Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 11 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 11 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 11

¹Mi zirtute ni rawh u, kei pawh Krista zirtu ka ni ang bawk hian.

²Tin, engkima mi hriat reng avâng leh, thurochhiah ka hrilh che u ang taka in vawn tlat avângin ka fak a che u.

³Amaherawhchu, mipa tawh phawt lu chu Krista a ni, hmeichhe lu chu mipa a ni, Krista lu chu Pathian a ni tih in hriat ka duh a ni.

⁴Mipa, lukhum khum chunga ṭawngṭai emaw, thuhril emaw apiangin an lu chu an timualpho a ni.

⁵Amaherawhchu, hmeichhia, lukhum khum lova ṭawngṭai emaw, thu hril emaw apiangin an lu an timualpho a ni; ziah kâwn nên thuhmun reng a ni si a.

⁶Hmeichhia lukhum khum lova a awm si chuan, mêt law law rawh se; amaherawhchu, hmeichhe tân lu meh emaw, ziah kâwn emaw a zahthlâk si chuan lukhum khum zâwk rawh se.

⁷Mipa zawng Pathian anpui leh ropuina a nih avângin, lukhum khum tûr a ni lo rêng rêng si a; hmeichhia erawh chu mipa ropuina a ni.

⁸Mipa hi hmeichhia aṭanga chhuak a ni lo va; hmeichhia erawh chu mipa aṭanga chhuak a ni zâwk a.

⁹Mipa hi hmeichhe tâna siam a ni hek lo; hmeichhia erawh chu mipa tâna siam a ni zâwk.

¹⁰Chumi avâng chuan, vântirhkohte avângin hmeichhiain a lu-ah mipa thuneih chhinchhiahna a khum tûr a ni.

¹¹Nimahsela, Lalpaah chuan hmeichhia hi mipa tel lovin a awm thei lo va, mipa pawh hi hmeichhia lovin a awm thei hek lo.

¹²Hmeichhia hi mipa aṭanga chhuak a ni ang bawkin, mipa pawh hi hmeichhe laka piang a ni si a; amaherawhchu, engkim hi Pathian aṭanga chhuak vek a ni.

¹³Nangmahni inngaihtuah rawh u, hmeichhiain lukhum khum lova Pathian hnêna ṭawngṭai hi a mawi em ni?

¹⁴Mipa hian sam sei a neih chuan a tân a zahthlâk a ni tih, in thinlung pianpui pawhin a hriattîr lo che u em ni?

¹⁵Hmeichhia erawh chuan sam sei a neih chuan a tân ropuina a ni zâwk; a sam chu a khuhna tûra pêk a ni si a.

¹⁶Eng pawh ni rawh se, hnial an awm a nih pawhin keini zîngah chutiang dân kan nei lo, Pathian kohhranho pawhin an nei hek lo.

¹⁷Amaherawhchu, he thu ka hrilh che uah hian ka fak thei lo a che u, in ṭhat lehzualna tûr lam ni lovin, in chhiat lehzualna tûr lam zâwka in inkhâwm ṭhin avâng hian.

¹⁸A hmasa berin, kohhranhova in inkhâwmin in zîngah inṭhenna a awm ṭhîn tih mi sawi ka hre si a; rin pawh ka ring deuh bawk a ni.

¹⁹In zînga a taktakte chu an lan theih nân, in zîngah rin hranna pawh a awm bawk tûr rêng a ni.

²⁰Chutichuan, in inkhâwmin, Lalpa Zanriah ei rual tûr a ni lo,

²¹mi tinin in eiin mahni zanriah in ei hmasa si ṭhîn a; tichuan, mi pakhat ril a ṭâm a, mi pakhat a rui si a.

²²Engtizia nge? Ei leh inna tûr in in nei lo vem ni? A nih loh leh, Pathian kohhranho in hmusitin, eng mah nei lote chu in mualpho em ni? In hnênah eng nge ka sawi tâk ang? Ka fak dâwn che u em ni? Hemi kawngah hian ka fak thei lo a che u.

²³Ka thu hrilh chhâwn che u kha Pathian hnên ata ka hmuh asin, khatia, Lalpa Isua chuan mantîra a awm zâna chhang a lâka,

²⁴lâwm thu a sawi zawha a phela, “Hei hi ka taksa, in aia pêk tûra chu a ni, mi hriat reng nân hei hi ti ṭhîn rawh u,” a tih kha.

²⁵Chutiang bawka zanriah ei zawha no pawh chu a lâka, “He no hi ka thisena thuthlung thar chu a ni, in in apiangin mi hriat reng nân hei hi ti ṭhîn rawh u,” a tih kha.

²⁶Chu chhang chu in eia, no chu in in apiangin, a lo kal leh hma loh zawng Lalpa thihna chu in entîr ṭhîn a ni si a.

²⁷Chuvângin, tu pawh ei tlâk lova chhang chu ei emaw, Lalpa no in emaw apiang chuan, Lalpa taksa leh thisen chungah thiam loh a chang ang.

²⁸Chutichuan, mi mahni infiah chawp zâwk rawh se, chutiangin chhang chu eiin no chu in rawh se.

²⁹A ei leh a intu chuan Lalpa taksa chu khûn taka a ngaihtuah si loh chuan, mahni chunga rorêlna tûrin a eiin a in ṭhîn a ni si a.

³⁰Chuvângin, in zînga mi tam tak in chak lovin in bawrhsâwm a ni, duai pawh in muhîl lo ve.

³¹Amaherawhchu, khûn takin mahni inngaihtuah ṭhîn ila chuan rorêlsakin kan awm ṭhîn lo tûr.

³²Nimahsela, rorêlsaka kan awm pawhin, khawvêl nêna thiam loh changa kan awm ve loh nân, Lalpa thununin kan awm ṭhîn a ni.

³³Chuvângin, ka unaute u, ei tûra in inkhâwmin innghâk hlawm ṭhîn rawh u.

³⁴In inkhâwm chu rorêlna in tuar phah lohna tûrin, tu pawhin a ril a ṭâm chuan a in lamah ei rawh se. Tin, thu dang chu ka lo kal hun hunah ka rawn tifel ang e.