Read Mizo_Old_version KHUAA MITE HNENA TIRHKOH PAULA LEHKHATHAWN ROM 9 Bible Online

KHUAA MITE HNENA TIRHKOH PAULA LEHKHATHAWN ROM 9 - Mizo_Old_version bible

KHUAA MITE HNENA TIRHKOH PAULA LEHKHATHAWN ROM 9

¹Kristaah chuan thu tak tak ka sawi a ni, ka daw lo ve, Thlarau Thianghlim zârah chuan ka chhia leh ṭha hriatna pawh hian mi hriatpui a.

²Ka thinlungah hian hrehawmna nasa tak leh lungngaihna reh thei lo ka pai asin.

³Ka unaute, tisa lama ka chipuite aiah hian, kei hi Krista hnên ata tihhran khawpin ânchhe dawngin awm hial ila ka ti si a;

⁴Israel mi an ni si a; fa nihna te, ropuina te, thuthlung zawng zawng te, Dân pêkna te, Pathian rawngbâwlna te, thutiam zawng zawng te an ta a ni a;

⁵pute chu an ta a ni bawk a, tisa lam thu-ah Krista chu anmahni zîng ata lo chhuak a ni bawk a; ani chu thil zawng zawng chunga awm, chatuana fak tlâk Pathian a ni. Amen.

⁶Nimahsela, Pathian thu chu engmahlo anga awm ta a ni lo ve. Israela thlahte chu Israel mi an ni vek lo ve;

⁷Abrahama thlahte an nih avângin an zain a fate an ni vek hek lo; “Isaaka-ah hian i thlahte an ti ang,” tih a ni zâwk.

⁸Chu chu, tisa fate chu Pathian fate an ni lo va, thutiam fate chu Abrahama thlaha ruat an ni zâwk tihna a ni.

⁹Thutiam chu hei hi a ni: “Tûn ang hun hian ka lo kal ang a, Sari chuan fapa a hring ang,” tih hi.

¹⁰Chu chang a ni lo ve, Rebeki pawhin mi pakhat (kan pu Isaaka) laka phîr a pai lai khân -

¹¹nautê chu an la pian hmaa, chhia leh ṭha an la tih hmain, thiltih vâng ni lovin, a kotu duh vâng ni zâwkin, thlan lam thu-ah Pathian thuruat chu a ngheh theih nân -

¹²a hnênah chuan, “A upa zâwkin a naupang zâwk rawng a bâwl ang,” Pathianin a tih kha.

¹³“Jakoba ka hmangaih a, Esauva erawh chu ka hua,” tih ziak ang khân.

¹⁴Eng nge kan sawi tâk ang le? Pathianah chuan fel lohna a awm em ni? Hnai lo ve.

¹⁵Ani chuan, “Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang,” tiin Mosia hnêna a sawi si kha.

¹⁶Chuvângin, a duhtu vâng a ni lo va, a tlantu vâng a ni hek lo, a khawngaihtu Pathian vâng a ni zawk e.

¹⁷Pathian Lehkha Thuin Pharaoa hnênah chuan, “Hemi avâng ngawt hian ka tungding chia, nangmahah chuan ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a.

¹⁸Chutichuan, Pathianin a duh apiang a khawngaih ṭhîn a, a duh apiang pawh a tiluhlul ṭhîn a ni.

¹⁹Nang chuan ka hnênah, “Engati nge a la dem cheu ni? A duh zâwng tuin nge dodâl ni?” i ti dâwn a ni âwm e.

²⁰A ni; nimahsela, aw mihring, Pathian hnial veitu chu tu nge maw i nih le? Thil siam chuan a siamtu hnênah, “Engati nge hetianga mi siam?” a ti ang em ni?

²¹Bellei tlang khatin bêl pakhat hlu tak leh, bêl dang pakhat hlu lo taka siam tûrin bêlvawtu chuan bellei chungah thu a nei lo vem ni?

²²Khawngaihna bêl, ropui tûra a lo buatsaih lâwkate chungah chuan, a khawngaihna ngahzia a entîr theih nan, thinurna bêl boral tlâkte chungah chuan Pathianin a thinur leh a thiltihtheihna lantîr duh mah sela, a dawh hrâm hrâm chuan eng nge pawi ang?

²⁴(Chu khawngaihna bêlte chu Juda-te zîng ata chauh ni lovin, Jentailte zîng ata pawh kohte kan ni.)

²⁵Hosea lehkhabuah chuan: “Ka mite ni ngai lo chu ‘Ka mite’ ka ti ang; Tin, hmangaih ngai lohvi chu, ‘Hmangaihi’ ka ti ang.

²⁶Tin, heti hi a lo ni ang a, an hnênah, ‘Ka mite in ni lo ve,’ a tihna hmunah ngei chuan Pathian nung fate vuahin an awm ang,” tia ziak ang bawk khân.

²⁷Isaia pawhin Israel mite thu aupuiin, “Israel mite chu tuifinriata ṭiau zâtin tam mah sela, a hrem bâk chauh chu chhandamin an awm ang.

²⁸Lalpa chuan rang taka ti zo diamin lei chungah a hrem tûr thu a hlen dâwn si a,” a tih kha.

²⁹Isaia vêkin, “Mipuite Lalpa chuan chi thlahtu min lo zuahsak suh sela chu, Sodom khua angin kan awm tawh ang a, Gomorra khua anga siamin kan awm tawh bawk ang,” tia a lo sawi lâwk ang bawk khân.

³⁰Eng nge kan sawi tâk ang le? Jentail, felna ûm lote chuan felna an lo phâk tawh a ni - rinna avânga felna chu.

³¹Israel, felna dan ûmte erawh chuan felna dân chu an phâk zo ta lo.

³²Eng vâng nge ni? Rinnain an ûm lohva, thiltiha hmuh theih angin an ûm vâng a ni. Tlûkna lungah chuan an tlu si a;

³³“Ngai teh, Zion-ah chuan tlûkna lung leh Dâlna lungpui ka dah a, Tu pawh amah ring apiang chu A mualpho lo vang,” tih ziak ang khân.