Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 14 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 14 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 14

¹Hmangaihna hi ûm zêl ula; thlarau lam thilpêkte pawh châk cheu rawh u; amaherawhchu, thu in hril theihna tûr lek phei chu châk bîk rawh u.

²Ṭawng hriat lohva thu sawi chuan mihring hnêna sawi ni lovin, Pathian hnêna sawi a ni zâwk si a, tu mân a thusawi chu an hre si lo; nimahsela, thlarauvah chuan thurûk a sawi a ni.

³Thuhriltu erawh chuan mihring hnênah siam ṭhatna thu te, fuihna thu te, thlamuanna thu te a sawi zâwk ṭhîn.

⁴Ṭawng hriat lohva thu sawi chuan mahni chauh a insiam ṭha ṭhîn, thuhriltu erawh chuan kohhranho a siam ṭha zâwk ṭhîn.

⁵Tin, in zain ṭawng hriat lohtea thu in sawi ka duhsak che u a; chu ai mah chuan, thu in hril ka duhsak lehzual che u a ni; kohhranhovin insiamṭhatna an hmuh theihna tûrin, a hrilhfiah leh nghâl loh chuan, thuhriltu chu ṭawng hriat lohtea thusawitu ai chuan a ropui zâwk rêng rêng a ni.

⁶Tûnah hian unaute u, ṭawng hriat lohtea thu sawiin in hnênah lo kal ang ila, hriattîrna lam emaw, hriatna lam emaw, thuhrilna lam emaw, zirtîrna lam emaw in hnêna ka sawi si loh chuan, eng nge ka tihsâwtna che u awm ang?

⁷Thil nung lo ri theite pawh, phênglâwng emaw, ṭingṭang emaw hi mumal neia a rîk loh chuan, eng hla nge an tuma an kaih, engtin nge a hriat theih ang?

⁸Tawtawrâwt hi mumal nei lova a rîk chuan tu nge râl kâp tûrin inbuatsaih ang?

⁹Chutiang bawkin nangni pawhin lei hian ṭawng hriat awla in sawi loh chuan, eng thu nge in sawi engtin nge a hriat theih ang? Boruaka ṭawng mai in ni ang asin.

¹⁰Khawvêlah hian ṭawng chi hrang tam tak a awm a ni ang e; nimahsela, awmze nei lo rêng rêng a awm si lo.

¹¹Amaherawhchu, a ṭawng awmzia chu ka hriat si loh chuan kei hi a sawitu tân awze mi ka ni ang a; a sawitu pawh chu ka tân awze mi a ni bawk ang.

¹²Chutichuan, nangni pawhin thlarau lam thilpêkte chunga ṭhahnem in ngaih avâng hian, kohhran siam ṭhatna tûra in ngah theih nân zawng rawh u.

¹³Chuvângin, ṭawng hriat lohva thu sawi chuan a hrilhfiah theih nân ṭawngṭai rawh se.

¹⁴Ṭawng hriat lohva ka ṭawngṭai chuan, ka thlarau zawng a ṭawngṭai ngei a, ka hriatna erawh chu a hlâwk chuang lo.

¹⁵Engtin nge ni ta ang le? Thlarauvin ka ṭawngṭai ang a, hriat theih pawhin ka ṭawngṭai bawk ang; thlarauvin hla ka sa ang a, hriat theih pawhin ka sa bawk ang.

¹⁶Chuti lo chuan, thlarauvin malsâwmsak mah la, la hre lote awmnaa awm chuan i lâwm thu sawiah chuan engtin nge “Amen” a tih theih ang, i thusawi chu hre thei lo puiin?

¹⁷Nang zawngin lâwm thu i sawi ṭha zet tak a, mi dang erawh chu a siam ṭha chuang si lo.

¹⁸Nangmahni zawng zawng aiin ṭawng hriat lohva thu ka sawi hnem zâwk avângin Pathian hnênah lâwm thu ka sawi a;

¹⁹nimahsela, kohhranho inkhâwmnaah chuan ṭawng hriat lohva thu sîngkhat sawi aiin, mi dangte ka zirtîr theih nân ka hriat theihnain thu panga chauh sawi ka duh zâwk a ni.

