Read Mizo_Old_version KHUAA MITE HNENA TIRHKOH PAULA LEHKHATHAWN PAHNIHNA KORINTH 4 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 4 - Mizo_Old_version bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 4

¹Chumi avâng chuan khawngaihna kan hmuh ang zêla he rawngbâwlna hi kan neih avângin kan dawl lo va;

²thil zahthlâk inthupte chu kan malmâk ta zâwk a, ngamthlêmna thu kan hmang lo va, Pathian thu mi bum nân kan hmang hek lo; thutak hriattîrin Pathian mit hmuhin mi tin chhia leh ṭha hriatna mit kan intluntîr zâwk ṭhîn a ni.

³Nimahsela, kan Chanchin Ṭha hi khuha a awm chuan, boral mêkahte hian a ni, khuha a awm ni;

⁴Krista, Pathian anpui, a ropuizia Chanchin Ṭha êng chuan anmahni a chhun ên theih lohna tûrin, chûngahte chuan he khawvêl pathian hian ringlote rilru a tidel ta a.

⁵Mahni thu kan hril si lo va, Krista Isua chu Lalpa a nih kan hril zâwk ṭhîn a, keini pawh Isua avânga in bawih kan nih kan hril bawk ṭhîn.

⁶Isua Krista hmêlah chuan Pathian ropuizia hriatna êng chu min pe tûrin, “Thim ata êng a êng chhuak ang,” titu Pathian chuan kan thinlungte hi a chhun êng ta si a.

⁷Nimahsela, thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni.

⁸Lehlam lehlama nêksâwrin kan awm a; nimahsela, kan thaw a ipik si lo; mangangin kan awm a; nimahsela, kan bei a dawng si lo;

⁹tihduhdahin kan awm a; nimahsela, kalsanin kan awm si lo; vuak thlûkin kan awm a; nimahsela, tihboralin kan awm si lo;

¹⁰kan taksaah hian kumkhuain Isua thihna chu kan pu zêl ṭhîn a, Isua nunna pawh kan taksaah hian a lan theih nân.

¹¹Keini nungdama la awmte hi Isua avânga thi tûra mantîrin kan awm fo va, Isua nunna pawh kan tisa thi theiah hian a lan theih nân.

¹²Chutichuan, keimahniah hian thihnain a thawk ṭhîn a, nangniah erawh chuan nunnain a thawk zâwk ṭhîn a ni.

¹³Amaherawhchu, “Ka ring a; chuvângin, thu ka sawi a ni,” tih ziak ang khân, chumi rinna rilru ngei pu chuan keini pawhin kan ring ve a; chuvângin, thu kan sawi bawk a;

¹⁴Lalpa Isua kaithotu chuan keini pawh Isua hnênah min kaitho ve dâwn a, nangmahni nên min dintîr dâwn tih kan hre si a.

¹⁵Engkim nangmahni ṭhatna tûr a ni si a, khawngaihna chu mi tam zâwk zâra tihpuna awmin, Pathian ropuina tûrin lâwm thu nasa tak a sawitîr theih nân.

¹⁶Chumi avângin kan dawl lo va; kan pâwn lam mihring hi lo awngrawp telh telh mah sela, kan chhûng lam mihring chu ni tin siam thar zêlin a awm zâwk a ni.

¹⁷Kan hrehawm nêp tak, tûn mit khap kâr chhûng chauhva awm tûr hian, ropuina nasa tak chatuan atân min siamsak nasa tulh tulh a ni;

¹⁸thil hmuh theihte hi en lovin, thil hmuh theih lohte chu kan en zâwk si a; thil hmuh theihte hi rei lo tê atân a ni a, thil hmuh theih lohte erawh chu chatuan atân a ni si a.