Read Mizo_Old_version TIRHKOHTE THILTIH 7 Bible Online

TIRHKOHTE THILTIH 7 - Mizo_Old_version bible

TIRHKOHTE THILTIH 7

¹Tin, puithiam lalber chuan, “Hêng thu hi a dik em?” a ti a.

²Tin, Stephana chuan, “Unaute u, pate u, ngai teh u, min thlahtu Abrahama, Haran khuaa a awm hmaa Mesopotamia rama a awm lai khân, Ropuina Pathian chu a hnênah a rawn inlâr a,

³a hnênah, ‘I khaw lam leh i chiteho zîng ata chhuak la, ram ka la entîr tûr che lamah kal rawh,’ a ti a.

⁴Tin, ani chu Kaldai-ho ram ata a kal chhuak a, Haran khuaah a va awm ta a; tin, a pa a thih hnuin, chuta ṭangin hei, tûna in awmna khaw lamah hian Pathianin a pêm luhtîr a.

⁵Tin, hetah hi chuan eng mah hmun luah tûr, a ke nghahna tham pawh a pe lo va; nimahsela, amah leh a hnua a thlahte thlenga ro tûrin pêk a tiam a, fa a la neih hma pawhin.

⁶“Tin, Pathianin hetiang hian a sawi: ‘A thlahte mi ram lamah kum zali an thang ang a, miin bawihah an siam ang a, an tiduhdah bawk ang,’ tiin.

⁷Tin, Pathianin, ‘A bawihtu tûrte hnam chu keimahin ka la ngaihtuah ang a; tin, chumi zawhah chuan an lo chhuak ang a, hemi hmunah hian ka rawng an la bâwl ang,’ a ti bawk a.

⁸Tin, Pathianin a hnênah serh tan thu kha a thlung a; chutichuan, Abrahama chuan Isaaka a hring a, a ni riat niah a serh a tan a; tin, Isaaka chuan Jakoba a hring a; tin, Jakoba chuan chi thlahtu sâwm leh pahnihte kha a hring a.

⁹“Tin, chi thlahtute khân Josefa an îtsîk a, Aigupta ram lamah an hralh a; nimahsela, Pathian a hnênah a awm a,

¹⁰a hrehawm tuar zawng zawngah a chhanchhuak zêl a, Aigupta ram lal Pharaoa pawh a khawngaihtîr a, mi fing tak a ni tih a hriattîr bawk a; tichuan, ani chuan Aigupta ram leh a ina mi zawng zawng chungah hotuah a siam ta a.

¹¹“Tin, Aigupta leh Kanaan ram zawng zawngah chuan ṭâm a lo tla a, hrehawm nasa tak a lo thleng ta a; min thlahtute chuan ei tûr rêng rêng an hmu ta lo va.

¹²Nimahsela, Jakoba chuan Aigupta ramah buh a awm tih a hriat veleh, min thlahtute chu a tîr chhuak a; chu chu an kal ṭan tirhna ber a ni.

¹³Tin, an kal vawi hnihnaah chuan Josefa chu a unaute hnênah chuan a inhriattîr a; tin, Josefa unaute chu Pharaoa an hriattîr ta a.

¹⁴Tin, Josefa chuan a pa Jakoba leh a unau zawng zawng a kohtîr a; anmahni chu sawmsarih leh panga an ni a.

¹⁵Tichuan, Jakoba chu Aigupta ramah a zuk kal a; tin, ani leh min thlahtute chu an thi ta a,

¹⁶Sukem khua an zâwn thleng a, Abrahaman Sukem khuaa Hamora fapate laka thlân, tangkaruaa a leiah khân an zalh ta a.

¹⁷“Tin, Pathianin Abrahama hnêna thu a tiam kha a hun chu a lo thlen dâwnin, mite chu Aigupta ramah chuan an lo pung a, an lo tam ta deuh deuh va,

¹⁸Josefa hre lo lal dang a lo awm thleng khân.

