Read Mizo_Old_version Josua 12 Bible Online

Josua 12 - Mizo_Old_version bible

Josua 12

¹Hêngte hi a ni chûng ram lal, Israela thlahten an tihborala, an ram Jordan lui râl, ni chhuahna lam ram, Arnon ruam aṭanga Hermon tlâng thleng te, chhak lampanga Araba zawng zawng nêna an neihsak lalte chu:

²Amor-ho lal Sihona, Hesbon-a awm chuan Arnon ruam sîra awm Aroer khua aṭangin ro a rêl a ni a; tin, ruam lai taka khawpui te, Amona thlahte ramri Jabok lui thlengin Gilead ram zâtve chungah chuan a rêl bawk a;

³tin, chhak lamah chuan Araba-ah Kineroth dîl thlengin a ni a; tin, chhak lamah vêk Beth-jesimoth kalna kawng lamah Araba tuifinriat, Tuifinriat Al thlengin a ni a; tin, chhim lamah chuan Pisga awih pangpêr hnuai thlengin a ni a.

⁴Astaroth leh Edrei khuaa awm Rephaim hnam la awm chhunte zingah chuan Basan lal Oga a lal a;

⁵ani chuan Hermon tlângah te, Saleka khuaah te leh Basan ram zawng zawngah Gesur-ho leh Makat-ho ramri thleng leh Hesbon lal Sihona ramri chin Gilead ram zâtve thlengin ro a rêl a.

⁶LALPA chhiahhlawh Mosia leh Israela thlahte chuan chûnghote chu an that a; tin, LALPA chhiahhlawh Mosia chuan Reuben chite, Gad chite, Manase hnam zâtvete chu an rochanah a sem a.

⁷Tin, hêng ram lalho hi a ni Josua leh Israela thlahten Jordan lui râl thlang lampanga an thahte chu, Lebanon ruam Baal-gad aṭanga Seir tlâng han sutu Halak tlâng thlengin; tin, Josua chuan Israel hnamte an inṭhen dân ang zêlin chu ram chu an rochan atân a pe hlawm a;

⁸tlâng ramah te, phai ramah te, Araba-ah te, tlâng pangpêr ramah te, chûng chu Hit mi te, Amor mi te, Kanaan mi te, Periz mi te, Hiv mi te, Jebus mite ram kha a ni.

⁹Jeriko khaw lal, pakhat; Bethel khaw depa Ai khaw lal, pakhat;

¹⁰Jerusalem khaw lal, pakhat; Hebron khaw lal, pakhat;

¹¹Jarmuth khaw lal, pakhat; Lakis khaw lal, pakhat;

¹²Eglon khaw lal, pakhat; Gezer khaw lal, pakhat;

¹³Debir khaw lal, pakhat; Geder khaw lal, pakhat;

¹⁴Horma khaw lal, pakhat; Arad khaw lal, pakhat;

¹⁵Libna khaw lal, pakhat; Adulam khaw lal, pakhat;

¹⁶Makkeda khaw lal, pakhat; Bethel khaw lal, pakhat;

¹⁷Tapua khaw lal, pakhat; Hepher khaw lal, pakhat;

¹⁸Aphek khaw lal, pakhat; Lasaron khaw lal, pakhat;

¹⁹Madon khaw lal, pakhat; Hazor khaw lal, pakhat;

²⁰Simron-meron khaw lal, pakhat; Aksaph khaw lal, pakhat;

²¹Taanak khaw lal, pakhat; Megido khaw lal, pakhat;

²²Kedes khaw lal, pakhat; Karmel tlânga Jokneam khaw lal, pakhat;

²³Dor khaw zosânga Dor khaw lal, pakhat; Gilgal-a Goiim hnamho lal, pakhat;

²⁴Tirza khaw lal, pakhat; lal zawng zawng chu sawmthum leh pakhat an ni.