Read Mizo_Old_version RAMA MITE HNENA TIRHKOH PAULA LEHKHATHAWN GALATIA 1 Bible Online

RAMA MITE HNENA TIRHKOH PAULA LEHKHATHAWN GALATIA 1 - Mizo_Old_version bible

RAMA MITE HNENA TIRHKOH PAULA LEHKHATHAWN GALATIA 1

¹Paula, tirhkoh (mihringte tirh chhuah ni lovin, mihring zârah ni hek lovin, Isua Krista leh mitthi zîng ata a kaithotu Pa Pathian zârah a ni zâwk) leh,

²ka hnêna unau awm zawng zawngte chuan Galatia rama kohhrante hnênah:

³Pa Pathian leh kan Lalpa Isua Krista hnên ata khawngaihna leh remna in hnênah awm rawh se;

⁴ani chuan kan Pathian leh kan Pa remtih zâwngin, tûnlai khawvêl sual tak lakah hian min chhanchhuah theih nân, kan sualte aiah amah a inpe ta;

⁵Pathian hnênah chuan ropuina chatuanin awm rawh se. Amen.

⁶Krista khawngaihna zâra a kotu che u kha, chuti thuta chanchin ṭha hrang lama in pakaisan hi mak ka ti a ni;

⁷chu chu chanchin ṭha a ni ve si lo; nangmahni tibuaiin, Krista Chanchin Ṭha tihdanglam duh tute emaw an awm mai a ni a.

⁸Nimahsela, keimahniin emaw, vân aṭanga lo chhuk vântirhkoh pawhin emaw, Chanchin Ṭha kan hrilh che u lo kha chu chanchin ṭha dang rêng lo hrilh che u sela, ânchhe dawngin awm rawh se.

⁹Hmâna kan sawi ang khân tûnah ka sawi leh dâwn a ni, “Chanchin Ṭha in pawma lo kha chu, chanchin ṭha dang tu pawhin hrilh che u sela, ânchhe dawngin awm rawh se.”

¹⁰A nih loh leh, mihring nge ka thlêm Pathian? A nih loh leh, mihring em ni tihlâwm ka tum? Mihring tihlâwm tum ni ila, Krista bawih ka ni lo vang.

¹¹Chutichuan, unaute u, ka Chanchin Ṭha hril kha mihring lam thu a ni lo tih ka hriattîr a che u.

¹²Mihring hnên ata hmu ka ni lo va, mi min zirtîr ka ni hek lo, Isua Krista inlârna avânga hmu ka ni zâwk si a.

¹³Juda-te sakhaw biak dânah chuan hmânlaia ka awm dân chu in hre tawh si a, khatia Pathian kohhranho nasa taka tiduhdahin ka tihbuai ṭhin kha.

¹⁴Tin, min thlahtute thurochhiah chunga ṭhahnem ka ngaih nasat bîk avângin, Juda-te sakhaw biak dân kawngah chuan ka chite zînga ka rualpui tam takte ka lehpêl ta a.

¹⁵Tin, ka nu pum chhûng aṭanga mi tihrangtu leh, a khawngaihna avânga mi kotu Pathian chuan,

¹⁶Jentailte zînga a Chanchin Ṭha ka hril theih nân a Fapa chu lungni taka ka hnêna a inlârtîr lai khân, tu mah râwn lovin,

¹⁷tirhkoh ka nih hmaa tirhkoh lo ni tawhte hnênah Jerusalem khuaa han kal hek lovin, Arabia ramah ka kal bo ta nghâl zâwk a; tin, Damaska khuaah ka kîr leh ta a.

¹⁸Tin, kum thum a vei hnuin Kipha kan tûrin Jerusalem khuaah ka han kal a, a hnênah ni sâwm leh ni nga ka châm a.

¹⁹Tirhkoh dangte erawh chu, Lalpa unau Jakoba chauh lo chu tu mah ka hmu lo va.

²⁰(Ngai teh mah u! In hnêna thu ka ziakte hi Pathian mit hmuhah pawh ka daw lo ve.)

²¹Chumi hnuah chuan Suria leh Kilikia ramahte ka lo kal a.

²²Nimahsela, Judai ram kohhranho Kristaa awmte hmêlhriat ka la ni lo ta fo va.

²³“Hmâna min tiduhdahtu khân hmâna rinna thu a tihkhawloh ṭhin kha tûnah a hril ta zâwk a ni,” tih mi sawi chauh an hria a.

²⁴Tin, keimah avângin Pathian an chawimawi ta a.