Read Mizo_Old_version RAMA MITE HNENA TIRHKOH PAULA LEHKHATHAWN GALATIA 5 Bible Online

RAMA MITE HNENA TIRHKOH PAULA LEHKHATHAWN GALATIA 5 - Mizo_Old_version bible

RAMA MITE HNENA TIRHKOH PAULA LEHKHATHAWN GALATIA 5

¹Bawih ni lo tûrin Krista chuan min chhuahtîr kha; chutichuan, ding nghet ula, bawih nghâwngkawlah chuan tâng leh tawh suh u.

²Ngai teh u, kei Paulan in hnêna ka sawi hi, serh in tantîr chuan Krista chu in tân eng mah sâwtna a ni lo vang.

³A ni, Dân thu zawng zawng zâwm tûra batu an ni tih, serh tantîr apiang hnênah ka hriattîr leh a nih hi.

⁴Nangni Dâna thiam chan tumte u, Krista nên in inṭhen ta; khawngaihna chu in tlûksan ta.

⁵Keini zawngin Thlarau zârah rinnain felna beiseina kan nghâk si a.

⁶Krista Isuaah chuan serh tan eng mah a sâwt lo, serh tan loh pawh eng mah a sâwt hek lo; rinna, hmangaihnaa thawh erawh chu a sâwt a ni.

⁷Ṭha takin in tlân ṭhin kha le; thutak chu in zawm loh nân tuin nge dâl ta che u?

⁸He thlêmna hi a kotu che u hnên ata a ni lo ve.

⁹Dawidim tlêm têin chhang hlâwm chu a pumin a fan chhuak ṭhîn.

¹⁰Rilru danglam in pu lo vang tih Lalpaah chuan ka ring tlat a; tibuaitu che u chu tu pawh ni sela, a chunga rorêlna chu a la tuar ang.

¹¹Unaute u, kei hian serh tan thu hril ni ila tihduhdah ka ni cheu dâwn em ni? Chuti ni se kraws thu kan hril hian buaina a siam lo tûr.

¹²Tibuaitute che u chu intan fithla law law sela ka duh a ni.

¹³Nangni unaute u, bawih ni lo tûrin koh in ni si a; nimahsela, in bawih nih lohna chu tisa tâna remchângah hmang suh ula, hmangaihnain rawng inbâwlsak tawn ṭheuh zâwk rawh u.

¹⁴“Nangmah i inhmangaih angin i vêngte i hmangaih tûr a ni,” tih thu kam khatah hian Dân thu zawng zawng chu a famkim tawh a ni si.

¹⁵Nimahsela, in inseha, in inei tawn si chuan, in intihboral tawn loh nân fîmkhur rawh u.

¹⁶Chutichuan, hei hi ka ti a ni: Thlarauvah awm rawh u; tichuan, tisa châkna chu in zâwm dâwn lo nia.

¹⁷Tisa hian Thlarau dona lam a châk ṭhîn, Thlarau pawhin tisa dona lam a châk bawk si ṭhîn; thil tih in tumte chu in tih theih loh nân chûngte chu an inkalh si.

¹⁸Nimahsela, Thlarau hruaia in awm chuan Dân hnuaiah chuan in awm lo ve.

¹⁹Tin, tisa thiltihte chu a lang fiah a ni; chûng chu hêng hi a ni: inngaihna te, bawlhhlawhna te, hurna te,

²⁰milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te,

²¹îtsîkna te, zu ruihna te, zu hmun hlimna te, chuti angte chu; chûng kawngah chuan tûn hmaa, “Chutiang thil tih hmangte chuan Pathian ram an chang lo vang,” tia ka hrilh lâwk che u ang khân ka hrilh lâwk che u hi.

²²Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te,

²³thuhnuairawlhna te, insûmtheihna te a ni zâwk e; chutiang kalh zâwngin Dân thupêk rêng a awm lo ve.

²⁴Tin, Krista Isua mite chuan tisa chu, a sual ngaihtuahna leh a châknate chawpin an khêng bet ta.

²⁵Thlarauva nung kan nih chuan Thlarauvah vêk i awm leh bawk ang u.

²⁶Incho tawna inîtsîk tawnin, i inngaihlu suh ang u.