¹⁹Chu mi chuan kan chite a ngamthlêm a, min thlahtute chu a tiduhdah a, an nausênte nung lo tûrin a paih chhuahtîr ṭhîn a.

²⁰Chumi lai chuan Mosia a lo piang a, a hmêl a ṭha êm êm mai a; a pa inah thla thum an châwm a;

²¹tin, an paih chhuahin Pharaoa fanuin a la a, ama fa atân a châwm ta a.

²²“Tin, Mosia chu Aigupta rama mite finna zawng zawng an zirtîr a, a thu-ah leh a thiltihah a ropui êm êm a.

²³Tin, ani chuan kum sawmli a lo tlin chuan a unau, Israela thlahte chu kan a tum a.

²⁴Tin, an zînga mi pakhat tihretheih tuar lai a hmu a, a chhan a, tihduhdah tuartu phuba chu a la a, Aigupta mi chu a tihlum ta a.

²⁵Mosia chuan ama kutin Pathianin anmahni a chhanhim tih a unauten an hria emaw a ti a; nimahsela, an hre si lo.

²⁶Tin, a tûkah an zînga mi pahnih an insual laiin an hnênah a lo thleng a, ‘Pute u, unau in ni alâwm; engati nge dik lo taka in intih?’ tiin rem a tum a.

²⁷Nimahsela, a ṭhenawm chunga kawhmawh bâwltu zâwk chuan Mosia chu a nam kiang a, ‘Kan chungah hotuah leh rorêltuah tuin nge siam che?

²⁸Nimina Aigupta mi i tihhlum ang khân mi tihhlum i tum a ni maw?’ a ti a.

²⁹Tin, chumi thu avâng chuan Mosia chu a tlân bo va. Midian ramah a thang reng a, chutah chuan fapa pahnih a nei a.

³⁰“Tin, kum sawmli a vei hnuin Sinai tlâng thlalêrah, hnimbukah, meialh zîngah vântirhkoh pakhat a hnênah a lo inlâr a.

³¹Tin, Mosian a hmuh chuan a thil hmuh chu mak a ti êm a; tin, en tûra a va hnaih laiin Lalpa awin,

³²‘Kei, i thlahtute Pathian ka nih hi, Abrahama Pathian, Isaaka Pathian, Jakoba Pathian chu,’ a lo ti a. Tichuan, Mosia chu a khûr a, a en ngam ta lo va.

³³Tin, Lalpa chuan a hnênah, ‘I kephah ata i pheikhawk kha phelh rawh; i dinna hmun kha lei thianghlim a ni e.

³⁴Aigupta rama ka mi awmte chu an hrehawmzia ka hmu reng asin, an rûm pawh ka hre reng a, anmahni chhanhim tûrin ka lo chhuk ta a ni. Hawh teh, Aigupta ramah ka tîr ang che,’ a ti a.

³⁵“Chu Mosia, ‘Hotu leh rorêltuah tuin nge siam che?’ tia an hnar chu, hnimbuka vântirhkoh a hnêna inlâr khân a pui a, Pathianin amah ngei chu hotu leh chhanhimtu ni fâwm tûrin a tîr a ni.

³⁶Ani chuan Aigupta ramah te, Tuifinriat Senah te, thlalêrah te chuan kum sawmli chhûngin thil mak leh chhinchhiahnate a hmuhtîr zêl a, anmahni a hruai chhuak ta a.

³⁷“Israela thlahte hnêna, ‘Pathianin keimah mi siam ang hian, in unaute zînga mi zâwlnei pakhat a siamsak ang che u,’ titu kha a ni, chu Mosia chu.

³⁸Chu mi chu thlalêra mipui pung khâwm zînga Sinai tlânga a betu vântirhkoh hnênah leh min thlahtute hnêna awm kha a ni; chu mi chu min pêk chhâwn tûra thu nungte latu kha a ni;

³⁹min thlahtute chuan a thu an zâwm duh lo va, an hnar a, Arona hnênah, ‘Kan hma hruai tûrin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lo va,’ tiin an rilrute chu Aigupta ram lamah a lêt leh ta a.

