Read Mizo_Old_version Josua 11 Bible Online

Josua 11 - Mizo_Old_version bible

Josua 11

¹Tin, heti hi a ni a, Hazor khaw lal Jabinan chu chu a lo hriat chuan, Madon khaw lal Jobaba te, Simron khaw lal te, Aksaph khaw lal te,

²hmâr lam tlâng ram lal te, Kineroth chhim lama Araba lal te, phai ram lal te, thlang lampanga Dor khaw zosâng lal te,

³chhak lam leh thlang lama awm Kanaan mi te, tlâng lama awm Amor-ho te, Hit-ho te, Periz-ho te, Jebus-ho te, Mizpa ram Hermon tlâng hnuaia awm Hiv-ho hnênah te mi a tîr a.

⁴Tin, an sipaihote zawng zawng nên mi tam tak, an tam lam chu tuifinriat kama ṭiauvaivut zât zet, sakawr leh tawlailîr tam tak nên an thawk ta chiam a.

⁵Chûng lalho zawng zawngte chu an intâwk khâwm a, Israel-hote chu beih tumin Merom tuiahte chuan an riak khâwm a.

⁶Tin, LALPAN Josua hnênah, “Anni chu hlau suh, naktûk hetih hun hian anniho chu tihhlum sa vekin Israel-te ka rawn pe mai dâwn e. An sakawr thate i chhahsak ang a, an tawlailîrte chu i hâlsak dâwn nia,” a ti a.

⁷Chutichuan, Josua leh râl kâp mi zawng zawngte chu Merom tuiahte chuan an va thawk ta thut a, an bawh ta a.

⁸Tin, LALPAN anmahni chu Israel-te kutah a pe a, an bei a, Zidon ropui thleng te, Misrephoth-maim hmun thleng te, chhak lampanga Mizpa ruam thleng tein an ûm a; pakhat mah zuah rêng nei lovin an that vek a.

⁹Tin, LALPAN a tirh angin Josua chuan an chungah a ti a: an sakawr thate a chhahsak a, an tawlailîrte chu a hâlsak a.

¹⁰Tin, chutih lai chuan Josua chu a lêt leh a, Hazor khua chu a la a, an lal chu khandaihin a that a; tûn hma chuan Hazor khua chu chûnglai vêl ram zawng zawng zînga khawpui ber a ni.

¹¹Tin, chu khuaa awm zawng zawngte chu khandaihin an that vek a, an tichimit vek a. Nung tawh phawt chu pakhat mah an zuah lo. Tichuan, Hazor khua chu a hâl ta a.

¹²Tin, chûng lalho khawpui zawng zawngte leh an lal zawng zawngte chu Josuan a man vek a, khandaiha beiin a that a, a tichimit vek a; LALPA chhiahhlawh Mosian thu a pêk ang khân.

¹³Mualpâwnga khawpui lo din sa tawhte erawh kha chu, Hazor khua ngawt lo chu Israel-hote chuan pakhat mah an hâl lo; chu khua erawh chu Josuan a hâl a ni.

¹⁴Tin, chûng khawpuia an râllâk zawng zawngte leh rante chu Israela thlahte chuan anmahni pualah an nei a; mihring erawh chu an tihboral vek hma loh zawng khandaihin an that zêl a, nung tawh phawt chu zuah an nei lo.

¹⁵LALPAN a chhiahhlawh Mosia thu a pêk ang bawkin Mosia pawhin Josua chu thu a pe ve a, chutiang chuan Josuan a ti zêl a. LALPAN Mosia thu a pêk zawng zawng chu tih loh rêng a nei lo.

¹⁶Chutichuan, Josuan chûng ram zawng zawng - tlâng ram te, Chhim ram zawng zawng te, Gosen ram zawng zawng te, phai ram te, Araba te, Israel-ho tlâng ram te, an phai ramte nên a la vek a,

¹⁷Seir tlâng han sutu Halak tlâng aṭanga Hermon tlâng hnuaia Lebanon ruama Baal-gad thlengin. An lal zawng zawngte chu a man a, a that a, a tihlum a.

¹⁸Josuan chûng lalho zawng zawng chu rei tak a do a ni.

¹⁹Gibeon khuaa awm Hiv-hote tih chauh loh chu Israel-hote nêna remna siam khua rêng rêng an awm lo. Dova an lâk vek a ni.

²⁰LALPAN Mosia thu a pêk anga a tihchimih veka, duhsakna nei hlek lova a tihboral theihna tûra an thinlung tihkhauhsaka, Israel-hote dotîr ṭhîntu chu LALPA chu a ni si a.

²¹Tin, chûnglai chuan Josua chu a kal a, tlang ram aṭang te, Hebron khua aṭang te, Debir khua aṭang te, Anab khua aṭang te, Judai tlâng ram zawng zawng aṭang te, Israel tlâng ram zawng zawng aṭangtein Anak-ho chu a tichimit vek a; Josua chuan an khawpuite chawpin a tiboral vek a.

²²Israela thlahte ramah chuan Anak-ho chu pakhat mah awm an awm tawh lo; Gaza khuaah te, Gath khuaah te, Asdod khuaah te erawh chuan awm chu an la awm.

²³Chutichuan, LALPAN Mosia hnêna a sawi zawng zawng ang khân, Josua chuan ram pum pui chu a la ta a; tin, Josua chuan Israel-hote chu an hnam inṭhen dân ang zêlin an rochan atân a pe hlawm a. Tichuan, ram chu râlmuangin a awm ta a.