thu an hril ta a.

³²Tin, a ringtu mipuite chu rilru hmun khat leh ngaihtuah hmun khatin an awm a: an zînga pakhat mahin an sum neih, “Ka ta bîk a ni,” an ti lo; thil zawng zawng an inṭâwm zâwk ṭhîn.

³³Tin, tirhkohte chuan awihawm takin Lal Isua thawhleh thu an hriattîr ṭhîn a; an zaa chungah khawngaihna nasa tak a awm a.

³⁴Tin, an zîngah pawh tlachham tu mah an awm lo; ramte, inte nei apiangin an hralh a, an thil hralhte chu a man an rawn keng a,

³⁵tirhkohte ke bulah an dah ṭhîn a; an châkkhai daih tâwk ṭheuhvin an sem ṭheuh ṭhîn a.

³⁶Tin, Josefa, tirhkohten Barnaba an tiha chu (chu mi hming awmzia chu, “Thlamuanna Fa” tihna a ni a), Levia chi, Kupra thliarkâra mi a ni a,

³⁷a lo neih chu hralhin a man a rawn keng a, tirhkohte ke bulah a dah ta a.