⁴⁰

⁴¹Tin, chûng lai chuan sebâwngno lem an siam a, a lem chu ran talhin an bia a, anmahni kutchhuak chungah chuan an hlim ta a.

⁴²Chutichuan, Pathianin a hawisan a, vâna arsiho chibai an bûk theihna tûrin anmahni a ensan ta a; zâwlnei lehkhabua, ‘Israel chite u, thlalêrah khân kum sawmli chhûngin, Sa talh leh ran talhin kei mi bia em ni?

⁴³Moloka puan in leh pathian Rephana arsi pawh chu, Chibai bûk tûrin a lem in siamte kha, In zâwn zâwk ṭhîn a; Chuvângin, Babulon khaw piah lamah Ka hruai bo vang che u,’ tih ziak ang khân.

⁴⁴“A lem a hmuh anga siam tûra Mosia hrilhtuin a ruat ang khân, min thlahtuten thlalêrah khân hriattîrna puan in chu an nei a.

⁴⁵Chu bawk chu min thlahtute thlah leh pawhin an nei chhâwng zêl a, Pathianin min thlahtute hmaa Jentail a hnawh chhuahteho ram an luah lai khân, Josua luh rualin an luhpui a; Davida lo awm thleng khân chutah chuan a awm ta reng a.

⁴⁶Chu Davida chu Pathian mit hmuhin duhsak tlâkin a awm a, Jakoba Pathian tân awmna siamsak a dîl a.

⁴⁷Nimahsela, Solomonan in chu a saksak ta zâwk a ni.

⁴⁸Nimahsela, Chungnungbera chu kuta sak inahte a awm ngai lo; zâwlnei chuan:

⁴⁹‘Lalpan, “Vân ka ṭhutphah a ni a, Lei ka kephah nghahchhan a ni: In eng angin nge mi saksak ang? Ka chawlhna hmun pawh eng nge ni?

⁵⁰Keima kutin hêng thil engkim hi ka siam lo vem ni?” a ti e,’ tia a sawi ang khân.

⁵¹“Mi tihmawh, thinlung leh beng tan lohte u, kumkhuain Thlarau Thianghlim in dodâl fo ve; in thlahtute tih ang zêl khân in ti ṭhîn.

⁵²In thlahtuten zâwlneite zîngah tu nge an tihduhdah loh ni? Mi Fel tak lo kal tûr thu hril lâwktute kha an tihlum a; chu Mi Takzet chu mantîrtu leh thattute nangmahni hi tûnah in ni asin.

⁵³Dân, vântirhkohte pêk chhâwn kha, hmu zeta zâwm si lote u!” a ti a.

⁵⁴Tin, chûng thu chu an hriatin an thin a khei ta a, Stephana chungah chuan an ha an ṭhial a.

⁵⁵Nimahsela, ani chu Thlarau Thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a;

⁵⁶“Ngai teh u, vân inhawngte ka hmu a, Pathian ding lama Mihring Fapa ding pawh ka hmu,” a ti a.

⁵⁷Chutichuan, anni chu aw ring takin an au va, an beng an hup a, rual takin an bei chiam a,

⁵⁸khua ata chu an hnawt chhuak a, lungin an dêng a, a hretute chuan tlangvâl pakhat, a hming Saula ke bulah chuan an puante an dah hlawm a.

⁵⁹Chutichuan, Stephanan, “Lal Isu, ka thlarau la ang che,” tia Lalpa a koh laiin lungin an dêng ruih ruih a.

⁶⁰Tin, a ṭhingṭhi a, aw ring takin a au va, “Lalpa, hei an thil tihsual hi an chungah mawh phurhtîr suh ang che,” a ti a. Tin, chu thu chu a sawi zawh veleh a muhîl ta a. Saula pawh chuan a thih chu a remti a.