Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 16 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 16 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 16

¹Tin, mi thianghlimte tâna thawhlâwm thu kha zawng, Galatia rama kohhranho pâwl hnênahte thu ka pêk angin nangni pawhin lo ti ve rawh u.

²Ni sarih ni hmasa berah chuan mi tinin, malsâwmna in hmuh ang zia zêlin dah khâwl ṭheuh ula; ka lo kal huna thawhlâwm khawn rêng rêng a awm loh nân.

³Tin, in khawngaih thilpêk chu Jerusalem khuaa kalpui tûrin, ka lo thlen hunah tu pawh ṭha in tih apiang lehkhate kengin ka tîr ang.

⁴Tin, ka kal vena âwm a nih phei chuan ka hnênah an kal ang.

⁵Tin, Makedonia ram ka fan chhuah hnu-ah chuan in hnênah ka lo kal ang; Makedonia ram chu ka fang rêng rêng dâwn si a.

⁶Nangni hnênah erawh chuan ka châm reng a ni thei e, thlasik chhûng zawng pawh a ni mahna, khawiah pawh ka kalna tûr apiangah nangnin mi thlah theihna tûrin.

⁷Tûna kal pah maia hmuh che u ka duh lo va, Lalpan rem a tih chuan in hnênah rei deuh châm ka beisei si a.

⁸Nimahsela, Pentikos thlengin Ephesi khuaah hian ka châm reng ang,

⁹kawngka zau tak leh sâwt tak ka tân a inhawng si a, dotute tam tak an awm bawk.

¹⁰Tin, Timothea kha a lo thlen chuan, ṭi lova in hnêna a awm nân fîmkhur rawh u; keiin ka thawh ang bawk hian Lalpa hna chu a thawk si a.

¹¹Chuvângin, tu mân hmusit suh se; ka hnêna a lo kal theih nân thlamuang takin thlah zâwk ang che u; unaute rualin amah lo hmuh ka beisei si a.

¹²Kan unau Apollova thu kha chu, unaute ruala in hnêna lo kal tûrin ka ngên chiam a; nimahsela, tûnah zawng lo kal a duh hauh lo va; a remchân hunah erawh chuan a lo kal ang.

¹³Invêng ula, rinnaah chuan ding nghet ula, intihuai ula, chak takin awm rawh u.

¹⁴In tih apiang chu hmangaiha tih ni vek rawh se.

¹⁵Unaute u, Stephana chhûngte chu Akaia rama awih hmahruaitute an ni a, mi thianghlimte rawngbâwl tûrin an inpe tih in hria e;

¹⁶chutiang mite hnênah leh, hnathawha ṭanpui leh, thawk rim apiangte hnênah chuan intulût tûrin ka ngên a che u.

¹⁷Tin, Stephana te, Fortunata te, Akaika te an lo kal hi ka lâwm a ni, in awm loh pawh lang lova min siam avângin.

¹⁸Anni hian ka rilru leh in rilru an tiharh si a; chutichuan, hetiang mite hi lâwm rawh u.

¹⁹Asia ram kohhrante hian chibai an bûk a che u. Akuila leh Priskilli, an ina kohhran inkhâwmho nên hian Lalpaah chuan chibai tam takin an bûk a che u.

²⁰Unau zawng zawng hian chibai an bûk a che u. Fawh thianghlimin chibai inbûk ṭheuh rawh u.

²¹Kei Paulan keima kut ngeia chibai ka bûkna che u a nih hi.

²²Tu pawhin Lalpa a hmangaih loh chuan ânchhe dawngin awm rawh se. Kan Lalpa chu a lo kal e.

²³Lalpa Isua Krista khawngaihna chu in hnênah awm rawh se.

²⁴Krista Isua ka hmangaihna hi in zaa hnênah awm rawh se. Amen.