Read Mizo_Old_version Josua 10 Bible Online

Josua 10 - Mizo_Old_version bible

Josua 10

¹Tin, heti hi a ni a, Jerusalem khaw lal Adoni-zedekan Josuan Ai khua a la a, a tichhe dêr a, Jeriko khua leh an lal a tihchhiat angin Ai khua leh an lal pawh a tichhe dêr a, Gibeon khuaa mite chuan Israel-hote nên inremna an siam a, an zîngah an chêng ve ta tih a lo hriat chuan,

²a hlau ta hle mai a; Gibeon khua chu khaw lian tak, lal khawpui ang a ni si a, Ai khua aiin a ropui zâwk a, a mihring zawng zawngte pawh chu mi chak tak an ni si a.

³Chutichuan, Jerusalem lal Adoni-zedeka chuan Hebron khaw lal Hohama te, Jarmuth khaw lal Pirama te, Lakis khaw lal Japhia te, Eglon khaw lal Debira teho chu,

⁴“Lo kal ula, min rawn pui rawh u khai, Gibeon i va bei teh ang u; Josua leh Israela thlahte nên inremna an siam ta si a,” tiin a chah khâwm a.

⁵Chutichuan, Amor-ho lalte panga - Jerusalem khaw lal te, Hebron khaw lal te, Jarmuth khaw lal te, Lakis khaw lal te, Eglon khaw lal te chu an pung khâwm a, an sipaiteho zawng zawng nên an han chho va, Gibeon khaw epah an awm ta mup a, an bei ta a.

⁶Tin, Gibeon-hote chuan an riahhmun Gilgal-ah, Josua hnênah mi an tîr a, “I chhiahhlawhte hi ngaihthah suh ang che; rang takin kan hnênah lo chho la, min rawn chhandam la, min rawn ṭanpui rawh; tlâng rama chêngho Amor lalte min bei tûrin an pung khâwm chiam e,” tiin.

⁷Chutichuan, Josua leh a hnêna râl kâp mi zawng zawngte leh mi chak huaisenho zawng zawngte chu Gilgal aṭang chuan an han chho va.

⁸Tin, LALPAN Josua hnênah, “Anni chu hlau suh khai, i kutah ka pe vek tawh e; an zînga mi tu mah chelh tûr rêng rêng che an awm dâwn lo ve,” a ti a.

⁹Chutichuan, Josua chuan a bei ta thut a, zankhuain Gilgal aṭanga lo han kal tawh a ni a.

¹⁰Tin, LALPAN Israel-hote hmaah chuan anmahni chu a tibuai ta nuaih mai a, Gibeon khuaah chuan tam tak a that a, Beth-horon chhohna lam kawngah a ûm a, Azeka leh Makkeda khaw thlengin a that zêl a.

¹¹Tin, heti hi a ni a, Israel-ho hmaa an tlânchhiata, Beth-horon aṭanga liam thlâkna hmuna an awm lai chuan, LALPAN vân aṭangin rial lian pui puiin Azeka khaw thlengin a zuk dentîr chiam a, an thi a. Israela thlahten khandaiha an sah hlum ai mahin rial den hlum chu an tam zâwk a ni.

¹²Chutichuan, LALPAN Amor-hote chu Israela thlahte a pêk ni chuan Josuan LALPA hnênah thu a sawi a; Israel-hote mit hmuhah, “Nia, Gibeon khaw chungah ding reng rawh; Nang pawh Thlaa, Aijalon ruamah hian awm reng rawh,” a ti a.

¹³Tichuan, mite chuan an hmêlmate chunga phuba an lâk hma loh chuan ni chu a ding ta reng a, thla pawh chu a awm ta reng a. He thu hi Jasara buah ziak a ni lo vem ni? Tichuan, ni chu vânlaizâwlah a awm ta reng a, ni khat pumhlûm lai tlâk zai rêng rêng a rêl lo.

¹⁴LALPAN chutianga mihring aw a ngaihthlâk ni ang chuan a hmain ni rêng rêng a awm ngai lo va, a hnuah pawh a awm ngai hek lo; LALPAN Israel-hote chu a dopui a ni si a.

¹⁵Tin, Josua leh Israel-ho zawng zawngte chu an riahhmun Gilgal-ah an kîr leh ta vek a.

¹⁶Tin, chûng lal pangate chu an tlân bo va, Makkeda pûkah an biru a.

¹⁷Tin, “Lal pangate chu an hmu ta, Makkeda pûkah an biru a ni,” tiin Josua an hrilh a.

¹⁸Tichuan, Josuan, “Pûk kawngkaah chuan lung lian pui pui lum ula, a vêngtute pawh lo awmtîr rawh u.

¹⁹Nangni erawh chu awm suh u; in hmêlmate chu ûm ta zêl ula, hnudâltute kha that ula; an khuaah rêng rêng luhtîr suh u, LALPA in Pathianin in kutah anmahni chu a pe tawh si a,” a ti a.

²⁰Tin, heti hi a ni a, Josua leh Israela thlahten an chimih hma lohva an thah chiam zawha, a awm chhunate chu kulhpui nei khuaahte an tlân luh hnu chuan,

²¹mi zawng zawng chu Josua hnên lamah Makkeda-ah chuan râlmuang takin an lo haw leh ta a. Tu mahin Israela thlahte lamah rêng rêng an lei an phût lo.

²²Chutichuan, Josuan, “Pûk kawngka kha han hawng tawh ula, lal pangate kha pûk ata ka hnênah han hruai rawh u,” a ti a.

