Read Mizo_Old_version TIRHKOHTE THILTIH 9 Bible Online

TIRHKOHTE THILTIH 9 - Mizo_Old_version bible

TIRHKOHTE THILTIH 9

¹Saula erawh chuan Lalpa zirtîrho a vau thu leh thah a tum thu a la chhâk chhuak ta cheu va. puithiam lalber hnênah a kal a,

²Damaska khuaa inkhâwmna in zawng zawnga mite hnêna pêk tûrin lehkhate a dîl a, Kawnga mi chu tu pawh a hmuh chuan hmeichhia pawh, mipa pawh, Jerusalem khuaah phuar chunga a hruai theihna tûrin.

³Tin, a kal laiin, Damaska khua a thlen dâwnin, thâwklehkhatan êng, vân ata a vêlin a lo êng ta phut a;

⁴tin, leiah a tlu a, a hnênah, “Saula, Saula, nangin engati nge mi tihduhdah?” tiin aw a hria a.

⁵Tin, ani chuan “Lalpa, tu nge i nih?” a ti a. Tin, Lalpa chuan, “Isua, i tihduhdah hi ka ni e;

⁶nimahsela, tho la, khuaah lût rawh; tichuan, i tih tûr an lo hrilh ang che,” a ti a.

⁷Tin, a hnêna kal vete chu dang rengin an ding a, aw zawng an hre na a, tu mah an hmu si lo va.

⁸Tin, Saula chu lei ata chu a tho va; tin, a han meng a, eng mah a hmu thei ta lo va; tichuan, a kutah an kai a, Damaska khuaah an hruai lût a.

⁹Tin, ni thum khaw hmu lovin a awm a, eng mah a eiin a in lo va.

¹⁰Tin, Damaska khuaah chuan a hming Anania, zirtîr pakhat a awm. Tin, Lalpa chuan mumang angin a hnênah, “Anani,” a ti a. Tin, ani chuan, “En teh, Lalpa, heta hi ka awm,” a ti a.

¹¹Tin, Lalpa chuan a hnênah, “Tho la, kawtthlêr, ‘Ngîl’ an tihah chuan kal la, Juda inah, Tarsa khuaa mi, a hming Saula zâwt chhuak rawh; ngai teh, a ṭawngṭai mêk a ni;

¹²a hming Anania mi pakhat, lûta a mit tivâr tûrin a chungah kut nghatin a hmu tawh e,” a ti a.

¹³Tin, Anania chuan, “Lalpa, chu mi chuan Jerusalem khuaa i mi thianghlimte chunga a tihsual tamzia thu mi tam tak kaah ka hria a ni;

¹⁴tin, hetah pawh i hming lam apiang phuarna tûrin, puithiam lalte hnên ata thu a hmu reng asin,” a ti a, a chhâng a.

¹⁵Nimahsela, Lalpa chuan a hnênah, “Kal mai rawh; Jentailte, lalte, Israela thlahte hnêna ka hming put luh nâna ka bêl ruat a ni alâwm;

¹⁶keimah avângin hrehawm engtia nasa nge a tuar tûr tih amah ka la hriattîr dâwn a ni,” a ti a.

¹⁷Tin, Anania chu a va kal a, inah chuan a va lût a; tin, a chungah a kut a nghat a, “Ka nau Saul, i mit vârna tûr leh, Thlarau Thianghlim khata i awm theih nân, Lalpa, i lo kalna kawnga i hnêna inlâr Isua khân mi rawn tîr a ni,” a ti a.

¹⁸Tin, thâwklehkhatan a mit ata phuhlip ang a tla ta nghal a, a mit a vâr leh ta a; tin, a tho va, baptisma a chang ta a.

¹⁹Tin, chaw a ei a, a lo harh leh ta a. Tin, Damaska khuaa zirtîrho awmte hnênah chuan ni eng emaw zât a awm a.

²⁰Inkhâwmna inahte chuan Isua chu Pathian Fapa a nihzia thu a tlângaupui ta nghâl a.

²¹Tin, a thu hretu zawng zawng chuan mak an ti hle a, “He mi hi Jerusalem khuaa he hming lamtute tiduhdah ṭhîn kha a ni lo vem ni? Chûng mite chu puithiam lalte hnêna phuar chunga hruai a rawn kal chhan a nih kha,” an ti a.

