Read Mizo_Old_version RAMA MITE HNENA TIRHKOH PAULA LEHKHATHAWN GALATIA 3 Bible Online

RAMA MITE HNENA TIRHKOH PAULA LEHKHATHAWN GALATIA 3 - Mizo_Old_version bible

RAMA MITE HNENA TIRHKOH PAULA LEHKHATHAWN GALATIA 3

¹Aw Galatia rama mi âte u, tuin nge dawi che u? In mit hmuh ngeiah Isua Krista chu khen behin chiang taka lantîr a nih tehlul nên.

²Hei chauh hi in hnên ata lo hriat ka duh: Dân thiltihte avângin nge Thlarau chu in hmuh, in ngaihthlâka in rin avângin?

³Heti êm hian in â maw? Thlarauva ṭan tawh siin tisain in zo dâwn em ni?

⁴Thil chuti zozai chu sâwtpui lovin in tuar em ni? Sâwtpui loh ni tak tak ta ang sela.

⁵Tin, in hnêna Thlarau petu che u leh in zînga thil mak titu chuan, Dân thiltihte avângin nge a tih, in ngaihthlâka in rin avângin?

⁶Abrahaman Pathian a ring a, tin, chu rinna chu a felnaa ruat a ni ang khân.

⁷Chutichuan, hre rawh u, rinnaa awmte, chûng ngei chu Abrahama fate an ni.

⁸Tin, Pathian Lehkha Thu chuan, Pathianin rinna avângin Jentailte thiam a chantîr dâwn tih hre lâwkin, “Nangmahah chuan hnam tin malsâwmsakin an awm ang,” tiin, Abrahama hnênah Chanchin Ṭha chu a hrilh lâwk kha.

⁹Chutichuan, rinnaa awmte chu mi Abraham rinawma nên malsâwmin an awm ve ṭhîn a ni.

¹⁰Dân thiltiha awm apiangte chu ânchhe hnuaiah an awm si a; “Dân lehkhabua thu ziak zawng zawng anga ti tûra awm reng lo apiang chu, ânchhe dawngin an awm ṭhîn,” tiin ziak a ni si a.

¹¹Tin, Pathian mit hmuhin tu mah rêng Dân avânga thiam chang an awm lo tih a lang reng a ni. “Mi felte chu rinnain an nung ang,” tih a ni si a;

¹²tin, Dân chu rinnaa mi a ni lo, “Chûng anga titu chu chûngah chuan a nung ang,” tih a ni zâwk e.

¹³Krista chu kan aia ânchhe dawng lo niin, Dân ânchhe lak ata min tlan chhuak ta (“Thinga khai kân apiang chu ânchhe dawng an ni,” tih ziak a ni si a);

¹⁴chutichuan, Abrahama chunga malsâwmna chu Krista Isuaah chuan Jentailte chungah a lo awm thei ang a; tichuan, rinna avângin Thlarau tiam chu kan hmu thei ang.

¹⁵Unaute u, mihring angin ka sawi hi, mihring thuthlung pawh ni mah sela, tihngheh tawh hnuin an phelh ngai lo va, belh pawh an belhchhah ngai hek lo.

¹⁶Tin, Abrahama hnênah a ni thu chu tiamin a awm ni, a chi thlah hnênah pawh. Mi tam tak chungthu sawi angin, “Chi thlahte hnênah pawh,” a ti lo va, mi pakhat chungthu sawi angin, “I chi thlah hnênah pawh,” a ti a ni zâwk e, chu chu Krista hi a ni.

¹⁷Tin, heti hian ka ti a ni: thuthlung, Pathian lo tihngheh tawh chu, Dân, kum zali leh kum sawmthum hnua lo awm tawh khân, thutiam chu engmahlova siamin a tibo lo ve.

¹⁸Ro luah tûr chu Dân avâng a nih chuan thutiam avâng a ni tawh si lo vang; nimahsela, Pathianin thutiam avângin a ni, Abrahama hnênah a pêk ni.

¹⁹A nih loh leh, engtiziaa Dân chu awm nge ni le? Bawhchhiatna hi sual a nih tilang fiah tûra thutiam belhchhahna a ni a, Thutiamin Chi Thlah a tih lo kal hmaa hman tûr, vântirhkohte hmanga palai kuta tihngheh a ni.

²⁰Tin, palai rêng rêng mi pakhat lakah palai a ni ngai lo ve, Pathian erawh chu pakhat a ni.

²¹A nih loh leh, Dân chuan Pathian thutiamte chu a dodâl em ni le? Hnai lo ve, Dân, mi tinung thei rêng pêkin a awm tawh si chuan, felna chu Dân avângin a awm ngei tûr a ni.

²²Nimahsela, Isua Krista rin avânga thil tiam chu a ringtute hnêna pêk a nih theih nân, Pathian Lehkha Thu chuan sual hnuaiah engkim a khârkhip ta vek a.

²³Nimahsela, rinna a lo thlen hma khân, rinna la lang tûr atân khârkhipa, Dân hnuaia vên kan nih kha.

²⁴Chutichuan, rinna avânga thiam kan chan theihna tûrin, Dân chu Krista hnên lama min kaihruaitu a lo ni a.

²⁵Nimahsela, tûnah rinna a lo thlen hnu hian, kaihruaitu hnuaiah kan awm tawh lo ve.

²⁶Krista Isua rin avângin Pathian fate in ni vek si a;

²⁷in zînga Kristaa baptisma chang apiangte kha Krista chuan in inthuam tawh si a.

²⁸Chutah chuan Juda mi a awm theih loh va, Grik mi pawh a awm theih hek loh; chutah chuan bawih a awm theih loh va, bawih lo pawh a awm theih hek loh; chutah chuan mipa leh hmeichhia pawh a awm theih loh; Krista Isuaah chuan in zain pumkhat in ni si a.

²⁹Tin, Krista ta in nih chuan, Abrahama thlah, thutiam anga ro luahtu tûrte in ni.