²³Tin, chutiang chuan an ti a, chûng lal panga - Jerusalem khaw lal te, Hebron khaw lal te, Jarmuth khaw lal te, Lakis khaw lal te, Eglon khaw lal te chu pûk ata a hnênah an rawn hruai a.

²⁴Tin, heti hi a ni a, chûng lalte chu Josua hnêna an rawn hruai chuan, Josuan Israel-ho zawng zawng chu a ko khâwm a, a hnêna kal ve râl kâp mite zînga puipa deuh deuhte hnênah chuan, “Lo kal hnai ula, hêng lalho ring hi han rap teh u,” a ti a. Tichuan, an lo kal hnai a, an ring chu an rawn rap ta a.

²⁵Tin, Josuan an hnênah, “Hlau suh ula, zâm hek suh u; chak tak leh huai takin awm rawh u, in hmêlma in do zawng zawng chungah LALPAN hetiang hian a ti zêl dâwn a ni e,” a ti a.

²⁶Tin, chumi zawhah chuan Josuan a bei a, a tihlum a, thing panga lêrah a khai a; tichuan, tlai thlengin thinglêrah chuan an inkhai a.

²⁷Tin, heti hi a ni a, ni tlâk dâwnin Josuan thu a pe a, thinglêr ata chu an la thla a, an bihrûkna pûkah khân an paih lût a, pûk kawngka chu lung lian pui puiin an chhîn a, tûn thleng pawh hian a la awm reng.

²⁸Tin, Josuan chumi ni chuan Makkeda khua chu a la a, an lal chawpin khandaihin a bei a. Chu khuaa awm zawng zawngte nên chuan a tihlum fai vek a, pakhat mah zuah rêng rêng a nei lo. Tichuan, Jeriko khaw lal chunga a tih ang bawk khân Makkeda khaw lal chungah pawh a ti a.

²⁹Tin, Josua chuan Israel-ho zawng zawngte nên Makkeda khua aṭangin Libna khua chu an bei a.

³⁰Tichuan, LALPAN chu khua chu an lal chawpin Israel-te kutah a pe leh bawk a; tin, chu khua chu beiin a chhûnga awm zawng zawngte chu khandaihin a tihlum vek a. A chhûnga mi pakhat mah zuah rêng rêng a nei lo; tichuan, Jeriko khaw lal chunga a tih ang bawk khân chumi khaw lal chungah pawh chuan a ti a.

³¹Tin, Josua chu Israel-ho zawng zawngte nên Libna khua aṭangin Lakis khaw lamah an kal a, ṭanhmun an khuar a, an bei ta a.

³²Tichuan, LALPAN Lakis khua chu Israel-te kutah a pe a, a ni hnih niah a la a, chu khua chu beiin a chhûnga awm zawng zawngte chu khandaihin a tihlum vek a, Libna khaw chunga a tih ang bawk khân.

³³Chutichuan, Gezer khaw lal Horama chu Lakis khua pui tûrin a han kal a; tin, Josua chuan amah leh a hote nên pakhat mah zuah hlek lovin a lo that phiar a.

³⁴Tin, Josua chu Israel-ho zawng zawngte nên Lakis khua aṭangin Eglon khaw lamah an kal a, ṭanhmun an khuar a, an bei ta a.

³⁵Chumi ni chuan an la a; tin, chumi ni vêk chuan chu khua chu beiin a chhûnga awm zawng zawngte chu a tihlum fai vek a, Lakis khaw chunga a tih ang bawk khân.

³⁶Tin, Josua chu Israel-ho zawng zawngte nên Eglon khua aṭangin Hebron khaw lamah an han kal a; an bei ta a.

³⁷Tichuan, an la a, chu khua leh an lal leh, a khawper zawng zawngte chu khandaiha beiin a tihlum vek a, Eglon khaw chunga a tih ang bawk khân pakhat mah zuah rêng rêng a nei lo va; a khua lama chhu chhe vekin a chhûnga awm zawng zawngte chu a tihlum fai vek a.

³⁸Tin, Josua leh Israel-ho zawng zawngte chu Debir khaw lamah an lêt leh a; an bei ta a.

³⁹Tichuan, chu khua leh an lal leh, a khawper zawng zawngte chu a la a; khandaihin an bei a, a chhûnga awm zawng zawngte chu a tihlum fai vek a. Pakhat mah zuah rêng rêng a nei lo; Hebron khaw chunga a tih ang khân Debir khua leh an lal chungah pawh a ti a, Libna khua leh an lal chunga a tih ang bawk khân.

⁴⁰Chutichuan, Josuan a ram pumin - tlâng ram te, Chhim ram te, phai ram te, awih pangpêr ram te chhu chhe vekin an lal zawng zawngte chu a tihlum vek a; pakhat mah zuah rêng rêng a nei lo; LALPA, Israel-te Pathian thupêk angin nung tawh phawt chu a tichimit ta vek zâwk a.

⁴¹Tin, Josua chuan Kadesh-barnea aṭanga Gaza thlengin, Gosen ram zawng zawng nên Gibeon thlengin a chhu chhe vek a.

⁴²Chûng lalho zawng zawngte leh an ramte chu LALPA, Israel-te Pathianin Israel-hote chu a dopui avângin, Josua chuan ṭum khata a man vek an ni.

⁴³Tin, Josua leh Israel-ho zawng zawngte chu an riahhmun Gilgal-ah an kîr leh ta vek a.