²²Saula erawh chu a lo chak lehzual a, chu mi chu Krista a ni takzet tih a hrilhfiah a, Damaska khuaa Juda awmte chu a tidang hiau ṭhîn a.

²³Tin, ni rei tak hnuah chuan Saula tihlum tûrin Juda-te chu an inrâwn a;

²⁴nimahsela, Saula chuan an phiar thu chu a lo hre ta a. Tin, tihhlum tumin kulh kawngka tinah chuan a chhûn a zânin an châng ṭhîn a.

²⁵Nimahsela, a zirtîrten ani chu an hruai a, zânah kulh tukverhah bâwmin an thlâk thla ta a.

²⁶Tin, Saula chuan Jerusalem khua a thlen veleh zirtîrhote chu pâwl a tum a; anni erawh chuan an zain ani chu an hlau va, zirtîr a ni ve tih an ring lo va.

²⁷Barnaba erawh chuan ani chu a hruai a, tirhkohte hnênah chuan a rawn kalpui a, kalkawngah Lalpa a hmuha a biakzia te, Damaska khuaa Isua hminga huai taka thu a hrilzia te pawh chu an hnênah a sawi ta a.

²⁸Chutichuan, Saula chu Jerusalem khuaah chuan, an hnênah lût ṭhîn, chhuak ṭhînin a awm ta a,

²⁹Lalpa hmingin huai takin thu a hril ṭhîn a. Tin, Grik Juda-te hnênah thu a sawi a, a hnial a; anni erawh chuan ani chu tihhlum an tum a.

³⁰Tin, unaute chuan chu chu an hriatin Kaisari khuaah an hruai chhuk a, Tarsa khuaah an tîr ta daih a.

³¹Chutichuan, kohhranhote chu Judai ram vêlah te, Galili ram vêlah te, Samari ram vêlah te chuan an nghet deuh deuh va, muang takin an awm ta a; tin, Lalpa ṭih dêkin, Thlarau Thianghlim thlamuanin an awm a, an lo pung ta telh telh a.

³²Tin, Peteran khua vêl a fan pahin Ludda khuaa mi thianghlim awmte hnênah a zuk kal bawk a.

³³Chutah chuan mi pakhat a hming Ainia, a zen avânga kum riat khuma mu reng a hmu a.

³⁴Tin, Petera chuan a hnênah, “Ainia, Isua Krista chuan a tidam a che; tho la, i âwngphah zial rawh,” a ti a. Tichuan, a tho ta nghâl a.

³⁵Tin, Ludda khua leh Saron phaia awmte zawng zawng chuan Ainia chu an hmu a, Lalpa lam an hawi ta hlawm a.

³⁶Tin, Joppa khuaah a hming Tabithi, zirtîr pakhat a awm a (A Grik hming chu Dorki a ni a, “sazukla” tihna a ni). Chu hmeichhia chuan thil tihṭhat leh thilpêk a ngah hle a.

³⁷Tin, chûng lai chuan a damlo va, a thi ta a; tin, an bual fai a, pindan chungnungah an zalh a.

³⁸Tin, Ludda khua chu Joppa khaw kiang a nih avângin, zirtîrteho chuan chutah chuan Petera a awm tih an hria a, “Rei rial lovin kan hnênah lo kal ang che,” tia ngên chiam tûrin a hnênah mi pahnih an tîr a.

³⁹Tin, Petera chu a tho va, an hnênah a kal ve ta a. Tin, a thlen veleh pindan chungnungah chuan an hruai a; hmeithai zawng zawng chu a kianga dingin, Dorki an hnêna a awm laia a kawr siam te, a puan siamte entîr chungin an ṭap hlawm a.

⁴⁰Nimahsela, Petera chuan an zain a chhuahtîr vek a, a ṭhingṭhi a, a ṭawngṭai ta a; tin, a ruang lam a hawi a, “Tabith, tho rawh,” a ti a. Tichuan, a mit a han meng a, Petera chu a hmuh veleh a ṭhu ta hlawl a.

⁴¹Tin, Petera chuan a kut a pe a, a kai tho ta a; tin, mi thianghlimte leh hmeithaite chu a ko va, damin a kawhhmuh a.

⁴²Tin, chu chu Joppa khua zawng zawng chuan an hre ta vek a; mi tam takin Lalpa chu an ring ta a.

⁴³Tin, Petera chu Joppa khuaa Simona, savun siamtu inah ni tam tak a châm a.