Read Mizo_Old_version KHUAA MITE HNENA TIRHKOH PAULA LEHKHATHAWN ROM 13 Bible Online

KHUAA MITE HNENA TIRHKOH PAULA LEHKHATHAWN ROM 13 - Mizo_Old_version bible

KHUAA MITE HNENA TIRHKOH PAULA LEHKHATHAWN ROM 13

¹Mi tin an chunga rorêltute thu thuin awm rawh se. Pathian thu lovin tu mah rorêltu an awm si lo; rorêltua awmte hi Pathian ruat an ni.

²Chuvângin, tu pawh rorêltu hnial chu Pathian ruat dodâl an ni a; a dodâltute chuan anmahni chungah rorêlna an hmu ang.

³Rorêltute chu thil ṭha titu tân chuan hlauhawm an ni lo va; thil ṭha lo titu tân erawh chuan hlauhawm an ni. A nih leh, rorêltu hlau lova awm i duh em? Thil ṭha ti la, a fak i hlawh ang chu;

⁴ani chu i ṭhatna tûra Pathian rawngbâwltu a ni si a. Nimahsela, thil sual i tih chuan hlau rawh, khandaih chu a keng mai mai si lo va; ani chu Pathian rawngbâwltu, thil tisualtu chunga thinura phuba latu a ni si.

⁵Chuvângin, thinur hlauh vâng chauh ni lovin, i chhia leh ṭha hriatna avâng pawhin rorêltu thu thuin i awm tûr rêng a ni.

⁶Hemi avâng hian chhiah pawh in chawi ṭhîn alâwm; chutiang thil ngei ti fan fan tûrin Pathian rawngbâwltute an ni si a.

⁷Mi zawng zawng hnênah pêk tûr apiang pe rawh u; lei man pêkna tûra hnênah chuan lei man pe ula; chhiah chawina tûra hnênah chuan chhiah chawi ula; ṭih tûra chu ṭih ula; pawisak tûra chu pawisa rawh u.

⁸Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan dân chu a zawh famkim tawh si a.

⁹Hêng, “Uire suh, tualthat suh, ru suh, awt suh,” tih leh thupêk dang la awm rêng rêngte hi, “Nangmah i inhmangaih angin i vêngte i hmangaih tûr a ni,” tih hian a khai khâwm vek si a.

¹⁰Hmangaihnain vêngte a tikhawlo ngai lo va; chuvângin, hmangaihna hi dân zawh famkimna a ni.

¹¹Tûnlai thil awmzia in hriat avâng leh, muhîl thawhharh a hun tawh takzet tih in hriat avângin chu chu ka sawi a ni; tûnah chuan kan rin tirh lai ai khân kan chhandamna chu a hnai ta zâwk si a.

¹²Zân hi a ral lek lek tawh a, khua a vâr dâwn ta e; chuvângin, thima thiltih chu paih ila, êng thuamin i inthuam ang u.

¹³Chhûna awm angin mawi takin i awm ang u, zu in buai leh zu ruia awm lovin, hur leh inngaih hmanga awm lovin, insual leh inîtsîka awm lovin.

¹⁴Lal Isua Krista chuan inthuam zâwk ulang, in tisa châkna puitlin tûrin eng mah insiam suh u.