Read Mizo_Old_version TIRHKOHTE THILTIH 6 Bible Online

TIRHKOHTE THILTIH 6 - Mizo_Old_version bible

TIRHKOHTE THILTIH 6

¹Tin, chûng laia zirtîrho an pun an pun lai chuan, an ni tin thil semah anmahni hmeithaite an ngaihsak ṭhin loh avângin Grik Juda-te chu Hebraite chungah an lo phunnawi ta a.

²Tin, sâwm leh pahnihte chuan zirtîr mipuite chu an ko va, “Pathian thu hril bânsanin, dawhkânahte rawng kan bâwl chuan a ṭha lo vang.

³Chutichuan, unaute u, in zîngah Thlarau leh fina khat, mi hmingṭha hlîr pasarih thlang rawh u, anni chu hêng thil rêltu atân hian kan siam ang;

⁴keini erawh chu ṭawngṭai leh thu rawngbâwlin kan awm leh tlat zêl ang,” an ti a.

⁵Chûng thu chuan mipui zawng zawng chu a tilâwm a; tichuan, Stephana, rinna leh Thlarau Thianghlima khat nên, Philipa nên, Prokora nên, Nikanora nên, Timona nên, Parmena nên, Nikola, Juda-te saphun Antiokei khuaa mi nên an thlang a;

⁶chûng mite chu tirhkohte hmaah an dintîr a; tin, anni chuan an ṭawngṭai a, an chungah an kut an nghat a.

⁷Tin, Pathian thu chu a lo darh a; Jerusalem khuaah chuan zirtîrteho an pung nasa ta êm êm a; puithiamte zîngah pawh mi tam takin chu rinna chu an awih ta a.

⁸Tin, Stephana chu ngilneihna leh thiltihtheihnain a khat a, mi zîngah thil mak leh chhinchhiahna ropui tak a ti ṭhîn a.

⁹Nimahsela, Sal Chhuakho te, Kurini khuaa mi te, Aleksandria khuaa mi te inkhâwmna an tiha mi, mi ṭhenkhat leh Kilikia rama mi te, Asia rama mi te inkhâwmnaa mi, mi ṭhenkhat chu an lo thawk a, Stephana chu an rawn hnial a.

¹⁰Nimahsela, a finna leh a sawipuitu Thlarau chu an let thla thei ta lo va.

¹¹Tin, mite an tham a, chûng mite chuan, “Mosia leh Pathian a sawichhiat kan hria,” an ti a.

¹²Tin, mite, upate, lehkhaziaktute an fuihpawrh a, Stephana chu an bei a, an man a, rorêltute hnênah an hruai a;

¹³tin, hretu derte an siam a, chûng mite chuan, “He mi hian he in Thianghlim leh Dân hi a sawichhe fo ṭhîn a;

¹⁴he Nazareth Isua hian he in hi a ṭhiat ang a, Mosia Dân min pêkte kha a tidanglam dâwn tih a sawi kan hria,” an ti a.

¹⁵Tin, rorêltuho ṭhute zawng zawng chuan Stephana chu an en reng a, a hmêl chu vântirhkoh hmêl angin an hmu a.