Read Mizo_Old_version RAMA MITE HNENA TIRHKOH PAULA LEHKHATHAWN GALATIA 4 Bible Online

RAMA MITE HNENA TIRHKOH PAULA LEHKHATHAWN GALATIA 4 - Mizo_Old_version bible

RAMA MITE HNENA TIRHKOH PAULA LEHKHATHAWN GALATIA 4

¹Nimahsela, heti hian ka ti a ni: ro luahtu tûr chu engkim chungah hotu ni mah sela, naupang a la nih chhûng zawng bawih nên engah mah a danglam chuang lo ve;

²a pa ruat hun chu a lo thlen hma loh chuan, vêngtu leh enkawltute hnuaiah a awm zâwk a ni.

³Chutiangin keini pawh naupang kan nih lai khân, khawvêl zirtîrna dik lo hnuaiah bawihah kan awm.

⁴Nimahsela, a hun bi a lo kim khân fa nihna kan hmuh theih nân, Dân hnuaia awmte chu tlan tûrin Pathianin a Fapa, hmeichhe hrin, Dân hnuaia lo piangin a tîr chhuak ta a.

⁶Tin, fa in nih avângin Pathianin a Fapa Thlarau chu, “Abba! (Ka pa!)” tia auvin kan thinlungah a rawn tîr a.

⁷Chutichuan, bawih i ni tawh lo va, fa i ni zâwk e; tin, fa i nih chuan Pathian zâra ro luahtu tûr i ni.

⁸Nimahsela, Pathian in hriat loh lai khân, an pianzia rêng pawha Pathian ni hlei lote bawih in ni a.

⁹Tûna Pathian in lo hriat hnu hi zâwngin - ni lo, Pathian mi hriat in lo nih hnu hian, tih tûr a ni zâwk e, khawvêl zirtîrna dik lo, eng mah ni hlei lo, a bawiha awm leh in châkate lamah chuan engtiziaa hawi kîr leh nge in nih?

¹⁰Ni te, thla te, hun te, kum te in serh ṭhîn.

¹¹In tân tha ka sêng thlâwn dah law maw tih ka hlauhsak a che u.

¹²Unaute u, ka ngên a che u, keimah angin awm rawh u, kei pawh nangmahni angin ka awm si a. Ka pawi eng mah in khawih lo.

¹³Chanchin Ṭha in hnêna ka hril hmasak ṭum kha ka tisa chak lohna avâng a ni tih in hre si a.

¹⁴Tin, ka tisaa in tân thlêmna awm chu in hmusit lo va, in ten hek lo; Pathian vântirhkoh angin, Krista Isua ang maiin mi lawm tâk zâwk kha.

¹⁵Vânnei in intihna kha khawiah nge ni ta le? Tih theih phei chu ni sela, nangnin in mitte kher chhuakin mi pe tawh ang tih ka hriatsak che u asin.

¹⁶Chutichuan, thu dik tak ka hrilh che u avâng hian in hmêlma ka lo ni ta em ni?

¹⁷Ṭha lamah ni hauh si lovin, ṭhahnemngai takin an zawng chhuak ṭhîn che u a; a ni, anmahni in zawn theih nân pâwn lama khâr hnan che u an duh a ni.

¹⁸Thu ṭha lamah erawh chuan eng lai pawhin ṭhahnemngai taka zawna awm fo hi a ṭha a ni, in hnêna ka awm lai chauh ni lovin.

¹⁹Ka naute u, Krista chu nangmahniah siam puitlina a awm hma loh chuan, nau veiin ka vei leh che u hi.

²⁰A ni, tûnah hian in hnêna awma ka aw tihdanglam ka châk theihzia mai chu! In chungthuah ka mangang si a.

²¹Dân hnuaia awm duhte u, mi hrilh rawh u, Dân thu chu in ngaithla ṭhîn lâwm ni?

²²Heti hian ziak a ni si a: “Abrahaman fapa pahnih a nei a, pakhat chu bawihnu lakah, pakhat chu bawih lo nu lakah.

²³Nimahsela, bawihnu laka mi chu tisa dân angin a piang a, bawih lo nu laka mi erawh chu thutiam avângin a piang a ni,” tih hi.

²⁴Chûng thu chu tehkhinna a ni; chûng hmeichhiate chu thuthlung pahnih an ni; pakhat chu Sinai tlânga mi, bawih ni tûra fa hringtu chu; chu chu Hagari a ni.

²⁵Tin, Hagari hi Arabia rama Sinai tlâng chu a ni a, Jerusalem, tûnlaia awm nên hian angkhat an ni, a fate nên bawihah an awm si a.

²⁶Chung lam Jerusalem erawh chu bawih a ni lo va, chu ngei chu keini nu a ni.

²⁷“Nang, ching, fa hring ngai lo, hlim rawh; Nang, nau vei ngai lo, au chhuak rawh; Pasal nei mi ai chuan, khawharnu chuan Fate a nei tam zâwk si,” tih ziak a nih kha.

²⁸Tichuan, unaute u, keini hi Isaaka ang khân thutiam fate kan ni.

²⁹Nimahsela, chumi lai chuan tisa dâna lo piang chuan Thlarau dâna lo piang chu a tiduhdah ang khân, tûnah pawh chutiang bawk a ni.

³⁰Nimahsela, Pathian Lehkha Thuin engtin nge a sawi? “Bawihnu chu a fapa nên hnawt chhuak rawh; bawihnu fapa chuan bawih lo nu fapa chu ro a luahpui dâwn si lo,” a ti.

³¹Chutichuan, unaute u, bawihnu laka fate kan ni lo va, bawih lo nu laka fate kan ni zâwk.