Read Mizo_Old_version KHUAA MITE HNENA TIRHKOH PAULA LEHKHATHAWN ROM 6 Bible Online

KHUAA MITE HNENA TIRHKOH PAULA LEHKHATHAWN ROM 6 - Mizo_Old_version bible

KHUAA MITE HNENA TIRHKOH PAULA LEHKHATHAWN ROM 6

¹Eng nge kan sawi tâk ang le? Khawngaihna chu a pun lehzual theih nân sualin kan awm reng dâwn em ni?

²Hnai lo ve. Keini sual kawnga thi tawh sualin engtin nge kan la nun theih cheu vang?

³Keini zîngah Krista Isuaa baptisma chang apiangte chu a thihnaah baptis-in kan awm tih in hre lo em maw ni?

⁴Chuvângin, a thihnaah baptisma kan chanin, a hnêna phûm vein kan awm; Pa ropuinain mitthi zîng ata Krista a kaihthawh ang khân, keini pawh nunna tharin kan awm theih nân.

⁵A thihna anpuia amah nên kan inzawm tawh si chuan, a thawhlehna anpui pawhin kan inzawm bawk ang.

⁶Hêng hi hria ila: kan mihring hlui chu a hnênah khen behin a awm ve ta, sual pu taksa chu tihborala a awm theih nân, tûn achinah sual bawiha kan awm lohna tûrin.

⁷Tu pawh thi tawh chu sual lakah a chhuak tawh si a.

⁸Tin, Krista hnêna kan thih ve tawh chuan a hnênah kan nung ve bawk ang tih kan ring a ni;

⁹Krista chu mitthi zîng ata kaihthawhin a awm a, a thi leh dâwn tawh lo tih kan hre si a; thihna chuan ama chungah thu a nei tawh lo.

¹⁰A thihna chu sual lam kawngah chatuan atân vawi khat chauh a thi a ni, a nunna erawh chu Pathian lam kawngah a nung a ni.

¹¹Chutiang bawkin nangni pawh sual lam kawngah thi tawhah inruat ula, Pathian lam kawngah erawh chuan Krista Isuaah nungah inruat rawh u.

¹²Chuvângin, in taksa duh zâwng in zawmna tûrin in taksa thi theiah chuan sualnain rorêl suh se.

¹³In taksa pêngte pawh fel lohna hriamhrei atân sualna hnênah pe phal hek suh u; amaherawhchu, mitthi zîng ata nung leh angin Pathian hnênah inpe ula, in taksa pêngte pawh chu felna hriamhrei atân Pathian hnênah pe phal zâwk rawh u.

¹⁴Sualnain in chungah thu a nei dâwn tawh si lo, dân rorêla awm in ni lo va, khawngaihna rorêla awm in ni zâwk si a.

¹⁵Engtin nge ni ang le? Dân rorêla awm kan nih lohva, khawngaihna rorêla awm kan nih zâwk avâng hian kan sual tûr em ni ang? Hnai lo ve.

¹⁶Tu hnênah pawh an thu awih tûra bawiha in luh chuan (thihna khawpa sual bawih emaw, felna khawpa thu awih bawih emaw), a thu in awiha bawih chu in ni tih in hre lo vem ni?

¹⁷Amaherawhchu, sual bawihte ni mah ula, zirtîr dân a hnêna in inpêkna chu rilru takzetin in lo awih a; tin, sual lak ata chhuahin in awm a, felna bawihte in lo ni ta a; chuvângin, Pathian hnênah lâwm thu awm rawh se

¹⁹(in tisa chak lohzia avângin mihring dânin thu ka sawi a ni e); in taksa pêngte chu bawlhhlawhna hnênah leh, bawhchhiatna tûrin bawhchhiatna hnênah bawiha in pe phal ang khân, tûnah in taksa pêngte chu thianghlimna tûrin felna hnênah bawihah pe phal rawh u.

²⁰Sual bawihte in nih lai khân felna lakah in fihlîm a ni.

²¹Tûna in thil zahpui tâkahte hian, khâng lai khân rah eng nge in lo hmuh ṭhin le? Khâng thil tâwpna kha thihna a ni ṭhîn asin.

²²Tûnah erawh chuan sual lakah tihfihlîma awma, Pathian bawihte in lo nihin, thianghlimna hmu khawpin in rah in nei asin, chumi tâwpna - chatuana nunna nên.

²³Sual man chu thihna a ni si a; Pathian thilthlâwnpêk erawh chu, kan Lalpa Krista Isua zârah chuan chatuana nunna a ni.