Read Mizo_Old_version TIRHKOHTE THILTIH 5 Bible Online

TIRHKOHTE THILTIH 5 - Mizo_Old_version bible

TIRHKOHTE THILTIH 5

¹Nimahsela, mi pakhat a hming Anania, a nupui Saphiri nên an awm a; Anania chuan ram a hralh a,

²a nupui hriatin a man a ṭhen a zêp ta a; tin, a ṭhen a rawn keng a, tirhkohte ke bulah chuan a dah a.

³Nimahsela, Peteran, “Anani, Thlarau Thianghlim bum tûr leh, ram man a ṭhen zêp tûrin engati nge Setanan i thinlung a tihkhah le?

⁴A awm chhûng zawng khân i ta a ni reng lo vem ni? I hralh hnu pawh khân i thu thuin a awm lo vem ni? Engati nge hêng thu hi i rilrua i ngaihtuah? Mihring bum i ni lo ve, Pathian bum i ni zâwk e,” a ti a.

⁵Tin, Anania chuan chûng thu chu a hriat veleh a tlu a, a thi ta a; tin, a hria apiangin an hlau ta êm êm a.

⁶Tin, tlangvâlhote chu an tho va, an tuam a, an zâwn chhuak a, an phûm ta a.

⁷Tin, dârkâr thum lai emaw chinah chuan a nupui chu, thil awmzia chu hre lovin a lo lût a.

⁸Tin, Peteran a hnênah, “Mi hrilh rawh, ram chu heti zât chauhvin maw in hralh?” a ti a. Tin, ani chuan, “Aw, heti zât chauh hian a ni,” a ti a.

⁹Tin, Peteran a hnênah, “Engati nge Lalpa Thlarau fiah nân in inthurual ni? Ngai teh, i pasal phûmtute kephah chu kawngka bulah a lo awm ta, nang pawh an zâwn chhuak ang che!” a ti a.

¹⁰Tin, thâwklehkhatan a ke bulah chuan a tlu ta nghâl a, a thi ve ta a; tin, tlangvâlhote chu an lo lût a, ani chu thiin an rawn hmu a, an zâwn chhuak a, a pasal kiangah chuan an phûm ta a.

¹¹Tin, kohhranhote zawng zawng leh chûng thu hria apiangte chuan an hlau ta êm êm a.

¹²Tin, mi zîngah Pathianin tirhkohte kutin chhinchhiahna leh thil mak tam tak a ti ṭhîn. Tin, anniho chu an zain rilru hmun khatin Solomona Hulhliapah chuan an inkhâwm ṭhîn a.

¹³Mi dang erawh chu tu mah an zîngah an tel ve ngam ta lo va; nimahsela, miin anniho chu an fak si ṭhîn.

¹⁴Tin, a ring tharho hmeichhia leh mipa tam takin Lalpa hnênah chuan an rawn belhchhah lehzual ṭhîn a;

¹⁵chutichuan, damlote pawh kawtthlêrahte an zâwn chhuak a, khumahte, âwngphahahte an muttîr a, Petera kal pahin a hlim talin a ṭhen a zâr a hliah theih nân an ti a.

¹⁶Tin, Jerusalem khaw kiang vêl khua ata mipuite pawh chu dam lote, ramhuai bawlhhlawh sawisakte rawn hruaiin an lo kal khâwm a; chûngte pawh chu an lo dam ta ṭheuh va.

¹⁷Tin, puithiam lalber leh a ṭhiante zawng zawng an lo thawk a (chûng a ṭhiante chu Saddukai pâwl an ni a), an îtsîk êm êm a,

¹⁸tirhkohte chu an man a, vântlang tân inah an khung ta a.

¹⁹Nimahsela, zânah Lalpa vântirhkoh pakhatin kawngkhârte chu a rawn hawng a, a hruai chhuak a,

²⁰“Pathian biak inah va ding ula, mi hnênah hêng Nunna thu zawng zawng hi va sawi rawh u,” a ti a.

²¹Tin, chu thu chu an hriatin, khawvâr hun lai vêlin, Pathian biak inah chuan an va lût a, an zirtîr ta a. Nimahsela, puithiam lalber leh a ṭhiante chu an lo kal a, rorêltuho leh Israel thlahte upaho zawng zawng an ko khâwm a, tirhkohte chu rawn hruaitîr tûrin tân inah chuan mi an tîr a.

