Read Mizo_Old_version KHUAA MITE HNENA TIRHKOH PAULA LEHKHATHAWN KOLOSSA 4 Bible Online

KHUAA MITE HNENA TIRHKOH PAULA LEHKHATHAWN KOLOSSA 4 - Mizo_Old_version bible

KHUAA MITE HNENA TIRHKOH PAULA LEHKHATHAWN KOLOSSA 4

¹Hotute u, nangni pawhin vânah Hotu in nei tih hriain, in bawihte chungah a fel leh a mawi tâwk chu ti rawh u.

²Ṭawngṭai fan fan ula, chumiah chuan lâwm thu hril chungin ngaihven rawh u.

³Mi phuarna chhan Krista thurûk chu hril tûrin, Pathianin thu atân kawng min tihkuaksak theih nân keini pawh min ṭawngṭaisak rawh u,

⁴ka sawi tûr ang taka ka puan theihna tûrin.

⁵Remchânna lei zêlin, pâwn lama mite lakah chuan fing takin awm rawh u.

⁶Mi tin engtia chhân ṭheuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se.

⁷Lalpaa unau duh tak, rawngbâwltu rinawm, kan bawihpui Tukika hian ka chanchin zawng zawng a hriattîr ang che u.

⁸Hemi avâng ngei hian ani chu in hnênah ka rawn tîr a ni, ka chanchin in hriat theihna tûr leh in thinlung a tihthlamuan theihna tûrin;

⁹Onesima, unau rinawm leh duh tak, nangmahni zînga mi nên hian. Anni chuan hêng lama thil awmzia zawng zawng hi an hriattîr ang che u.

¹⁰Aristarka, ka tânpuipa hian chibai a bûk a che u; Marka, Barnaba tupa pawhin chibai a bûk a che u (ama chungchâng thu-ah thupêkte in hmuh kha; in hnêna a lo kal chuan lo lâwm rawh u);

¹¹Isua, Justa an tiha hian chibai a bûk bawk a che u. Chûng chu serh tan mi an ni a; chûng chauh chu Pathian ram thu lamah chuan ka thawhpui, mi thlamuantute an ni.

¹²Epaphra, nangmahni zînga mi, Krista Isua bawihpa hian chibai a bûk a che u; ani chuan Pathian duh zâwng apianga puitling leh rin tlatna neia in din theihna tûrin, a ṭawngṭainaahte chuan nangmahni tân a bei fo ṭhîn a ni.

¹³Nangmahni tân te, Laodikei khuaa awmho tân te, Hierapoli khuaa awmho tân te ṭhahnem a ngai êm êm tih ka hriatpui asin.

¹⁴Luka, dâktawr duh tak leh Dema hian chibai an bûk a che u.

¹⁵Laodikei khuaa unau awmte kha chibai mi bûksak ang che u; Numphi leh a ina kohhranho kha chibai mi bûksak bawk ang che u.

¹⁶Tin, he lehkhathawn hi in zînga in chhiar hnuin Laodikei kohhranah pawh chhiartîr ve rawh u; nangni pawhin Laodikei khuaa mi kha lo chhiar ve bawk ang che u.

¹⁷Tin, Arkippa hnênah khân, “Rawngbâwlna Lalpaa i hmuh kha hlen tûrin fîmkhur rawh,” ti ang che u.

¹⁸Kei Paulan keima kut ngeia chibai ka bûkna che u a nih hi. Ka kawl bunte hi hre reng rawh u. Khawngaihna in hnênah awm rawh se.