Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 7 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 7 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 7

¹Tin, in thil ziak thute kha chu: mipa tân hmeichhe khawih loh a ṭha a ni.

²Nimahsela, inngaihnate a awm ṭhin avângin mipain nupui bîk nei ṭheuh sela, hmeichhia pawhin pasal bîk nei ṭheuh rawh se.

³Pasal chuan a nupui hnênah a chan tûr tâwk chu pe rawh se; chutiang bawkin nupui pawhin a pasal hnênah a chan tûr tâwk chu pe bawk rawh se.

⁴Nupui chuan ama taksa chungah thu a nei lo va, a pasal chuan thu a nei zâwk a ni; chutiang bawkin pasal pawhin ama taksa chungah thu a nei lo va, a nupui chuan thu a nei zâwk a ni.

⁵Ṭawngṭai tûra in inpêk theih nân rei lo tê atân rem in tih ve ve chauh loh chuan, a tua mah intidâwng suh u, chumi hnu chuan in awm dân pângngaiin awm leh thuai ula; chuti lo chuan, in insûm zawh loh avângin Setanan a thlêm dah ang che u.

⁶Nimahsela, he thu hi thu pe lamin ka sawi lo va, phal lam thuin ka sawi zâwk a ni.

⁷Nimahsela, mi zawng zawng keimah ang tak hian awm vek sela ka duh a ni. Amaherawhchu, mi tinin Pathian hnên ata thilpêk mahni hmuh zâwng an nei ṭheuh a ni, pakhatin kawng khatin, midangin kawng dangin.

⁸Nimahsela, lêngṭûlte leh hmeithaite hnênah chuan heti hian ka ti a ni: keimah ang tak hian awm sela an tân a ṭha ang.

⁹Insûm theihna an neih loh erawh chuan innei rawh se; hur aiin inneih chu a ṭha zâwk si.

¹⁰Tin, innei sate hnênah chuan thu ka pe (keima pêk erawh chu ni lovin, Lalpa pêk a ni zâwk): nupui chuan a pasal ṭhen suh se;

¹¹a ṭhen vêk chuan pasal nei tawh lovin awm law law rawh se, a nih loh leh a pasal nên vêk innei leh rawh se; tin, pasal chuan a nupui ma suh se.

¹²Mi dang hnênah erawh chuan Lalpa ni lovin, keimahin ka sawi: unau tu pawhin nupui ringlomi nei sela, ani chuan a hnêna awm reng a lungnih chuan ma suh se.

¹³Tin, hmeichhia, pasal ringlomi nei chuan, a pasalin a hnêna awm reng a lungnih chuan ṭhen suh se.

¹⁴Pasal ringlomi chu a nupui zârah tihthianghlimin a awm a, nupui ringlomi pawh chu a pasal zârah tihthianghlimin a awm bawk si a; chuti ni suh sela, in fate chu an thianghlim lo vang; nimahsela, an thianghlim reng e.

¹⁵Nimahsela, a ring lo zâwk chuan ṭhen sela, ṭhen mai rawh se, chutiangah zawng unaupa emaw, farnu emaw hrên an ni tawh lo ve; Pathian erawh chuan inrem taka awm tûrin min ko a ni.

¹⁶Aw nupui, i pasal i chhandam dâwn leh dâwn loh engtin nge i hriat ni? Aw pasal, i nupui i chhandam dâwn leh dâwn loh engtin nge i hriat ni?

¹⁷Eng pawh ni sela, Lalpa chuan mi tin hnêna a sem pângngai ang ṭheuh leh, Pathianin mi tin a kohna pângngai ang ṭheuhvah awm rawh se. Chutiangin kohhran pâwl zawng zawngah ka ruat ṭhîn.

¹⁸Serh tan tawh hnu koh an awm em? Serh tan loh mi lo ni suh se. Serh tan lova awm koh an awm em? Serh tantîr suh se.

¹⁹Pathian thupêkte pawm chauh lo chu serh tan hi eng mah a ni lo va, serh tan loh pawh hi eng mah a ni hek lo.

²⁰Mi tin kohva an awm laia an chan pângngaiah chuan awm reng ṭheuh rawh se.

