Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA KORINTH 9 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 9 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA KORINTH 9

¹Zalên ka ni lo vem ni? Tirhkoh ka ni lo vem ni? Kan Lalpa Isua ka hmu tawh lo vem ni? Nangniho hi Lalpaa ka hnathawh in ni lo vem ni?

²Mi dangte tân tirhkoh ni mah suh ila, nangni tân tal zawng ka ni; Lalpaa ka tirhkoh nih chhinchhiahna chu nangmahni hi in ni asin.

³Mi chhuahchhâltute ka chhânna chu hei hi a ni.

⁴Ei leh in tûrin thu kan nei lo vem ni?

⁵Tirhkoh dangte leh Lalpa unaute leh Kipha ang khân nupui ring mi hruai vêl tûrin thu kan nei lo vem ni?

⁶A nih loh leh, hna thawk lo tûrin kei leh Barnaban thu kan nei lo bîk em ni?

⁷Sipai tu nge mahni inchâwma râl kâp ngai ni? Tuin nge a rah ei si lovin, grêp huan siam ngai ni? A nih loh leh, tuin nge ran rual hnutê ei si lovin ran rual enkawl ngai ni?

⁸Chûng thu chu mihring ang maiin ka sawi em ni? Dân thu pawhin chûng ngei chu a sawi bawk lo vem ni?

⁹Mosia Dân Lehkhabuah chuan, “Sebâwngpain buh a chîl laiin a hmui phuar suh ang che,” tih ziak a ni si a. Pathianin sebâwngpa tân mai em ni a ngaihtuahsak ni?

¹⁰Keimahni tân chauh a sawi a ni lâwm ni? Ni e, keimahni tân a ni an ziak ni; lei lettu chuan beisei neiin leh tûr a ni a, buh vawtu pawh chuan chan neih ve beiseiin vuak tûr a ni si a.

¹¹Keinin thlarau lam thilte chu in hnêna kan tuh tawh chuan, tîsa lam thilte chu seng mah ila, thil hlâwk tak em ni ang?

¹²Mi dang mahin in chunga thuneihna chu an chan chuan, keini hi chang tûr kan ni lehzual lâwm ni? Nimahsela, chu thuneihna chu kan hmang lo: Krista Chanchin Ṭha kan dâl lohna tûrin engkim kan tuar hrâm hrâm zâwk a ni.

¹³Thil serh buatsaih vêltute chuan Pathian biak ina mi thil an ei leh, maichâma rawngbâwltute chuan maichâma thilhlanah chanvo an nei tih in hre lo vem ni?

¹⁴Chutiang takin, Lalpa chuan Chanchin Ṭha hriltute chu Chanchin Ṭha chu an ei hmuh nân a ruat a ni.

¹⁵Nimahsela, kei zawngin chûng chu pakhat mah ka hmang lo a ni; ka chunga chutianga in tih nân hêng thu hi ka ziak a ni hek lo; tu pawhin ka chhuan hi engmahlova an siam ai chuan, thi mai ila ka tân a ṭha zâwk si a.

¹⁶Chanchin Ṭha hril mah ila, chhuan tûr rêng rêng ka nei si lo, tih mâkmawh ka chungah a innghat a ni si a; Chanchin Ṭha hril suh ila, ka chung a pik dâwn si a.

¹⁷Chu chu mahni thu thua ka tih chuan lâwmman ka nei a ni; nimahsela, mahni thu thuin a nih si loh chuan, Chanchin Ṭha enkawlna hna mi kawltîr mai a ni ang.

¹⁸Ka lâwmman chu eng nge ni le? Chanchin Ṭhaa ka thuneihna chu ka hman zawh loh nân, Chanchin Ṭha ka hrilin, hlawh lova Chanchin Ṭha rawng ka bâwl theih hi a ni.

¹⁹Tu ma bawih ni mah suh ila, mi tam lehzual ka lâk luh theihna tûrin mi zawng zawng bawihah ka insiam ta.

²⁰Tichuan, Juda-te ka lâk luh theihna tûrin Juda-te hnênah Juda mi angin ka awm ṭhîn, Dân hnuaia awmte ka lâk luh theihna tûrin Dân hnuaia awmte hnênah Dân hnuaia awm angin ka awm thin, Dân hnuaia awm si lovin.

²¹Dân nei lote ka lâk luh theihna tûrin dân nei lote hnênah dân nei lo angin ka awm ṭhîn, Pathian dân awih lo si lovin, Krista dân zâwm siin.

²²Chak lote ka lâk luh theihna tûrin chak lote hnênah chak lo angin ka awm ṭhîn; eng emaw ti tala ṭhenkhat tal ka chhandam theihna tûrin, mi zawng zawng hnênah engkim ka ni tawh.

²³Chanchin Ṭha avângin engkim ka ti ṭhîn, chan ka neih ve theih nân.

²⁴Intlânsiakhote chu an zain an tlân a; nimahsela, pakhat chauhvin lâwmman a hmu ṭhîn tih in hre lo vem ni? In hmuh theih nân chutiang tak chuan tlân rawh u.

²⁵Tin, intihsiaknaahte chuan a bei ṭâlh ṭâlh apiang chu engkimah an insûm ṭhîn a ni. Anni zawngin lallukhum chhe thei hmu tûrin an bei a, keini erawh chuan lallukhum chhe thei lo hmu tûrin.

²⁶Chutichuan, tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a;

²⁷chu vâng chuan, ka taksa ka tichhel a, ka thuhnuaiah ka dah tawh a ni; chuti lo chuan, mi dangte hnêna ka tlângaupui hnu pawhin, eng emaw tiin keimah ngei hi paih thlâkin ka awm dah ang e.