²²Nimahsela, tiang kengtute chu an va kal a, tân inah chuan anni chu an hmu si lo; tichuan, an kîr leh a,

²³“Tân in chu him taka inkhârin, a vêngtute pawh kawngkhâr bulah dingin kan hmu si a; nimahsela, kan han hawng a, a chhûngah tu mah kan hmu si lo!” tiin an hrilh a.

²⁴Tin, Pathian biak in hotu leh puithiam lalten chûng thu chu an hriatin, “Hêng hi eng ti takin puang ang maw?” tiin, an thu-ah chuan an mangang ta êm êm a.

²⁵Tin, mi pakhat a lo kal a, an hnênah, “Ngai teh u, tân ina mi in khungte khân Pathian biak inah dingin mi an zirtîr ka ti!” tiin a rawn hrilh a.

²⁶Tichuan, hotu chu tiang kengtute nên chuan an va kal a, vântlâng an hlauh avângin tlang takin an rawn hruai a; chuti lo chuan, lunga den an hlau va.

²⁷Tin, an rawn hruai thlen chuan, rorêltuho hmaah chuan an dintîr a. Tin, puithiam lalber chuan an hnênah,

²⁸“He hming hian zirtîr loh tûr kan tih tlat tawh che u kha; hre rawh u, in thu zirtîrin Jerusalem khua in tihkhah vek tawh hi, chu mi tihhlum bul chu tumtîr min tum a nih hi le,” tiin a chhâl a.

²⁹Nimahsela, Petera leh tirhkohte chuan, “Mihring thu aiin Pathian thu kan zâwm zâwk tûr a ni.

³⁰Nangnin Isua thingah khai kângin in tihhlum kha, min thlahtute Pathianin a kai tho leh ta a ni.

³¹Amah ngei kha Pathianin Lalah leh Chhandamtua awm atân a ding lamah a chawimawi ta a, Israel-te sual simtîr tûr leh ngaidam tûrin.

³²Chûng thu chu a hretute kan nih hi; Thlarau Thianghlim, Pathianin a thu zâwm apiangte hnêna a pêk kha, hretu a ni ve bawk a,” an ti a, an chhâng a.

³³Tin, anni chuan chûng thu chu an hriatin an thin a khei ta êm êm a, tihhlum an tum ta a.

³⁴Nimahsela, rorêltute zîngah chuan a hming Gamaliela, Pharisai, Dân hretu, mi zawng zawng zînga hmingthang tak mi pakhat chu a ding a, chu mite chu chhuahtîr rih tûr thu a pe a.

³⁵Tin, rorêltute hnênah chuan, “Nangni Israel mite u, he mite chunga in thiltih tum hi fîmkhur rawh u.

³⁶Tûn hma pawh khân, Theoda, ‘Mi lian ka ni,’ tiin a lo awm a; chu mi hnênah chuan mi tam tak, zali lai an lo pakai a; ani chu tihhlumin a awm ta a; a thu zâwm apiang an zain an darh ta vek a, eng mah an ni tawh lo.

³⁷Chu mi awm hnuah chuan hming ziak lai khân, Galili rama mi Juda kha a lo awm leh a; a hnênah mi ṭhenkhat a hîp leh a; nimahsela, ani pawh chu a thi ta a, a thu zâwm apiangte chu an zain an darh ta vek mai a.

³⁸Chuvângin, tûnah ka ti a che u, hêng mite hi tawk suh ula, awm mai rawh se; hêng an thiltih tum leh an thiltih hi, mihring tihchhuah mai a nih chuan a boral ang;

³⁹amaherawhchu, Pathian tihchhuah a nih chuan anmahni in tiboral thei lo vang; chuti lo chuan, Pathian do in lo ni hlauh dah ang e,” a ti a.

⁴⁰Tin, a sawi chu rem an ti ta a; tichuan, tirhkohte chu an ko va, an vêl a; an velh zawhin, Isua hminga thu sawi loh tûr ti tlatin an thlah ta a.

⁴¹Chutichuan, rorêltute zîng ata an kal chhuak a, chu Hming avâng chuan mualpho tuar tlâka ruat an nih avângin an lâwm hle a.

⁴²Tin, ni tin Pathian biak inah leh anmahni inahte, “Isua chu Krista a ni,” tiin, zirtîr leh hril an bâng chuang lo.