Read Mizo_Old_version KHUAA MITE HNENA TIRHKOH PAULA LEHKHATHAWN PHILIPPI 3 Bible Online

KHUAA MITE HNENA TIRHKOH PAULA LEHKHATHAWN PHILIPPI 3 - Mizo_Old_version bible

KHUAA MITE HNENA TIRHKOH PAULA LEHKHATHAWN PHILIPPI 3

¹A tâwp berah chuan ka unaute u, Lalpaah lâwm rawh u. Thu pângngaite in hnêna ziak nawn leh hi keia tân zawng ninawm a ni lo ve, nangni tân a sâwt bawk si a.

²Ui lakahte chuan fîmkhur rawh u, thil ṭha lo titute lakah chuan fîmkhur rawh u. Innghaisaho lakah chuan fîmkhur rawh u.

³Keini, Pathian Thlarau zâra Pathian bia leh, Krista Isua chhuang leh, tisa chunga rinna rêng nghat lotute hi serh tanho kan ni zâwk si a.

⁴Duh phei ila, kei pawh tisa chunga rinna nghat thei ka ni asin. Mi dang rêng rêngin tisa chunga rinna nghahchhan neia an inruat chuan, kei ka inruat lehzual a ni.

⁵Ni riat nia serh tan, Israela thlaha mi, Benjamin chia mi, Hebraite laka Hebrai-a piang ka ni a; Dân lamah chuan Pharisai ka ni a;

⁶ṭhahnemngaih lamah chuan kohhranho tiduhdahtu ka ni a; Dân thua felna lamah chuan sawisêl bo ka ni.

⁷Nimahsela, ka tâna hlâwkna tûr apiangte chu, chûng chu Krista avângin chânnaah ka ruat ta a ni.

⁸A ni takmeuh mai, ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah vângin thil zawng zawng ka chân ta vek a, chûng chu hnâwmhneah lek ka ngai a, Krista ka hmuh theihna tûr leh,

⁹mahni felna (Dâna felna chu) nei lovin, Krista rin avânga felna (rin avânga Pathian laka felna chu) nei zâwkin, amaha awm ka lo nih theihna tûrin;

¹⁰a thihna anpuia thiin, amah nên, a thawhlehna thiltihtheihna nên, a tuarnate ṭâwmpuina nên ka hriat theih nân;

¹¹mitthi zîng ata thawhlehna chu ka chang thei hrâm mahna, tiin.

¹²Hmu tawh reng inti ka ni lo va, famkim tawh reng inti pawh ka ni hek lo; “Krista mi man chhan chu ka man thei dah law maw,” tiin, a ûmin ka ûm zâwk a ni.

¹³Unaute u, manah ka inngai lo. Amaherawhchu, he thil pakhat hi ka ti ṭhîn - hnung lama thil awmte chu theihnghilha, hma lama thil awmte chu banin,

¹⁴Krista Isuaa Pathian chung lam koh chhan lâwmman hmu tûrin, tiam chin lam chu ka pan ṭâlh ṭâlh a ni.

¹⁵Chutichuan, puitling apiang chutiang rilru puin i awm ang u; tin, eng kawngah pawh rilru danglam pu in lo nih chuan, chu pawh chu Pathianin a la hriattîr ang che u.

¹⁶Eng pawh ni sela, kan thlen chin aṭang khân hma i sâwn zêl ang u.

¹⁷Unaute u, ka awm dân zirtute lo ni hlawm rawh u; tin, entawn tûr keini min nei a, chumi ang zêla awmte chu en ṭha rawh u.

¹⁸Mi tam tak an kal a, chu mite chu Krista kraws hmêlma an ni tih an chanchin ka hrilh fo che u kha, tûnah pawh ṭap chungin ka hrilh che u hi;

¹⁹chûngho tâwpna chu boralna a ni, an Pathian chu an pum a ni, an ropuina pawh chu an mualphona a ni, khawvêl thil an duh ṭhîn a ni.

²⁰Keini zawng vân khua leh tui kan ni si a, vân aṭanga min chhandamtu Lal Isua Krista lo kal tûr chu nghâkhlel takin kan thlîr a ni.

²¹Ani chuan a thawhin, engkim pawh ama thu thuin a awmtîr thei, chumi thawhzia ang zêlin, kan tlâwm lai taksa hi ama taksa ropui anga awm tûrin a siam ṭha leh ang.