Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 8 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 8 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 8

¹Tin, milemte laka inthawina thilte thu kha chu: kan zain hriatna kan nei ṭheuh tih kan inhria. Hriatna zawngin mi a uantîr ṭhîn a, hmangaihna erawh chuan mi a siam ṭha ṭhîn.

²Tu pawhin thil eng emaw hriaa a inrin chuan, a hriat tûr ang chu a la hre lo ve.

³Amaherawhchu, tu pawhin Pathian a hmangaih chuan, chu mi ngei chu ama hriat a ni.

⁴Chutichuan, milemte laka inthawina thil ei kawngah zawng, khawvêlah hian milem rêng rêng chu eng mah a nih lohzia leh, pakhat chauh lo chu Pathian dang rêng rêng an awm lohzia chu kan hria.

⁵Vânah emaw, leiah emaw, pathian hming pute awm mah sela (chutiang pathian tam tak leh lalpa tam tak an awm si a),

⁶keini tân erawh chuan Pathian pakhat chauh (Pa chu) a awm a, ama hnên aṭangin engkim a chhuak a, keini pawh ama tâna awm kan ni; Lalpa pakhat chauh (Isua Krista chu) a awm bawk a, amah vângin engkim a awm a, keini pawh amah vâng bawka awm kan ni.

⁷Amaherawhchu, chu hriatna chu mi zawng zawngah a awm lo; chutichuan, ṭhenkhatin tûn thlengin milem be ṭhang an nih avângin, milem laka inthawina thil ang taka ngaiin an ei ṭhîn; tichuan, an chhia leh ṭha hriatna chu a chak loh avângin an lo bawlhhlawh ṭhîn.

⁸Nimahsela, ei tûr hian Pathian mit min tluntîr chuang lo vang; ei mah suh ila kan chhe chuang lo va, ei mah ila kan ṭha chuang hek lo.

⁹Nimahsela, fîmkhur rawh u; chuti lo chuan, duh duha in tlat theihna hi eng emaw tiin mi chak lote tân tlûkna a lo ni dah ang e.

¹⁰Nang, hriatna nei mi, tu pawhin milem biakna ina chaw kîla an hmuh si che chuan, anni chu mi chak lo lo ni sela, an chhia leh ṭha hriatna chuan milem laka inthawina thil ei a lo ngam dâwn lâwm ni?

¹¹Tichuan, i hriatna avâng chuan mi chak lo (unau, a thih ai Kristan a thihsaka) chu a boral dâwn a ni.

¹²Unaute chunga chutiang thil in tihsuala, an chhia leh ṭha hriatna chu a chak loh nâk alaia in hliam hlauh hian, Krista chunga thil tisual in ni.

¹³Chumi avâng chuan, ei tûr hian ka unau a tihtlûk chuan, ka unau ka tihtlûk lohna tûrin kumkhuain sa rêng rêng ka ei tawh lo vang.