²⁰Unaute u, rilru lamah naupang suh u; amaherawhchu, sual kawngah zawng nausên ula, rilru lamah erawh chuan puitling rawh u.

²¹Dân Lehkhabuah chuan, “ ‘Awze mite ka leh ram danga mite hmuiin hêng mite hnênah hian thu ka sawi ang a; chuti pawhin mi ngaithla chuang lo vang,’ Lalpan a ti,” tih ziak a ni.

²²Chuvângin, ṭawng hriat lohte hi ringtute tân chhinchhiahna a ni lo va, ringlote tân a ni zâwk; thuhril erawh hi chu ringlote tân chhinchhiahna a ni lo va, ringtute tân a ni zâwk.

²³Chuvângin, kohhranho zawng zawng in inkhâwmin, in zaa ṭawng hriat lohtea thu in sawi chuan la hre lote emaw, ringlote emaw lo lût sela, â an ti dâwn lo che u em ni?

²⁴In zaa thu in hril erawh chuan ringlo emaw, la hre lo emaw lo lût sela, a thiam lohzia in zaa tihlan a ni tawh ang a, in zaa chhuahchhalh a ni tawh ang;

²⁵a thinlunga thurûkte chu tihlanin a awm tawh ang; chutichuan, bawkkhupin Pathian chibai a bûk ang a, Pathian in zîngah a awm takzet tih a puang ang.

²⁶Unaute u, engtin nge ni ta ang le? In rawn inkhâwmin fakna hla emaw, thu zirtîr emaw, hriattîrna thu emaw, ṭawng hriat loh emaw, hrilhfiahna emaw in nei ṭheuh ṭhîn a. Engkim siam ṭhatna tûrin tih ni rawh se.

²⁷Tu pawhin ṭawng hriat lohva thu an sawi chuan pahnihin emaw, a tam berah pathumin emaw ni sela, inchhâwk zêlin ni bawk rawh se; tin, mi pakhatin hrilhfiah rawh se;

²⁸hrilhfiahtu an awm loh erawh chuan kohhran inkhâwmah chuan ngawi rengin awm sela, mahni leh Pathian hnênah sawi rawh se.

²⁹Thuhriltute pawhin pahnihin emaw, pathumin emaw sawi sela, mi dangte chuan ngun takin ngaihtuah rawh se.

³⁰Amaherawhchu, a kianga ṭhu mi dang hnênah hriattîrna thu pêkin a lo awm chuan, a hmasa chu ngawi mai rawh se.

³¹Mi zawng zawngin an zir theihna tûr leh, mi zawng zawng thlamuanga an awm theihna tûrin, in zain pakhat zêlin thu in hril thei si a.

³²Thuhriltute thlaraute chu thuhriltute thu thuin an awm a ni.

³³Pathian chu buaina Pathian a ni lo va, remna Pathian a ni zâwk si a, mi thianghlim kohhranho zawng zawnga a awm ang hian.

³⁴Kohhranho inkhâwmnaah chuan hmeichheho chu ngawi rengin awm rawh se; anni zawng thu an sawi phal a ni si lo; Dân Lehkhabuin a sawi ang bawk khân, thu zâwmin awm zâwk rawh se.

³⁵Tin, eng pawh zir an duh chuan in lamah mahni pasal zâwt rawh se; kohhran inkhâwmnaa hmeichhe thusawi hi a zahthlâk si a.

³⁶Pathian thu hi nangmahni laka chhuak a ni maw? A nih loh leh nangmahni hnên chauhvah a lo thleng a ni maw?

³⁷Tu pawh thuhriltuah emaw, thlarau miah emaw a inngaih chuan, in hnêna thu ka ziak hi Lalpa thupêk a ni tih lo hre rawh se.

³⁸Nimahsela, tu pawhin a hriat loh chuan hre lovin awm mai rawh se.

³⁹Chutichuan, ka unaute u, thuhril hi châk hle ula, ṭawng hriat lohtea thusawi pawh hi khap suh u;

⁴⁰nimahsela, engkim mawi tak leh fel taka tih ni rawh se.