Read Mizo_Old_version KHUAA MITE HNENA TIRHKOH PAULA LEHKHATHAWN ROM 11 Bible Online

KHUAA MITE HNENA TIRHKOH PAULA LEHKHATHAWN ROM 11 - Mizo_Old_version bible

KHUAA MITE HNENA TIRHKOH PAULA LEHKHATHAWN ROM 11

¹A nih leh, Pathianin a mite chu a paih thla em ni? Hnai lo ve. Kei pawh Israel mi, Abrahama thlah, Benjamin hnam ka ni si a.

²Pathianin a mi hriat lâwkte chu a paih thla lo ve. Pathian Lehkha Thuin Elija thu a sawi hi in hre lo vem ni? Ani chuan Israel mite chungthu Pathian hnênah a thlen a,

³“Lalpa, i zâwlneite an tihlum a, I maichâmte an tichim a; Keimah chauh ka la awm a, Kei pawh mi tihhlum an tum a ni,” a tih hi.

⁴Nimahsela, Pathianin engtin nge a chhân? “Baala hmaa ṭhingṭhi ngai lo mi sângsarih ka tân ka la zuah reng a ni,” tiin a chhâng a.

⁵Chutiang bawkin tûnlai pawh hian, khawngaiha thlan ang zia ziain paih thlâk bâk chu an la awm.

⁶Khawngaihna vâng a nih chuan thiltih vâng a ni tawh lo vang; chuti a nih loh chuan khawngaihna hi khawngaihna a ni tawh lo vang.

⁷Engtin nge ni ta ang le? Israel mite chuan an zawn chu an hmu lo va, thlante erawh chuan an hmu a, a dang zawng zawngte chu an chawlawl zo tawh a.

⁸“Pathianin vawiin thlengin an hnênah mutthlûkna thlarau a pe a, hmuh theih lohna mitte, hriat theih lohna bengte nên,” tih ziak ang khân.

⁹Tin, Davida chuan, “An dawhkân chu an tân thang leh, fal leh, Tlûkna leh thungrulhna lo ni rawh se;

¹⁰An hmuh theih loh nân an mitte lo thim rawh se, Nangin an hnungzâng kûntîr fo vang che,” a ti a.

¹¹A nih leh, an petek chu an tlûk hlenna tûr em ni? Hnai lo ve. An tlûk avângin Jentailte hnênah chuan chhandamna a lo thleng ta zâwk a ni, Israel mite thîktîr nân.

¹²Tichuan, an tlûkna mah khawvêl tihhausakna a niha, an kiamna mah Jentailte hausakna a nih bawk chuan, an famkimna chu an hausakna a va ni lehzual dâwn em!

¹³Chutichuan, nangni Jentailte hnênah ka sawi a ni. Kei, Jentailte tirhkoh ka nih avângin ka chipuite ka thîktîr theih hrâmna tûr leh, an zînga ṭhenkhatte ka chhandam theihna tûrin ka rawngbâwlna hi ka chawimawi a ni.

¹⁵Anmahni paih thlâkna mah khawvêl ṭhian lehna a nih chuan, anmahni lawm lehna tûr chu thihna ata nun lehna lo chu eng nge ni ang?

¹⁶Tin, chhang hlâwm sawh thlâk hmasak chu a thianghlim chuan, a hlâwm pum chu chutiang bawk chu a ni; tin, a zung chu a thianghlim chuan a zârte chu chutiang bawk chu a ni.

¹⁷Tin, a zâr ṭhenkhatte chu tihtliaha a awmin, nang, olive suak nia, anmahni zînga zawmin i awma, olive thinga ṭhatna zung ṭâwm ve tawh i nih chuan,

¹⁸zâr dangte lakah chuan inchhuang suh. Inchhuang mah la, nang chu a zung châwmtu i ni lo va, a zung chu a châwmtu che a ni zâwk e.

¹⁹Tin, nangin, “Zawma ka awm theih nân zârte tihtliahin an awm tawh alâwm,” i ti ang le.

²⁰A ni, an rin lohna avângin tihtliahin an awm a, nang chu i rinna avângin i ding a ni. Chapo suh la, hlau zâwk rawh;

²¹Pathianin zâr takte chu a zuah si loh chuan nang pawh a zuah bîk lo vang che.

²²Chutichuan, Pathian ṭhatzia leh a ṭihbaiawmzia chu ngaihtuah rawh, a tlute tân chuan a ṭihbaiawm a ni; nanga tân erawh chuan a ṭha a ni, a ṭhatnaa i awm reng chuan; chuti lo chuan, nang pawh sah thlâkin i awm ve ang.

²³Tin, anni pawh chu ring lova an awm reng loh chuan zawmin an awm ang; Pathianin anmahni a zawm leh thei si a.

²⁴Nang olive suak rêng ata sah chhum mah, pian dân lo anga olive thing ṭhaah zawma i awm chuan, chûng a zâr taktakte chu anmahni olive thing pângngaiah chuan zawm an va ni dâwn nasa êm!

²⁵Unaute u, he thurûk hi in hriat loh ka duh si lo; chuti lo chuan, in intifing ang; Jentailte famkimna a lo thlen hma chuan Israel mi ṭhenkhatte chungah chawlawlna a lo thleng rih a ni, tih hi;

²⁶chutichuan, Israel mi zawng zawng chhandamin an awm ang; “Zion aṭangin Chhandamtu chu a lo chhuak ang a, Jakoba hnên ata Pathian ngaihsak lohna a tibo vang.

²⁷Chu chu an hnêna ka thuthlun tûr chu a ni, An sualte ka lâk bo hunah chuan,” tih ziak ang khân.

²⁸Chanchin Ṭha lam ngaihtuah chuan nangmahni avângin hmêlma an ni a; thlan thu lam ngaihtuah erawh chuan thlahtute avâng khân duh takte an ni.

²⁹Pathianin a thilthlâwnpêkah leh a kohnaah chuan a rilru a lamlêt ngai si lo va.

³⁰Hmânah chuan Pathian thu in awih lo va; nimahsela, tûnah chuan an awih loh avângin khawngaihna in hmu si a.

³¹Chutiang bawkin, tûnah chuan Pathianin a khawngaih che u avâng hian, khawngaihna an hmuh ve theihna tûrin anni pawh chuan an awih ta lo a nih hi.

³²Pathianin a khawngaih vek theih nân mi zawng zawng awih lohnaah a khung ta vek si a.

³³Pathian finna leh hriatna ngahzia chu a va thûk êm! A rorêlnate chu hriat theih rual leh, a kawngte chu chhui theih rual a va ni lo êm!

³⁴Lalpa rilru chu tuin nge hria? Tu nge a remruatsaktuah pawh ṭang tawh?

³⁵A rulh leh tûr pawhin a hnênah tuin nge thil pe hmasa?

³⁶Amah aṭang leh, amah avâng leh amaha tân thil zawng zawng hi a lo awm a ni si a; a hnênah chuan chatuanin ropuina chu awm rawh se. Amen.