Read Mizo_Old_version KHUAA MITE HNENA TIRHKOH PAULA LEHKHATHAWN ROM 5 Bible Online

KHUAA MITE HNENA TIRHKOH PAULA LEHKHATHAWN ROM 5 - Mizo_Old_version bible

KHUAA MITE HNENA TIRHKOH PAULA LEHKHATHAWN ROM 5

¹Chuvângin, rinna avânga thiam changa awmin, kan Lalpa Isua Krista avângin Pathian nên inremin i awm ang u;

²amah avâng vêk chuan he khawngaihna kan din nghehnaah hian rinnain kan lût ta a; Pathian ropuina beiseiin lâwmin i awm bawk ang u.

³Tin, chuti chauh chu ni lovin, kan hrehawmnaah pawh lâwmin i awm ang u, hrehawmna chuan chhelna a siam a,

⁴chhelna chuan hriat fiahna a siam a, hriat fiahna chuan beiseina a siam tih kan hre si a;

⁵tin, Thlarau Thianghlim kan hnêna min pêk khân Pathian hmangaihna chu kan thinlunga a leih tawh avângin, beiseina chuan a timualpho lo va.

⁶Kan la chak loh lai khân a hun têin Krista chu mi sualte ai chuan a lo thi ta si.

⁷Mi fel aia thih miin a duh âwm lo hle si a, mi ṭha ai erawh chuan mi tu emaw tal chuan thih a ngam mial mahna.

⁸Nimahsela, Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân.

⁹Chutichuan, a thisena thiam chantîra kan awm tawh hnu hian, amah avângin Pathian thinurna lak ata chu chhandamin kan awm ngei ang.

¹⁰Hmêlma kan nih lai maha a Fapa thihna avânga Pathian nêna lo inrem tawh kan nih si chuan, inrema kan awm tawh hnu hian a nunna avângin chhandamin kan awm ngei ang.

¹¹Chuti chauh pawh a ni lo va, inremna tûna min hmuhtîrtu, kan Lalpa Isua Krista avâng chuan Pathianah kan lâwm bawk a ni.

¹²Chutichuan, mi pakhat avângin khawvêlah sual a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin, thihnain mi zawng zawng a fan chhuak ta a.

¹³Dân awm hmain khawvêlah sual a awm tawh si a; dân a awm si loh chuan sual chu suala ngaih a ni lo;

¹⁴nimahsela, Adama awm achin Mosia awm thlengin, Adama bawhchhiatna anga thil tisual lote chungah pawh thihna chuan ro a rêl ṭhîn. Adama chu lo la kal tûra nên tehkhinna a ni.

¹⁵Nimahsela, thilthlâwnpêk chu sualna nên a inang lo bawk. Mi pakhat sual avâng mah khân mi tam tak chu an thih si chuan, Pathian khawngaihna leh mi pakhat, Isua Krista khawngaihna avânga thilpêk chu mi tam tak chungah vûrin a awm ngei ang.

¹⁶Tin, thilpêk chu mi pakhat sual avânga thil lo awm nên a inang hek lo; thiam loh chantîrna rorêlna chu mi pakhat avângin a lo awm a, thiam chantîrna thilthlâwnpêk erawh chu sual tam tak avângin a lo awm ta zâwk si a.

¹⁷Mi pakhat sual avânga thihnain chu mi pakhat avâng maha ro a rêl si chuan, khawngaihna nasa tak leh felna thilpêk hmutute chuan, mi pakhat (Isua Krista) avâng khân nunnaah chuan ro an rêl ngei ang.

¹⁸Chutichuan, sual pakhat avângin thiam loh chantîrna rorêlna chu mi zawng zawng chungah a lo awm a; chutiang bawkin thil fel pakhat tih avângin, nunna hmuh nân thiam chantîrna thilthlâwnpêk chu mi zawng zawng chungah a lo awm.

¹⁹Mi pakhat tihmawh avâng khân mi tam tak chu mi sual an lo ni ta a; chutiang bawkin mi pakhat tihawih avâng khân mi tam tak chu mi fel an lo ni ang.

²⁰Tin, sual a lan lehzual theih nân Dân a lo awm lehnghâl a. Nimahsela, sual a punna apiangah khawngaihna chu a pung lehzual ṭhîn;

²¹sual chuan thihnain ro a rêl ang takin, khawngaihna chuan felnain chatuan nun channa khawp hialin kan Lalpa Isua Krista zâra ro a rêl theih nân.