Read Mizo_Old_version KHUAA MITE HNENA TIRHKOH PAULA LEHKHATHAWN PAKHATNA THESSALONIKA 3 Bible Online

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 3 - Mizo_Old_version bible

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 3

¹Chutichuan, kan tuar zawh tâk loh chinah chuan Atheni khuaah keimahni chauh hnutchhiahin awm ila ṭha kan ti a.

²Timothea, kan unaupa, Krista Chanchin Ṭha lama Pathian rawngbâwltu hi, tinghet tûr che u leh in rinna kawnga thlamuan tûr che uin kan rawn tîr a ni;

³hêng hrehawm tuarnate avâng hian tu mah an nghîn lohna tûrin, hêngte hi tuar tûrin ruat kan ni tih nangmahni ngeiin in hre si a.

⁴In hnêna kan awm lai khân hrehawm tuar tûr kan ni tih kan hrilh lâwk ngei che u kha; chutiang ngei chuan a thleng tawh a, chu chu in hriat kha.

⁵Chumi avâng chuan ka tuar zawh tâk loh hnuin, thlêmtu chuan a thlêm thlu hlauh vang che u a, kan thawh rimna chu a thlâwn dah ang e, tiin, in rinzia ka lo hriat theihna tûrin mi ka rawn tîr a ni.

⁶Nimahsela, Timothea chu in hnên aṭangin tûnah kan hnên a lo thlen hian, hmuh che u kan châk ang bawkin, min hmuh châk êm êmin khawngaih takin min hre reng fo tih thu leh, in rinna leh in hmangaihna chanchin lâwmawm tak min rawn hawn a;

⁷chumi avâng chuan unaute u, kan manganna leh hrehawmna zawng zawngah, in rinna avângin in chungah thlamuang takin kan awm ta.

⁸Tûnah chuan kan nung ta, Lalpaa in din ngheh phawt hi chuan.

⁹In hmêl kan hmuh theihna tûr leh, in rinna lama in tlâkchhamna kan phuhrûksak theihna tûr che uin, a chhûn a zâna nasa taka ṭawngṭaiin, kan Pathian hmaah in chunga kan hlimna zawng zawng avâng hian, nangmahni lam thu-ah Pathian hnênah eng lâwm thu nge kan hrilh ve thung theih ang le aw?

¹¹Tichuan, kan Pathian, kan Pa ngei chuan, kan Lalpa Isua pawhin, in hnên lamah min hruai rawh se.

¹²Tin, nangmahni lama hmangaihna kan ngah angin, nangmahni lamah inhmangaih tawnna leh, mi zawng zawng lamah hmangaihna chu Lalpa chuan tihpunsakin tihngahsak che u rawh se;

¹³chutichuan, kan Lalpa Isua chu a mi thianghlim zawng zawngte nêna a lo kal hunah, kan Pathian leh kan Pa hmaah in thinlungte thianghlimna kawngah sawisêl bovin a tinghet thei ang che u.