Read Mizo_Old_version KHUAA MITE HNENA TIRHKOH PAULA LEHKHATHAWN ROM 4 Bible Online

KHUAA MITE HNENA TIRHKOH PAULA LEHKHATHAWN ROM 4 - Mizo_Old_version bible

KHUAA MITE HNENA TIRHKOH PAULA LEHKHATHAWN ROM 4

¹A nih leh, Abrahama, tisa dâna min thlahtu chuan eng nge a hmuh kan tih ang?

²Abrahaman thiltih avânga thiam a chan si chuan chhuan tûr a nei a ni; Pathian lamah erawh chuan a nei lo ve.

³Pathian Lehkhain eng nge a sawi ni? “Abrahama chuan Pathian a ring a; tin, chu rinna chu a felnaa ruat a ni,” tiin a sawi a ni.

⁴Tin, hnathawktu hlawh chu khawngaihnaa ruat a ni lo va, bata ruat a ni zâwk e.

⁵Amaherawhchu, hna thawk lova, Pathian ngaihsak lo, thiam chantîrtu ring zâwka rinna chu, ama felnaa ruat a ni.

⁶Mi, a thiltih ngaihtuah lova Pathianin fela a ruata chu mal a sâwmsak thu Davida pawhin:

⁷“An bawhchhiatnate ngaihdama awm leh, An sualte khuha awm chu An eng a thâwl e.

⁸Lalpan khawlohna neia a ruat loh chu A eng a thâwl e,” tia a sawi ang khân.

⁹A nih leh, chu mi engthâwlna chu serh tanho chungah chauh nge a awm, serh tan lohho chungah pawh? “Abrahama rinna chu a felnaa ruat a ni,” kan ti si a.

¹⁰Chu chu engtia ruat nge ni le? A serh tan hnuah nge, a serh tan hmain? A serh tan hnuin a ni lo va, a serh tan hmain a ni zâwk.

¹¹Chutichuan, serh tan lova a awm laia rinnaa felna a hmu tih hriatna, serh tan chhinchhiahna chu a hmu a; chu felna chu an tâna ruat a nihna tûrin, serh tan lohte zînga ringtu zawng zawng pa a nih theih nân;

¹²serh tanho pa pawh a nih theih bawk nân - serh tan mai pa a ni lo va, kan pa Abrahama serh tan lova a awm laia rinna a neih ang nei fâwmte pa a ni zâwk.

¹³Dân avângin Abrahama leh a thlahte hnênah chuan khawvêl ro luahtu tûr a ni ang tih thu zawng tiam a ni si lo va, rinnaa felna avângin a ni zâwk e.

¹⁴Dâna mite chu ro luahtute an nih si chuan, rinna engah mah a tlâktlai lo va, thutiam pawh chu eng mah a ni ta lo va;

¹⁵Dân chuan thinurna a siam si ṭhîn a; Dân awm lohnaah erawh chuan bawhchhiatna pawh a awm hek lo.

¹⁶Chuvângin, khawngaihnain a nih theih nân rinna avângin a nih hi, thlahte zawng zawng chuan thutiam chu matheilova an hmuhna tûrin, Dân nei mite chauhvin an hmu lo vang a, Abrahama neih ang rinna neite pawhin an hmu bawk ang. Mitthite tinungtu leh, thil awm lote awm anga sawitu, a rin Pathian mit hmuhah chuan Abrahama chu kan zaa pa a ni (“Chi tam takte paah ka siam a che,” tih ziak ang khân).

¹⁸Beiseina âwm a awm loh pawhin ani chuan beisei takin a ring a, chi tam takte pa a lo nih theih nân; “Khiti zât khian i thlahte an la awm ang,” tia hrilh ang khân.

¹⁹Tin, rinna nghet lo chuang lovin, a taksa thi tawh anga awm chu a ngaihtuah a (amah chu kum za lai mi a ni si a), Sari chin pawh a ngaihtuah bawk a;

²⁰nimahsela, rinna tlachhamin Pathian thutiam chu a ringhlel lo va, Pathian a chawimawi a,

²¹a thutiam chu a hlawhtlintîr thei tih a awih hle bawk a, a rinna chu a lo nghet ta zâwk a.

²²Chuvângin, a rinna chu a felnaa ruat a lo ni tawh.

²³Chutichuan, a rinna chu a felnaa ruat a ni tih hi amah vâng chauhva ziak a ni lo va,

²⁴keimahni vâng pawhin a ni. Isua kan Lalpa mitthi zîng ata kaithotu chu ringtu kan ni a, kan rinna chu felnaa ruat a ni dâwn.

²⁵Chu Isua chu kan sual avângin mantîrin a awm a, thiam kan channa tûrin kaihthawhin a awm bawk a.