Read Mizo_Old_version KHUAA MITE HNENA TIRHKOH PAULA LEHKHATHAWN PAHNIHNA KORINTH 10 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 10 - Mizo_Old_version bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 10

¹Tin, kei Paula, in zînga in mit hmuha thuhnuairawlh taka awma, in hnêna awm loh veleha nangmahni lam zuam si ṭhîna ngei hian, Krista zaidamna leh nunnêmnain ka ngên a che u;

²a ni, in hnêna ka awm hunah ṭhenkhat, tisa anga awma min ruatte chunga huai taka awm ka tum ngamna ang hian ka zuam lohna tûr che uin ka ngên a che u.

³Tisaah awm mah ila, tisa indo angin kan indo lo va

⁴(keini inrâlthuamnate chu tisaa mi a ni si lo va, kulhpui nghet takte ṭhiatna tûra Pathian zârah thil ti thei tak a ni zâwk),

⁵hnialnate leh thil sâng tinrêng Pathian hriatna dâl tûra sâng taka siamte chu ṭhiatin, ngaihtuahna tinrêng Krista thu awihna salah kan hruai a;

⁶in thu awihzia a famkim hunah chuan, thu awih lohna zawng zawng phuba la tûrin kan inpeih bawk a.

⁷In mit hmuha thil awmte chu a ni in en ṭhin ni. Tu pawhin Krista ta nia a inrin chuan, hei hi mahniin ngaihtuah leh rawh se, amah chu Krista ta a ni ang bawkin keini pawh kan nih ve hi.

⁸Kan thuneihna (nangmahni ṭhiat nân ni lova, nangmahni siam ṭhat nân zâwka Lalpan min pêk hi) chhuang nasa lehzual mah ila ka mualpho dâwn si lo va;

⁹ka lehkhathawnte chuan tihhlauh che u tum anga ka lan loh nân chu chu ka ti a ni.

¹⁰“A lehkhathawnte chu a ritin a khauh va, a taksa lam erawh chu a âwmnêm a, a ṭawng pawh a sitawm a ni,” an ti si a.

¹¹Chutiang mi chuan hei hi ngaihtuah rawh se, in hnêna kan awm loh laia lehkhathawna thua kan awm angin, in hnêna kan awm hunah pawh thiltihah kan awm bawk ang.

¹²Ṭhenkhat mahni insawimawite zîngah chuan kan inchhiar tel ngam lo va, anmahni nên kan intehkhin ngam hek lo; amaherawhchu, anni zawng mahni leh mahni intehin, mahni leh mahni intehkhinin rilru nei lovin an awm.

¹³Keini erawh zawng kan tehna tâwk aliamah chuan kan uang lo vang a, Pathianin bial min chantîr a, chu tehna ang zêl chuan kan uang zâwk ang, nangmahni pawh bial hial tûra tehna chu.

¹⁴Bial phâk loh pui bial che u angin kan huam zau lutuk si lo; Krista Chanchin Ṭha hrilin in khaw thleng pawhin kan lo kal kha:

¹⁵kan tehna tâwk liama mi, mi dang thawh rimte chu kan chhuang lo va; in rinna a ṭhan ang zêlin, kan bial chin ang zêlah, in zîngah nasa taka tihlenin kan awm ang tih beiseina kan nei zâwk a.

¹⁶Buatsaih sa kawng thu-ah chuan mi dang bial chhuang lovin, in piah lam ram thleng pawha Chanchin Ṭha kan hril theih nân.

¹⁷Nimahsela, “A chhuang apiangin Lalpa chu chhuang rawh se.”

¹⁸Mahni insawimawi chuan fak a hlawh si lo va, Lalpan a sawimawi chuan fak a hlawh zâwk a ni.