²¹Bawiha i awm koh i ni em? Chu chu engto duh suh, remchâng a awm erawh chuan chhuah tum mai rawh.

²²Bawiha awm Lalpa kohva chu Lalpa bawih chhuahtîr a ni si a; chutiang bawkin bawih lova awm kohva chu Krista bawih a ni.

²³Mana lei in ni tawh; mihringte bawihah lût suh u.

²⁴Unaute u, mi tin kohva in awm laia in chan pângngaiah chuan Pathian hnênah awm reng rawh u.

²⁵Tin, nula thianghlim lam thu-ah zawng Lalpa thupêk rêng ka nei lo va; nimahsela, rinawma awm tûrin Lalpa hnên ata khawngaihna hmu ka nih avângin, ka ngaihtuah zia ka sawi ang.

²⁶Chutichuan, tûnlai hrehawm avâng hian hei hi ṭhain ka ring, mi a awm ngaia awm reng hi.

²⁷Nupuiah phuar belhbawm i ni em? Phelhna zawng suh. Nupuiah phuar belhbawm loh i ni em? Nupui zawng suh.

²⁸Nimahsela, nupui i neih chuan thil i tisual lo ve, nula thianghlim pawhin pasal a neih chuan thil a tisual hek lo. Amaherawhchu, chutiang mite chuan tîsaah chuan hrehawm an tuar ang; nimahsela, kei zawngin tuar lohtîr che u ka duh a ni.

²⁹Amaherawhchu, unaute u, hei hi ka ti a ni: tûn achinah chuan nupui neite chu nei lo anga an awm theihna tûr leh, ṭapte chu ṭap lo anga an awm theihna tûr leh, lâwmte chu lâwm lo anga an awm theihna tûr leh, leitute chu nei lo anga an awm theihna tûr leh, khawvêl hmangtute chu hmang lutuk lova an awm theihna tûrin hun hi tihtawiin a awm a ni; he khawvêl awm dân hi a boral mêk a nih hi.

³²Nimahsela, lungkham nei lova in awm ka duhsak che u a ni. Nupui nei lo chuan Lalpa tihlâwm theihna zia tûr ngaihtuahin Lalpa lam thil chu a lungkham ṭhîn.

³³Nupui nei erawh chuan a nupui tihlâwm theihna zia tûr ngaihtuahin khawvêl lam thil a lungkham zâwk ṭhîn.

³⁴Tin, pasal nei leh nula thianghlim chu an inang lo bawk a. Pasal nei lo chuan a taksa leh a thlarauvah chuan thianghlim taka a awm theihna tûrin, Lalpa lam thil chu a lungkham ṭhîn; pasal nei erawh chuan a pasal tihlâwm theihna zia tûr ngaihtuahin, khawvêl lam thil chu a lungkham zâwk ṭhîn.

³⁵Chûng chu in ṭhatna tûrin ka sawi a ni; khuahkhirh che u ka tum a ni lo va, awm dân mawi tâwka in awm theihna tûr leh, Lalpa rawng chu buai lova in bâwl theihna tûrin ka sawi zâwk a ni.

³⁶Amaherawhchu, tu pawhin a fanu nula thianghlim a lên reitîr kawngah tidik lova a inrin chuan, ani chu a vânglai a niha, a ṭûl bawk si chuan, a tih duh chu ti rawh se; thil a tisual lo ve, neihtîr rawh se.

³⁷Nimahsela, rilru nghet tak pua, ṭûl ti lova, ama duh zâwng erawh chu hlen theia, a fa nula thianghlim chu vawn reng a rilrua tum tlattu chuan a tiṭha zâwk ang.

³⁸Chutichuan, pasal neihtîrtu chuan a tiṭha e; nimahsela, a neihtîr lotu chuan a tiṭha lehzual a ni.

³⁹Nupui chu a pasal a dam chhûng chuan phuar a ni; nimahsela, a pasal a thih tawh chuan a duh apiang a nei thei ang; amaherawhchu, Lalpaa awm mi a ni tûr a ni.

⁴⁰Nimahsela, keia ngaih chuan, a awm ngaia a awm reng chuan a eng a thâwl zâwk ang; kei pawhin Pathian Thlarau chu nei ve bawkin ka inring a ni.