Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 6 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 6 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 6

¹In zîngah tu pawhin mi dang chungah thupawi nei ula, mi thianghlimte hmaa thlen lovin, mi fel lote hmaah in thlen ngam dâwn em ni?

²A nih leh, mi thianghlimte chuan khawvêl an ngaihtuah dâwn tih in hre lo em ni le? Tin, khawvêl mah hi in ngaihtuaha a awm dâwn chuan, thil tê berte pawh chu ngaihtuah tlâk lo em ni in nih le?

³Tûn dam chhûng khawsak thute chu sawi loh, vântirhkohte lam pawh kan ngaihtuah dâwn tih in hre lo vem ni?

⁴Chutichuan, tûn dam chhûng khawsak thute ngaihtuah tûr in neihin, kohhranho zînga mi hmuhsitawmte chu in ngaihtuahtîr ṭhîn em ni?

⁵In zahna tûrin ka sawi a ni. A unaute kâra thu titlu thei mi fing pakhat tal in zîngah in hmu thei lo a ni ang maw,

⁶unauvin a unau rorêlnaa a thlen zâwk ṭhin? Ringlote hmaah a ni lehnghâl si.

⁷A ni, hei hi in fel zawh zân lohna pakhat chu a ni pang mai, thupawi in neih tawn ṭhin hi. Engati nge dik lo taka tihna chu in tuar zâwk loh? Engati nge tihdâwnna chu in tuar zâwk loh?

⁸A ni, nangmahni ngeiin in unaute chungah pawh in tidik lo va, in tidâwng zâwk ṭhîn.

⁹A nih leh, mi fel lote chuan Pathian ram an luah lo vang tih in hre lo vem ni le? Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte emaw,

¹⁰rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang.

¹¹Tin, nangni ṭhenkhat chutiang mi in nih ṭhin kha; nimahsela, Lalpa Isua Krista hmingah leh kan Pathian Thlarauvah tlen fai in ni tawh a, tihthianghlim in ni tawh a, thiam chang in ni tawh.

¹²Thil engkim tih ka tân a thiang a; nimahsela, thil engkim tih a ṭha kher lo. Thil engkim tih ka tân a thiang a; nimahsela, eng bawihah mah ka inphal lo.

¹³Ei tûrte chu pum tân a ni a, pum chu ei tûrte tân a ni; nimahsela, Pathianin a tiboral ve ve dâwn. Tin, taksa hi inngaih nân a ni lo va, Lalpa tân a ni zâwk e; Lalpa pawh chu taksa tân a ni.

¹⁴Tin, Pathianin Lalpa chu a kaitho va, keini pawh a thiltihtheihnain min kaitho ve bawk ang.

¹⁵In taksa chu Krista pêngte a ni tih in hre lo em ni? Krista pêngte chu lâksakin nawhchizuar pêngahte ka siam dâwn em ni le? Hnai lo ve.

¹⁶A nih leh, nawhchizuar zawm chu amah nên pumkhat an ni tih in hre lo em ni le? “An pahnihin tisa pumkhat an lo ni tawh ang,” a ti si a.

¹⁷Lalpa zawm erawh chu amah nên thlarau pumkhat an ni.

¹⁸Inngaih hi tlânsan rawh u. Mihring thil tihsual tinrêng hi taksa pâwn lamah a ni; mi ngaih hmang erawh chuan ama taksa chungah thil a tisual a ni.

¹⁹A nih leh, in taksa chu, in chhûnga awm Pathian hnên aṭanga in hmuh, Thlarau Thianghlim in a ni tih in hre lo em ni le? Mahni ta pawh in ni lo va,

²⁰mana lei in ni tawh asin; chuvângin, in taksaah chuan Pathian chawimawi rawh u.